మ్యారేజ్ సర్టిఫికేట్‌,,, ఎలా దరఖాస్తు చేసుకోవాలంటే

పెళ్లిళ్ల సీజన్ వచ్చేసింది. మే నెల ప్రారంభం నుంచి జూన్ మొదటి వారం మంచి ముహూర్తాలు ఉన్నాయి. పైగా వేసవి సెలవులు. దీంతో పెళ్లిళ్లకు ఇదే సరైన టైమ్ అని కొత్త జంటలు ఒక్కటవుతున్నాయి. బంధుమిత్రుల సమక్షంలో ఏడు అడుగులు, మూడు ముళ్ల బంధంతో వైవాహిక జీవితంలో అడుగుపెడుతున్నాయి. దీంతో ఫంక్షన్ హాళ్ల వద్ద పండగ వాతావరణం ఉంటోంది. అలాగే ప్రీవెడ్డింగ్ షూట్లంటూ కొత్త జంటలు సందడి చేస్తున్నాయి. ఇంత వరకూ బాగానే ఉన్నాకూడా ఓ ముఖ్యమైన విషయంలో కొత్త జంటలు అంతగా శ్రద్ధ చూపించడం లేదు. అదే మ్యారేజ్ రిజిస్ట్రేషన్.. వివాహ నమోదు అనేది చట్టబద్ధమైన ప్రక్రియ. పెద్దల అంగీకారంతో, బంధుమిత్రుల సమక్షంలో ఒక్కటయ్యే వధూవరులు.. తమ వివాహాన్ని అధికారుల వద్ద రిజిస్ట్రేషన్ చేసుకోవాలి. దీని వలన అనేక ప్రయోజనాలు ఉన్నాయని అధికారులు చెప్తున్నారు. దీంతో తప్పనిసరిగా వివాహాన్ని రిజిస్ట్రేషన్ చేయించుకోవాలని చెప్తున్నారు.

మ్యారేజ్ సర్టిఫికేట్ ద్వారా అనేక ప్రయోజనాలు ఉన్నాయని అధికారులు చెప్తున్నారు. ఉద్యోగులకు నామినీ నమోదు సమయంలో మ్యారేజీ సర్టిఫికేట్ అవసరపడుతుందని చెప్తున్నారు. భార్యను లేక భర్తను నామినీగా నమోదు చేయాలనుకుంటే వివాహ నమోదు పత్రం అవసరమని సూచిస్తున్నారు. అలాగే విదేశాలకు వెళ్లేటప్పుడు పాస్‌పోర్టు, వీసా, వర్క్‌ పర్మిట్, ఇన్సూరెన్స్ వంటి వాటికి ఈ సర్టిఫికేట్ అవసరమని చెప్తున్నారు. ఇక ప్రభుత్వాలు అందించే సంక్షేమ పథకాల లబ్ధి పొందాలన్నా మ్యారేజీ సర్టిఫికేట్ ముఖ్యమని సలహా ఇస్తున్నారు.

మ్యారేజ్ రిజిస్ట్రేషన్ దరఖాస్తు

మరోవైపు మ్యారేజ్ రిజిస్ట్రేషన్ కోసం ప్రభుత్వ యంత్రాంగానికి దరఖాస్తు చేసుకోవాల్సి ఉంటుంది. పెళ్లికి సంబంధించిన శుభలేఖతో పాటుగా వధూవరుల పాస్‍పోర్టు సైజు ఫోటోలు, వయసు ధ్రువీకరణ కోసం బర్త్ సర్టిఫికేట్లు, ఆధార్ కార్డు జిరాక్సులను అధికారులకు సమర్పించాల్సి ఉంటుంది. అలాగే పదోతరగతి చదివి ఉంటే పదో తరగతి మార్కుల జాబితా జిరాక్స్ కూడా ఇవ్వాల్సి ఉంటుంది. అలాగే వధూవరుల తరుఫున ఇద్దరి చొప్పున సాక్షి సంతకాలు అవసరం. ఈ వివరాలన్నింటిని గ్రామ, వార్డు సచివాలయ అధికారులకు అందజేస్తే వారు పరిశీలిస్తారు. అనంతరం పంచాయతీ లేదా మున్సిపాలిటీ ఆఫీసుకు పంపుతారు. అనంతరం రూ.500 ఫీజు చెల్లించి మ్యారేజీ సర్టిఫికేట్ పొందొచ్చు.

అలాగే మ్యారేజ్ సర్టిఫికేట్ పొందేందుకు మరో విధానం కూడా అందుబాటులో ఉంది. సబ్‌రిజిస్ట్రార్‌ కార్యాలయంలో స్లాట్‌ బుక్‌ చేసుకోవటం ద్వారా ఆన్‌లైన్, ఆఫ్‌లైన్‌లో కూడా వివాహాన్ని నమోదు చేసుకోవచ్చు. ఈ నేపథ్యంలో కొత్తగా పెళ్లైనవారు, మ్యారేజీ సర్టిఫికేట్ లేని వారు.. తమ వివాహాన్ని రిజిస్ట్రర్ చేసుకోవాలని అధికారులు సూచిస్తున్నారు.