పెట్రోల్‌తో పాటు అన్నీ ఒకేచోట,,,ఇక అంబానీ-అదానీ బంకులు.. కీలక ఒప్పందం

దేశంలో ఇంధన విక్రయాల రంగంలో కీలక అడుగు పడింది. అదానీ గ్రూప్, జియో-బీపీల మధ్య కీలక ఒప్పందం కుదిరింది. దీంతో ఇంధన రిటైలింగ్‌ల అంబానీ, అదానీలు కలిసి పని చేయనున్నారు. ఎంపిక చేసిన బంకుల్లో ఈ రెండు కంపెనీలు పరస్పరం ఇంధన విక్రయాలు చేస్తాయి. ఈ ఒప్పందం కుదిరిన క్రమంలో ఇకపై అదానీ టోటల్ గ్యాస్ లిమిటెడ్ (ATGL)కు చెందిన విక్రయ శాలల్లో జియో- బీపీకి చెందిన పెట్రోల్, డీజిల్ విక్రయిస్తారు. అలాగే జియో- బీపీ పెట్రోల్ బంకుల్లో ఇకపై అదానీ టోటల్ గ్యాస్ సీఎన్‌జీని అందుబాటులోకి తీసుకురానున్నారు. అంటే ఒకే చోట పెట్రోల్, డీజిల్‌తో పాటు గ్యాస్ వంటివి అందుబాటులో ఉంటాయి.

రెండు పెద్ద సంస్థల మధ్య భాగస్వామ్యం వినియోగదారులకు అందించే సేవలను మరింత విస్తృతం చేస్తుందని, ఒకరి బలాలను ఒకరు ఉపయోగించుకునేందుకు అవకాశం కల్పిస్తుందని జియో- బీపీ ఛైర్మన్ సార్థక్ బెహురియా పేర్కొన్నారు. తమ కస్టమర్లకు నాణ్యమైన పెట్రోల్, డీజిల్, గ్యాస్ వంటి ఇంధనాలు అందించడమే ఉమ్మడి లక్ష్యమని అదానీ టోటల్ గ్యాస్ సీఈఓ సురేశ్ పి మంగ్లానీ పేర్కొన్నారు.

అదానీ గ్రూప్, ఫ్రాన్స్‌కు చెందిన టోటల్ ఎనర్జీస్ ఉమ్మడిగా అదానీ టోటల్ గ్యాస్ లిమిటెడ్ ఏర్పాటు చేసిన సంగతి తెలిసిందే. ఈ జాయింట్ వెంచర్‌కు దేశ వ్యాప్తంగా 650 సీఎన్‌జీ గ్యాస్ స్టేషన్లు ఉన్నాయి. అలాగే ముకేశ్ అంబానీ నేతృత్వంలోని రిలయన్స్ ఇండస్ట్రీస్ లిమిటెడ్‌, బ్రిటిషన్ ఇంధన రంగ దిగ్గజ సంస్థ బీపీలు కలిసి ఉమ్మడిగా ఏర్పాటు చేసిన సంస్థ జియో బీపీ. ఈ సంస్థకు దేశ వ్యాప్తంగా 2 వేలకు పైగా పెట్రోల్ బంకులు ఉన్నాయి.

తాజాగా అదానీ గ్రూప్, జియో- బీపీల మధ్య కుదిరిన ఒప్పందంతో ఇంధనల రంగంలో కీలక మార్పులు తీసుకురానుంది. గ్యాస్, పెట్రోల్, డీజిల్ వంటి ఇంధనాలు ఒకే చోట లభించనున్నాయి. ఈ భాగస్వామ్యం, ఇప్పటికే అందుబాటులో ఉన్న ఇంధన రిటైల్ అవుట్ లెట్లతో పాటు భవిష్యత్తులో కొత్తగా ఏర్పాటు చేయనున్నట్లు ఇంధన అవుట్ లెట్లకూ వర్తిస్తుందని ఇరు సంస్థలు ప్రకటించాయి.