టారిఫ్‌లపై ట్రంప్‌దే పైచేయి.. ట్రేడ్ కోర్టు స్టే విధించినా మరో న్యాయస్థానంలో అనుకూల తీర్పు

అగ్రరాజ్యం అమెరికా అధ్యక్షుడు డొనాల్డ్ ట్రంప్ ప్రపంచ వ్యాప్తంగా ఉన్న అనేక దేశాలపై భారీ ఎత్తున సుంకాలు విధిస్తున్న విషయం అందరికీ తెలిసిందే. ఏప్రిల్ 2వ తేదీ నుంచి వీటి అమలు కొనసాగుతుండగా.. తాజాగా ట్రేడ్ కోర్టు దీనిపై స్టే విధించింది. దీంతో ఆయన అప్పీల్ కోర్టుకు వెళ్లగా.. అక్కడ నెగ్గారు. ముఖ్యంగా ప్రభుత్వ అభ్యర్థనను పరిగణలోకి తీసుకున్న న్యాయస్థానం.. ట్రేడ్ కోర్టు ఇచ్చిన తీర్పును నిలుపుదల చేసింది. అలాగే ట్రంప్ విధించిన దిగుమతి సుంకాలను ప్రస్తుతం కొనసాగించవచ్చని కూడా చెప్పింది. యూఎస్ సర్కారు విధించిన టారిఫ్‌లు చట్ట విరుద్ధమని ట్రేడ్ కోర్టు తీర్పు వెలువరించిన మరుసటి రోజే ఈ తీర్పు రాగా.. అంతా షాక్ అవుతున్నారు.

ఏప్రిల్ 2వ తేదీన లిబరేషన్ డే పేరుతో.. అమెరికా అధ్యక్షుడు డొనాల్డ్ ట్రంప్ అనేక దేశాలపై పెద్ద ఎత్తున సుంకాలను విధించారు. అయితే దీనిపై ట్రంప్ తన అధికార పరిధిని అతిక్రమించారని చెబుతూ.. అనేక మంది అమెరికా అంతర్జాతీయ వాణిజ్య కోర్టులో పిటిషన్ దాఖలు చేశారు. దీనిపై బుధవారం రోజు విచారణ జరిపిన న్యాయస్థానం సుంకాల విధింపుపై స్టే విధించింది. అలాగే ఈ విషయంలో ట్రంప్ తన అధికార పరిధిని మించి వ్యవహరించారని కూడా పేర్కొంది. ఐఈఈపీఏ ఆధారంగా అధ్యక్షుడికి పరిమితి లేని అధికారాలను కాంగ్రెస్ అప్పగించలేదని స్పష్టం చేసింది.

జాతీయ అత్యవసవ పరిస్థితుల్లో అసాధారణ ముప్పును ఎదుర్కునేందుకు అవసరమైన ఆర్థిక ఆంక్షలు మాత్రమే విధించగలని కూడా న్యాయస్థానం చెప్పింది. అమెరికా రాజ్యాంగం ప్రకారం అంతర్జాతీయ వాణిజ్యంపై నియంత్రణ అధికారం కేవలం కాంగ్రెస్‌కు మాత్రమే ఉందని వివరించింది. అధ్యక్షుడికి టారిఫ్‌లను విధించే అధికారం ఉందా లేదా అనే దానిపై కోర్టు మాట్లడదని పేర్కొంది. అది చట్టపరంగా అనుమతించబడదని మాత్రమే కోర్టు స్పష్టం చేస్తుందని చెప్పింది. అలాగే సుంకాలను అధికార పరిమితిని దాటి ఉపయోగించుకోవడం రాజ్యాంగ ధిక్కరణే అవుతుందని తెలిపింది. దీంతో ట్రంప్ సర్కారు అప్పీల్ దాఖలు చేసింది.

దీంతో గురువారం రోజు న్యాయస్థానం విచారణ జరిపింది. ప్రభుత్వ విజ్ఞప్తిని పరిగణలోకి తీసుకుని దిగువ కోర్టు ఇచ్చిన తీర్పును నిలిపి వేస్తున్నట్లు పేర్కొంది. అలాగే దీనిపై జూన్ 5వ తేదీలోగా ఫిర్యాదుదారులు, జూన్ 9వ తేదీ లోగా పరిపాలన అధికారులు స్పందించాలని స్పష్టం చేసింది. ట్రంప్ విధించిన దిగుమతి సుంకాలను ప్రస్తుతం కొనసాగించవచ్చని కూడా చెప్పింది. ట్రంప్ విధించిన టారిఫ్‌లు చట్ట విరుద్ధమని ట్రేడ్ కోర్టు తీర్పు వెలువరించిన మరుసటి రోజే ఈ తీర్పు రాగా.. అంతా షాక్ అవుతున్నారు.