ఏజెన్సీ వాసులకు మామిడి పండ్లు పంపిన డిప్యూటీ సీఎం పవన్ కళ్యాణ్

డిప్యూటీ సీఎం పవన్ కళ్యాణ్‌కు గిరిజనుల పట్ల ఎంతో ప్రేమ అనే సంగతి తెలిసిందే. ఇప్పటికే పలు సందర్భాల్లో గిరిజనులపై అభిమానం చాటుకున్న పవన్.. మరోసారి ఏజెన్సీ వాసులపై ప్రత్యేక అభిమానం చూపించారు. అల్లూరి సీతారామరాజు జిల్లా అరకులోయ నియోజకవర్గం పరిధిలోని కురిడి గ్రామస్థులకు జనసేనాని మామిడి పండ్లను పంపించారు. తన సొంత తోటలో సేంద్రియ పద్ధతిలో పండించిన మామిడి పండ్లను సిబ్బంది ద్వారా కురిడి వాసులకు పవన్ పంపిణీ చేశారు.

ఏప్రిల్ 7న అల్లూరి సీతారామరాజు జిల్లా డుంబ్రిగూడ మండలం పెదపాడులో ‘అడవితల్లి బాట’ కార్యక్రమానికి డిప్యూటీ సీఎం శ్రీకారం చుట్టారు. ఆ సమయంలో ఓ గిరిజన మహిళ చెప్పులు లేకుండా తనకు స్వాగతం పలకడానికి రావడాన్ని గమనించిన పవన్.. కొద్ది రోజుల అనంతరం పెదపాడు గ్రామస్థులకు 345 జతల పాదరక్షలు పంపించారు. డిప్యూటీ సీఎం తమపై చూపించిన అభిమానానికి గిరిజనులు ఫిదా అయ్యారు.

ఇప్పుడు కురిడి వాసులకు పవన్ తన తోటలో పండిన ఆర్గానిక్ మామిడి పండ్లను పంపించడంతో.. ఆ గ్రామస్థుల ఆనందానికి అవధుల్లేకుండా పోయాయి. పవన్ కళ్యాణ్ మాకోసం మామిడి పండ్లను పంపించారంటూ వారు మురిసిపోయారు. ఇంతకు ముందు ఓ సాధారణ వ్యక్తిగా మా ఊరు వచ్చిన జనసేనాని.. తమ గ్రామాభివృద్ధికి కృషి చేశారని.. ఇప్పుడు తమను గుర్తు పెట్టుకొని మామిడి పండ్లను పంపించడం ఆనందాన్ని ఇచ్చిందని కురిడి గ్రామ మహిళలు తెలిపారు.

మామూలుగానైతే ఎవరైనా తమ తోటలో సేంద్రియ పద్ధతిలో పండించిన మామిడి పండ్లను బాగా పరిచయస్తులకు, తమ ప్రాంతానికి చెందిన ప్రముఖులకు పంపించడం ద్వారా వారి పట్ల అభిమానాన్ని చాటుకుంటారు. కానీ పవన్ కళ్యాణ్ మాత్రం ఓ మారుమూల గిరిజన గ్రామ ప్రజలకు మామిడి పంపించి.. వారంతా తమ వారేననే సందేశాన్ని ఇచ్చారు. అలాగే సేంద్రీయ పద్ధతిలో మామిడి పండ్లను సాగు చేయడం గురించి ప్రజలు చర్చించుకునేలా చేశారు.

కురిడి గ్రామస్థులకు పవన్ పంపించిన మామిడి పండ్లు సాధారణ మామిడి పండ్ల కంటే చాలా పెద్దగా ఉండటం ఏజెన్సీ వాసులను ఆశ్చర్యపరిచింది. ఇంత పెద్ద సైజులో మామిడి పండ్లను ఎలా పండించొచ్చనే దిశగా మామిడి ఏజెన్సీ రైతులను పవన్ ఆలోచింపజేశారని చెప్పొచ్చు. ఏప్రిల్ 8న ఏజెన్సీలో పర్యటించిన సమయంలోనే సేంద్రీయ పద్ధతిలో మామిడి సాగు చేయాలని గిరిజనులకు పవన్ కళ్యాణ్ పిలుపునిచ్చారు. పవన్ కళ్యాణ్ డిప్యూటీ సీఎంగా తీరిక లేకుండా ఉంటూనే.. వీలు చూసుకొని సినిమాల్లోనూ నటిస్తున్నారు. ఆయన నటించిన హరిహర వీరమల్లు ట్రైలర్ నేడు (జూలై 3న) రిలీజైంది. ఈ ట్రైలర్ మూవీపై అంచనాలను పెంచేసింది. ఈ సినిమా ఈ నెల 24న రిలీజ్ కానుంది.