ప్రయాణించే విమానం ఏదో చెబితేనే టికెట్ బుక్ చేసుకుంటాం.. ప్రమాదం తర్వాత కొత్త డిమాండ్

గత వారం అహ్మదాబాద్‌లో జరిగిన ఘోర విమాన ప్రమాదం భారత విమానయాన రంగంలో పెను కలకలం రేపింది. ఈ దుర్ఘటన దేశవ్యాప్తంగా ప్రయాణీకుల్లో తీవ్ర ఆందోళనను నింపింది. ఈ ప్రమాదం నేపథ్యంలోనే.. ప్రయాణ భద్రతపై దృష్టి సారించిన విమాన ప్రయాణీకులు పలు జాగ్రత్తలు తీసుకుంటున్నారు. ముఖ్యంగా కొందరు తమ టికెట్లను రద్దు చేసుకుంటుండగా.. మరికొందరు రీషెడ్యూల్ చేసుకుంటున్నారు. ఇంకొందరు అయితే టికెట్ బుక్ చేసుకునేముందే.. తాము ప్రయాణించబోయే విమానం మోడల్ ఏంటో స్పష్టంగా తెలియజేయాలని విమానయాన శాఖను గట్టిగా కోరుతున్నారు.

అహ్మదాబాద్‌లో ఎయిర్ ఇండియా బోయింగ్ 787 డ్రీమ్‌లైనర్ (AI-171) లండన్‌కు బయలుదేరిన కొద్దిసేపటికే కూలిపోయిన ఘటనలో 274 మంది ప్రాణాలు కోల్పోయారు. ఈ హృదయ విదారక సంఘటన ప్రయాణీకుల్లో నమ్మకాన్ని తీవ్రంగా దెబ్బతీసింది. ప్రమాదం జరిగిన తర్వాత గత వారం రోజుల్లోనే దాదాపు 20 శాతం మంది ప్రయాణీకులు తమ విమాన ప్రయాణాలను రద్దు చేసుకున్నట్లు తెలుస్తోంది. అలాగే మరికొంత మంది తమ ప్రయాణాలను రీషెడ్యూల్ చేసుకున్నట్లు సమాచారం. ఇది కేవలం ఆర్థిక నష్టాన్ని మాత్రమే చూపించట్లేదు.. ప్రజల మనస్సుల్లో ఏర్పడిన భద్రతా ఆందోళనలను కూడా వివరిస్తోంది.

ఇదిలా ఉండగా.. కొందరు ప్రయాణీకులు తమ భద్రతపై మరింత పారదర్శకతను కోరుకుంటున్నారు. తాము ఎక్కిన విమానం ఏ మోడల్, దాని భద్రతా రికార్డులు ఎలా ఉన్నాయి వంటి ప్రాథమిక వివరాలు తమకు తెలిస్తేనే ధైర్యంగా ప్రయాణించగలమని వాదిస్తున్నారు. అందుకోసం విమానయాన సంస్థలు తమ విమానాల మోడళ్లను టికెట్ బుకింగ్ సమయంలోనే ప్రదర్శించాలని డిమాండ్ చేస్తున్నారు. ఇలా చేయడం ద్వారా ప్రయాణీకులకు అన్ని విషయాలు తెలిస్తాయని, ఫలితంగా వారిలో ఉన్న భయం, ఆందోళన తగ్గుతాయని చెబుతున్నారు.

మరోవైపు ప్రమాదం జరిగిన బోయింగ్ 787-8 డ్రీమ్‌ లైనర్‌కు సంబంధించిన భద్రతా తనిఖీలను డీజీసీఏ (డైరెక్టరేట్ జనరల్ ఆఫ్ సివిల్ ఏవియేషన్) ముమ్మరం చేసింది. ఇప్పటికే ఎయిర్ ఇండియాకు చెందిన 33 డ్రీమ్‌ లైనర్లలో 24 విమానాలకు భద్రతా తనిఖీలు పూర్తయ్యాయి. అయితే ఈ తనిఖీలు, ఎయిర్‌స్పేస్ ఆంక్షల కారణంగా అనేక విమానాలు రద్దు కావడం లేదా ఆలస్యం కావడం జరుగుతోంది. ఈ పరిణామాలు విమానయాన రంగానికి కొత్త సవాళ్లను విసురుతున్నాయి. భవిష్యత్తులో ప్రయాణీకుల నమ్మకాన్ని తిరిగి పొందాలంటే.. విమానయాన శాఖ, ఎయిర్‌లైన్స్ సంస్థలు ఈ కొత్త డిమాండ్‌ను పరిగణనలోకి తీసుకోవాల్సి ఉంటుంది.