అమెరికాలో అంతర్జాతీయ విద్యార్థులకు స్టూడెంట్ వీసా నిబంధనలపై ప్రభుత్వం హెచ్చరిక

అమెరికాలో ఉన్నత విద్య అభ్యసించాలనుకునే భారతీయ విద్యార్థులతో పాటు ఇతర అంతర్జాతీయ విద్యార్థులకు అమెరికా ప్రభుత్వం కీలకమైన హెచ్చరిక జారీ చేసింది. స్టూడెంట్ వీసా నిబంధనలను కచ్చితంగా పాటించాలని, లేనిపక్షంలో తీవ్ర పరిణామాలు ఎదుర్కోవాల్సి వస్తుందని స్పష్టం చేసింది. తరగతులకు సరిగా హాజరుకాకపోవడం, చదువుతున్న విద్యాసంస్థకు సమాచారం ఇవ్వకుండా కోర్సు నుంచి వైదొలగడం వంటి చర్యలకు పాల్పడితే విద్యార్థుల వీసాలను రద్దు చేస్తామని మంగళవారం హెచ్చరించింది. అంతేకాకుండా, అలాంటి విద్యార్థులు భవిష్యత్తులో అమెరికా వీసాలు పొందే అర్హతను కూడా కోల్పోయే ప్రమాదం ఉందని భారత్‌లోని అమెరికా రాయబార కార్యాలయం పేర్కొంది."మీరు చదువు మధ్యలో మానేసినా, తరగతులకు హాజరుకాకపోయినా, లేదా మీ విద్యాసంస్థకు తెలియజేయకుండా మీ స్టడీ ప్రోగ్రామ్ నుంచి నిష్క్రమించినా, మీ స్టూడెంట్ వీసా రద్దు చేయవచ్చు. భవిష్యత్తులో అమెరికా వీసాలకు మీరు అనర్హులు కావచ్చు. ఎలాంటి సమస్యలు తలెత్తకుండా ఉండేందుకు ఎల్లప్పుడూ మీ వీసా షరతులకు కట్టుబడి ఉండండి, మీ స్టూడెంట్ స్టేటస్‌ను కాపాడుకోండి" అని యూఎస్ ఎంబసీ తన 'ఎక్స్' ఖాతాలో పోస్ట్ చేసింది.ఈ హెచ్చరికల నేపథ్యంలో, అసోసియేటెడ్ ప్రెస్ నివేదిక ప్రకారం, ఇటీవల 4,700 మందికి పైగా అంతర్జాతీయ విద్యార్థుల స్టడీ పర్మిట్లను ఎలాంటి ముందస్తు సమాచారం గానీ, సరైన వివరణ గానీ లేకుండా అమెరికా రద్దు చేసింది. అక్రమ వలసదారులు, విదేశీ జాతీయులపై కఠిన వైఖరిలో భాగంగానే ఈ చర్యలు ఉన్నట్లు అసోసియేటెడ్ ప్రెస్ పేర్కొంది.అమెరికాలో అంతర్జాతీయ విద్యార్థులు, ఎక్స్ఛేంజ్ విజిటర్లను పర్యవేక్షించేందుకు యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ , ప్రత్యేకించి ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్  ఉపయోగించే స్టూడెంట్ అండ్ ఎక్స్ఛేంజ్ విజిటర్ ఇన్ఫర్మేషన్ సిస్టమ్  నుంచి విద్యార్థుల రికార్డులను తొలగించిన సందర్భాలు అనేకం ఉన్నాయి. అయితే, చాలా సందర్భాల్లో ఈ విషయం విద్యార్థులకు గానీ, వారు చదువుతున్న విశ్వవిద్యాలయాలకు గానీ తెలియడం లేదని సమాచారం. ఈ పరిణామాల దృష్ట్యా, అమెరికాలో చదువుతున్న, చదవాలనుకుంటున్న విద్యార్థులు వీసా నిబంధనల పట్ల అత్యంత అప్రమత్తంగా ఉండాలని నిపుణులు సూచిస్తున్నారు.