కేజ్రీవాల్ వ్యాఖ్యలకి స్పందించిన బీజేపీ
national | Suryaa Desk | Published : Thu, Jul 10, 2025, 12:30 PM
తన పాలనకు గానూ తనకు నోబెల్ బహుమతి ఇవ్వాలని ఆమ్ ఆద్మీ పార్టీ (ఆప్) అధినేత, ఢిల్లీ మాజీ ముఖ్యమంత్రి అరవింద్ కేజ్రీవాల్ చేసిన వ్యాఖ్యలు రాజకీయ దుమారాన్ని రేపాయి. ఆయన వ్యాఖ్యలపై బీజేపీ తీవ్రస్థాయిలో మండిపడింది. చండీగఢ్లో మంగళవారం జరిగిన 'ది కేజ్రీవాల్ మోడల్' పుస్తకావిష్కరణ కార్యక్రమంలో కేజ్రీవాల్ ఈ వ్యాఖ్యలు చేశారు."ఢిల్లీలో లెఫ్టినెంట్ గవర్నర్ సహా ఎన్నో శక్తులు మా ప్రభుత్వాన్ని అడ్డుకున్నా, మేము అద్భుతంగా పనిచేశాం. ఇన్ని అడ్డంకుల మధ్య ఇంత గొప్ప పాలన అందించినందుకు నాకు నోబెల్ బహుమతి ఇవ్వాలి" అని కేజ్రీవాల్ అన్నారు. ఈ వ్యాఖ్యలపై బీజేపీ ఢిల్లీ అధ్యక్షుడు వీరేంద్ర సచ్దేవా స్పందిస్తూ.. "అసమర్థత, అరాచకం, అవినీతి విభాగాల్లో నోబెల్ బహుమతి ఉండుంటే కేజ్రీవాల్కు తప్పకుండా వచ్చేది" అని ఎద్దేవా చేశారు. లిక్కర్ స్కామ్, బస్సుల్లో పానిక్ బటన్లు, తరగతి గదుల నిర్మాణం, ముఖ్యమంత్రి నివాసమైన 'షీష్ మహల్' వివాదం వంటి ఎన్నో కుంభకోణాలు కేజ్రీవాల్ హయాంలో జరిగాయని ఆయన ఆరోపించారు.
|
|