కెనడాకు ట్రంప్ బంపర్ ఆఫర్.. అలా చేస్తే గోల్డెన్ డోమ్ ఫ్రీ అంట

అగ్రరాజ్యం అమెరికా అధ్యక్షుడు డొనాల్డ్ ట్రంప్ రెండోసారి పదవీ బాధ్యతలు చేపట్టినప్పటి నుంచి చాలా దూకుడుగా వ్యవహరిస్తున్నారు. ఎన్నికల్లో గెలిచి, పదవీ బాధ్యతలు స్వీకరించకముందు నుంచే కెనడాను తమ దేశంలో 51వ రాష్ట్రంగా విలీనం చేసుకుంటామని పదే పదే చెప్పుకొచ్చారు. ఈమధ్య కాస్త దీనిపై నోరు మెదపకపోయినప్పటికీ.. తాజాగా మరోసారి ఈ అంశంపై మాట్లాడారు. ముఖ్యంగా అమెరికా నిర్మించబోతున్న గోల్డెన్ డోమ్ క్షిపణి రక్షణ వ్యవస్థను కెనడా ఉచితంగా పొందవచ్చని అన్నారు. కానీ అందుకోసం కెడనా తన దేశ 51వ రాష్ట్రంగా మారాలని అన్నారు. లేని పక్షంలో 61 బిలియన్ డాలర్లు చెల్లించాల్సి ఉంటుందని స్పష్టం చేశారు.

భవిష్యత్తులో అమెరికా గగన తలంలోకి ఏ క్షిపణీ ప్రవేశించకుండా, ఏ అణ్వాయుధమూ సమీపించకుండా గోల్డెన్ డోమ్ అనే అత్యంత ఆధునిక రక్షణ వ్యవస్థను నిర్మించేందుకు అమెరికా సిద్ధం అయింది. ముఖ్యంగా ఈ గోల్డెన్ డోమ్ ప్రాజెక్టు నిర్మించేందుకు 175 బిలియన్ డాలర్లు ఖర్చు చేయబోతున్నారు. ఇందుకోసం ఆర్కటిక్లో రాడార్ మరియు ట్రాకింగ్ స్టేషన్లను ఏర్పాటు చేయడానికి కెనడా భూభాగాన్ని ఉపయోగించాల్సిన అవసరం ఉంది. అయితే ఈ ప్రాజెక్టులో భాగం అయ్యేందుకు కెనడా కూడా ఆసక్తి కనబరుస్తోంది. ఒకవేళ కెనడా భూభాగం ఇస్తే.. ఉత్తర అమెరికా ముందస్తు హెచ్చరిక సామర్థ్యాలను ఈ ప్రాజెక్టు గణనీయంగా పెంచుకుందని రిటైర్డ్ యుఎస్ ఎయిర్ ఫోర్స్ జనరల్ గ్లెన్ వాన్ హెర్క్ తెలిపారు.

అయితే కెనడా ఈ ప్రతిపాదనపై ఇంకా అధికారికంగా స్పందించలేదు. కాకపోతే అమెరికా అధికారులతో చర్చలు జరుపుతున్నట్లు తెలుస్తోంది. ముఖ్యంగా కెనడా మాజీ రక్షణ మంత్రి బిల్ బ్లెయిర్ దీనిపై స్పందిస్తూ.. జాతీయ ప్రయోజనం పొందాలంటే ఈ ప్రాజెక్టులో భాగం కావడం అవసరం అని చెప్పుకొచ్చారు. ఇలాంటి సమయంలోనే డొనాల్డ్ ట్రంప్ షాకింగ్ కామెంట్లు చేశారు. ముఖ్యంగా తమ దేశంలో కెనడా 51వ రాష్ట్రంగా విలీనం అయితే.. గోల్డెన్ డోమ్ ను ఉచితంగా పొందవచ్చని వ్యాఖ్యానించారు. లేదంటే 61 బిలియన్ డాలర్లు చెల్లించాల్సి ఉంటుందని వ్యాఖ్యానించారు.

అయితే ట్రంప్ చేసిన ఈ ప్రతిపాదనపై కెనడా ప్రధాని మార్క్ కార్నీ తీవ్రంగా స్పందించారు. వాషింగ్టన్‌లో జరిగిన సమావేశంలో మాట్లాడుతూ.. కెనడా అమ్మకానికి లేదని మరోసారి స్పష్టం చేశారు. కెనడా యొక్క సార్వభౌమత్వాన్ని పునరుద్ఘాటిస్తూ.. ట్రంప్ సూచనలను ఖండించారు. ట్రంప్ చేసిన రాష్ట్ర హోదా వ్యాఖ్యలతో అమెరికా-కెనడా సంబంధాలను పునఃపరిశీలించుకోవాల్సిన అవసరాన్ని సూచిస్తున్నాయి. కెనడా నాయకులు.. తమ దేశం స్వాతంత్ర్యం, సార్వభౌమత్వాన్ని కాపాడేందుకు కట్టుబడి ఉన్నట్లు ఎప్పటికప్పుడు ప్రకటిస్తూనే ఉన్నారు. ఈ పరిణామాలు అన్నీ ఉత్తర అమెరికా భద్రతా వ్యవస్థల భవిష్యత్తుపై ప్రభావం చూపే అవకాశం ఉంది. చూడాలి మరి మున్ముందు ఏం జరగనుంది అనేది.