పోలీసు రంగంలో కూడా ఏఐ సేవలు వినియోగానికి ప్రణాళికలు
Andhra Pradesh Telugu | Suryaa Desk | Published : Sun, Jun 29, 2025, 11:11 AM
కృత్రిమ మేధ (ఏఐ) ప్రపంచంలోని అన్ని రంగాల్లోనూ ప్రవేశిస్తోంది. ఆ అత్యాధునిక సాఫ్ట్వేర్ ప్రయోజనాలు అందిపుచ్చుకోవాలని ఏపీ పోలీసులు కూడా ప్రయత్నిస్తున్నారు. అందులో భాగంగా పోలీసు శాఖలో ప్రతీ ఒక్కరూ వినియోగించేలా ఏఐతో రూపొందించే ఆధునిక పరిజ్ఞానం రూపుదిద్దుకుంటోంది. కంప్యూటర్ కమాండ్లు తెలియకపోయినా కేవలం వాయిస్ కమాండ్స్ ఇస్తే సమగ్ర సమాచారం రియల్టైంలో ఇచ్చేలా ఐటీ రంగ నిపుణులు ప్రయత్నిస్తున్నారు. గుంటూరులోని ఆర్వీఆర్ ఇంజనీరింగ్ కళాశాలలో ఆర్టిఫీషియల్ ఇంటెలిజెన్స్ (ఏఐ) ఫర్ ఏపీ పోలీసు పేరుతో నిర్వహిస్తున్న మూడు రోజుల జాతీయ స్థాయి హ్యాకథాన్లో రెండో రోజు శనివారం పోలీసు ఉన్నతాధికారులు, ఐటీ నిపుణులు, విద్యార్థులు టెక్నికల్ సెషన్స్లో నిమగ్నమయ్యారు. బృందాలుగా విడిపోయి తమకు ఇచ్చిన యూజ్ కేస్ (డేటా సేకరణలో పోలీసులు ఎదుర్కొంటున్న సమస్యలు)ల్లో సవాళ్లను పరిష్కరించేందుకు మెదడుకు పనిచెప్పారు. పోలీసు శాఖ గుర్తించిన ఎనిమిది యూజ్ కేస్ లకు సంబంధించి సులభమైన సాఫ్ట్వేర్లను ఆదివారం మధ్యాహ్నం కల్లా ఇంజనీర్లు అందిస్తారని పోలీసు ఉన్నతాధికారులు ఆశిస్తున్నారు.
|
|