పుట్టినరోజున,,,దేశం కోసం రూ.5 లక్షలు విరాళమిచ్చిన సామాన్యుడు

సరిహద్దుల్లో ఉద్రిక్తతలు కొనసాగుతున్నాయి. శత్రుమూకల కుట్రలను భగ్నం చేస్తూ జాతి రక్షణ కోసం సరిహద్దుల్లో సైనికుడు పోరాడుతున్నాడు. ప్రతి భారతీయుడు గుండెల మీద చేయి వేసుకుని ప్రశాంతంగా పడుకునేందుకు .. తాను నిద్రాహారాలు మాని.. జాతి రక్షణే పరమావధిగా, ప్రాణాలను సైతం లెక్కచేయక పోరాటం చేస్తున్నాడు. ఎండావానా, రేయీపగలూ.. వాతావరణంతో సంబంధం లేదు.. పండుగ, పబ్బాల మాటే లేదు.. కన్నోళ్లు, కట్టుకున్నోళ్లు, పుట్టినోళ్ల ఊసులు మదిలో మెదులుతుంటే.. ఆ ఊసులనే ఊపిరిగా, దేశ భద్రతే ధ్యేయంగా.. తన కుటుంబాల లాంటి కోట్ల కుటుంబాల రక్షణ కోసం.. చిమ్మ చీకట్లో., మంచుకొండల్లో.. అలుపెరుగని పోరాటం చేస్తున్నాడు మన జవాన్..

భారత్ పాకిస్థాన్ ఉద్రిక్తతల వేళ.. భారత సైన్యం చూపుతున్న ధైర్య సాహసాలు, జవాన్ల పరాక్రమాలను యావత్ దేశం వేన్నోళ్లా కీర్తిస్తోంది. శత్రుదేశం గడ్డ మీదకు వెళ్లి మరీ మనోళ్లు చూపుతున్న సత్తాను కొనియాడుతోంది. భారత సైన్యం శక్తిని తట్టుకోలేక.. సరిహద్దుల్లో అమాయక ప్రజలపై కాల్పులకు తెగబడుతున్న పాకిస్థాన్‌ను.. బోర్డర్‍లోని మన జవాన్లు నిలువరిస్తున్నారు. ఈ క్రమంలోనే మురళీ నాయక్ వీరమరణం పొందారు. మురళీ నాయక్‌కు యావత్ దేశం నివాళులు అర్పిస్తోంది. ఇలాంటి క్లిష్ట పరిస్థితుల్లో సైన్యానికి అండగా, మద్దతుగా యావత్ దేశం నిలబడుతోంది. ఈ క్రమంలోనే తిరుపతికి చెందిన ఓ వ్యక్తి తన దేశభక్తిని చాటుకున్నాడు. పుట్టినరోజు సందర్భంగా భారత సైన్యానికి తన కష్టాన్ని విరాళంగా అందించారు. భారత రక్షణ వ్యవస్థ బలోపేతం కోసం ఉడతా భక్తిగా రూ.5 లక్షలు విరాళంగా అందించారు.

తిరుపతిలోని మంగళం ప్రాంతానికి చెందిన జ్యోతికృష్ణ నాయుడు దేశం పట్ల తనకు ఉన్న భక్తి భావాన్ని చాటుకున్నారు. తన పుట్టిన రోజును పురస్కరించుకుని.. భారత సైన్యం కోసం తన కష్టార్జితం నుంచి రూ.5 లక్షల విరాళంగా అందించారు. తిరుపతిలోని ఎన్‌సీసీ రాయలసీమ ప్రధాన కార్యాలయంలో జ్యోతికృష్ణ నాయుడు తన పుట్టినరోజు వేడుకలు జరుపుకున్నారు. కుటుంబసభ్యులు, ఆర్మీ అధికారుల మధ్య కేక్ కట్ చేసి వేడుకలు జరుపుకున్నారు. అనంతరం రూ.5 లక్షల చెక్కును ఆర్మీ అధికారులకు అందజేశారు. భారత సైన్యం ప్రపంచంలోనే నెంబర్ వన్ స్థాయిలో ఉండాలనేది తన కోరిక అని జ్యోతికృష్ణ తెలిపారు. భవిష్యత్తులోనూ ఆర్మీ కోసం ఎదైనా గొప్ప చేస్తానని అన్నారు.