పొరుగు దేశం పాకిస్థాన్ మరోసారి బాంబు పేలుడుతో దద్దరిల్లింది

పొరుగు దేశం పాకిస్థాన్ మరోసారి బాంబు పేలుడుతో దద్దరిల్లింది. వాయవ్య పాకిస్థాన్‌లోని ఖైబర్ పఖ్తుంఖ్వా ప్రావిన్స్‌లో ఉగ్రవాదులు ఘాతుకానికి పాల్పడ్డారు. ప్రభుత్వ వాహనాన్ని లక్ష్యంగా చేసుకొని రోడ్డు పక్కన అమర్చిన బాంబును పేల్చడంతో ఒక సీనియర్ ప్రభుత్వ అధికారి సహా ఐదుగురు అక్కడికక్కడే మరణించారు. ఈ ఘటనలో మరో 11 మంది తీవ్రంగా గాయపడ్డారు.స్థానిక పోలీసులు వెల్లడించిన వివరాల ప్రకారం, ఉగ్రవాదులకు స్థావరంగా భావించే బజౌర్ జిల్లాలో బుధవారం ఈ దాడి జరిగింది. ప్రభుత్వ పనులపై వెళ్తున్న వాహనాన్ని లక్ష్యంగా చేసుకుని ఉగ్రవాదులు రిమోట్ కంట్రోల్ ద్వారా ఐఈడీని పేల్చారు. ఈ ఘటనలో అసిస్టెంట్ కమిషనర్ ఫైసల్ సుల్తాన్‌తో పాటు మరో నలుగురు ప్రాణాలు కోల్పోయారు. సమాచారం అందుకున్న వెంటనే భద్రతా బలగాలు, సహాయక బృందాలు ఘటనా స్థలానికి చేరుకున్నాయి. క్షతగాత్రులను సమీపంలోని ఆసుపత్రికి తరలించారు. వీరిలో పలువురి పరిస్థితి విషమంగా ఉందని, మృతుల సంఖ్య పెరిగే అవకాశం ఉందని జిల్లా పోలీసు చీఫ్ వకాస్ రఫిక్ తెలిపారు.ఈ దాడికి సంబంధించి ఇప్పటివరకు ఏ ఉగ్రవాద సంస్థ బాధ్యత ప్రకటించుకోనప్పటికీ, దీని వెనుక పాకిస్థానీ తాలిబన్  హస్తం ఉండవచ్చని అధికారులు అనుమానిస్తున్నారు. ఇటీవల కాలంలో ఈ ప్రాంతంలో భద్రతా సిబ్బంది, ప్రభుత్వ అధికారులే లక్ష్యంగా టీటీపీ వరుస దాడులకు పాల్పడుతోంది. ఆఫ్ఘనిస్థాన్‌లో తాలిబన్లు అధికారంలోకి వచ్చినప్పటి నుంచి పాకిస్థాన్‌లో టీటీపీ కార్యకలాపాలు మళ్లీ ఊపందుకున్నాయి.గత శనివారం ఇదే ప్రావిన్స్‌లోని ఉత్తర వజిరిస్థాన్‌లో సైనిక కాన్వాయ్‌పై జరిగిన ఆత్మాహుతి దాడిలో 16 మంది సైనికులు మరణించిన విషయం తెలిసిందే. ఆ దాడికి తామే బాధ్యులమని పాకిస్థానీ తాలిబన్‌ గ్రూప్ లోని హఫీజ్ గుల్ బహదూర్ వర్గం ప్రకటించింది. తాజా ఘటనతో పశ్చిమ సరిహద్దు ప్రాంతంలో భద్రతా వైఫల్యాలపై తీవ్ర ఆందోళన వ్యక్తమవుతోంది. ఈ ఏడాదిలోనే ఇప్పటివరకు జరిగిన ఉగ్రదాడుల్లో 290 మందికి పైగా ప్రాణాలు కోల్పోయారని, వీరిలో అత్యధికులు భద్రతా సిబ్బందేనని గణాంకాలు చెబుతున్నాయి.