బీజేపీ, డీఎంకే పార్టీలకు సమాన దూరంగా టీవీకే,,,పొత్తుపై తేల్చేసిన విజయ్

వచ్చే ఏడాది జరగబోయే తమిళనాడు అసెంబ్లీ ఎన్నికల్లో పొత్తులు, వ్యూహాలపై కోలీవుడ్ నటుడు, తమిళ వెట్రి కళగం (TVK) అధినేత విజయ్‌ శుక్రవారం కీలక ప్రకటన చేశారు. వచ్చే ఎన్నికల్లో ఏ పార్టీతో పొత్తు ఉండబోదని, ఒంటరిగానే బరిలోకి దిగుతున్నట్టు తేల్చిచెప్పారు. టీవీకే ముఖమ్యంత్రి అభ్యర్థిగా విజయ్‌ను ఆ పార్టీ అధికారికంగా ప్రకటించింది. ఈ మేరకు పార్టీ రాష్ట్ర కార్యనిర్వాహక కమిటీ సమావేశంలో ప్రత్యేక తీర్మానాన్ని ఆమోదించారు. చెన్నైలోని పార్టీ ప్రధాన కార్యాలయంలో విజయ్ ఆధ్వర్యంలో రాష్ట్ర కార్యవర్గ సమావేశం జరిగింది. ఈ సమావేశంలో అనేక కీలక తీర్మానాలు చేశారు. అధికార డీఎంకే (DMK)తో కానీ, బీజేపీ (BJP)తో కానీ ఎటువంటి పొత్తు ఉండదని స్పష్టంగా ప్రకటించారు. ఆగస్ఠులో రాష్ట్రస్థాయిలో విస్తృత సదస్సు నిర్వహించనున్నట్లు ప్రకటించారు. గ్రామస్థాయిలో పబ్లిక్ మీటింగ్‌లు నిర్వహించి పార్టీ సిద్ధాంతాలను ప్రజలకు వివరించనున్నారు. అధినేత విజయ్.. వచ్చే సెప్టెంబరు నుంచి ఎన్నికల ప్రచారం మొదలుపెడుతున్నట్టు తెలిపింది.

హిందీ భాషా ఒత్తిడిపై ఘాటుగా స్పందన

కేంద్ర హోంమంత్రి అమిత్ షా ఆంగ్ల భాషను ఉద్దేశించి చేసిన వ్యాఖ్యలపై సమావేశంలో తీవ్రంగా మండిపడ్డారు. ఈ వ్యాఖ్యలను ‘దురుద్దేశపూరితమైన.. తమిళనాడు ద్విభాషా విధానంపై ప్రత్యక్ష దాడిగా’ అభివర్ణించారు. హిందీ, సంస్కృత భాషలని తమిళనాడుపై బలవంతంగా రుద్దే ప్రయత్నాలను టీవీకే ఖండించింది. ‘ఇది భాషా మౌలిక హక్కులపై దాడి’ అని పేర్కొంది. రాజకీయాల్లోకి ప్రవేశించిన విజయ్.. తన చివరి సినిమా గురించి కూడా ప్రకటన చేశారు. ప్రస్తుతం నటిస్తోన్న జననాయగన్ తన చివరి సినిమా అని విజయ్ ప్రకటించారు.

కేంద్ర ఎన్నికల సంఘం తీసుకుంటున్న ఓటర్ల రివ్యూ ప్రక్రియను తీవ్రంగా ఖండించింది. అల్పసంఖ్యాకుల ఓట్లను తగ్గించే కుట్రలో భాగమని ఆరోపించింది. ఈ చర్యలు బీజేపీకి అనుకూలంగా ఓటు శాతాన్ని పెంచే కుట్రగా అభివర్ణించింది. ‘ప్రజాస్వామ్యానికి విరుద్ధంగా ఉన్న ఈ చర్యలను తాము వ్యతిరేకిస్తాం’ అని పార్టీ స్పష్టం చేసింది. అసెంబ్లీ ఎన్నికల దృష్ట్యా విజయ్ నేతృత్వంలో పార్టీ పలు కార్యక్రమాలు, ప్రజలను కలుసుకోవడం, యువతను ఆకర్షించే కార్యక్ర‌మాలు చేపట్టనున్నట్లు పార్టీ తెలిపింది. వచ్చే అసెంబ్లీ ఎన్నికల్లో టీవీకే వ్యూహకర్తగా ప్రశాంత్ కిశోర్‌ను విజయ్ నియమించుకున్న విషయం తెలిసిందే. మహాబలిపురంలో జరిగిన టీవీకే వార్షికోత్సవ సభలో ఈ విషయాన్ని విజయ్ ప్రకటించారు. ఇక, తమిళనాడు ఎన్నికల్లో అధికార డీఎంకే, ప్రతిపక్ష బీజేపీలకు వ్యతిరేకంగా బలమైన రాజకీయ శక్తిగా నిలబడేందుకు ప్రయత్నాలు చేస్తున్న టీవీకే..పీకే వ్యూహాలతో ఏ మేరకు లబ్ది పొందుతుందో మరో ఆరు నెలల్లో తేలిపోనుంది.