తిరుమల తరహాలో,,,,ఒంటిమిట్ట కోదండరామస్వామి ఆలయంలోనూ నిత్యాన్నదాన పథకం

దేవాలయాలకు, ఆధ్యాత్మిక ప్రదేశాలకు ఆంధ్రప్రదేశ్ చిరునామా.. చారిత్రక, సాంస్కృతిక వైభవాన్ని చాటిచెప్పే ఆలయాలు, ప్రదేశాలు ప్రతి జిల్లాలోనూ కనిపిస్తాయి. దేవాలయాల విషయానికి వస్తే.. ఏపీలోని ప్రతి జిల్లాలోనూ ఓ ప్రముఖ ఆలయం ఉంటుంది. ఈ దేవాలయాలను నిత్యం ఎంతో మంది భక్తులు దర్శించుకుంటూ ఉంటారు. అలాంటి ఆలయాల్లో ఒకటి ఒంటిమిట్టలోని కోదండరామస్వామి ఆలయం. ఈ నేపథ్యంలో ఒంటిమిట్ట కోదండరామ స్వామి ఆలయంలోనూ తిరుమల తరహాలో భక్తులకు అన్నప్రసాదం అందించాలని సీఎం నారా చంద్రబాబు నాయుడు ఆదేశించిన సంగతి తెలిసిందే. ఈ క్రమంలో ఒంటిమిట్ట కోదండరామస్వామి ఆలయంలో పూర్తి స్థాయిలో అన్నప్రసాద వితరణకు చర్యలు తీసుకోవాలని టీటీడీ ఈవో శ్యామలరావు అధికారులను ఆదేశించారు. ఈ విషయమై టీటీడీ పరిపాలన భవనంలో సోమవారం టీటీడీ ఈవో శ్యామలరావు సమీక్షా సమావేశం నిర్వహించారు.

సీఎం చంద్రబాబు ఆదేశాల ప్రకారం.. తిరుమల తరహాలో ఒంటిమిట్ట ఆలయంలోనూ భక్తులకు అన్నప్రసాదాలు పంపిణీ చేయాలని టీటీడీ ఈవో అధికారులకు స్పష్టం చేశారు. ఇందుకోసం ఒంటిమిట్ట కోదండరామస్వామి ఆలయం వద్ద ప్రస్తుతానికి జర్మన్ షెడ్స్ ఏర్పాటు చేయాలని సూచించారు. ఆగస్ట్ నుంచి ఒంటిమిట్టలో భక్తులకు పూర్తిస్థాయిలో అన్నప్రసాదాలు ఏర్పాటు చేసేందుకు ఇంజనీరింగ్, అన్నప్రసాదాల విభాగం అధికారులు సమన్వయం చేసుకోవాలని టీటీడీ ఈవో శ్యామలరావు సూచించారు. అన్నప్రసాదాలు అందించేందుకు అవసరమైన సదుపాయాలు, వంట సామాగ్రి, సిబ్బందిని ఏర్పాటు చేసుకోవాలని ఆదేశించారు.

మరోవైపు ఏపీలోని అన్ని ప్రముఖ ఆలయాల్లోనూ నిత్యాన్నదాన పథకం అమలు చేయాలని సీఎం నారా చంద్రబాబు నాయుడు ఇటీవల దేవాదాయ శాఖపై జరిగిన సమీక్షలో అధికారులను ఆదేశించారు. తిరుమల తరహాలో ప్రస్తుతం విజయవాడ, శ్రీశైలం, అన్నవరం, శ్రీకాళహస్తి, కాణిపాకం, ద్వారకా తిరుమల, సింహాచలం ఆలయాలలో భక్తులను నిత్యాన్నదానం అందిస్తున్నారు. అయితే వీటితో పాటుగా మరో 16 ప్రధాన ఆలయాల్లోనూ అన్నదానం అమలు చేయాలని చంద్రబాబు ఆదేశించారు. అన్నప్రసాదం రుచి, నాణ్యత, పరిశుభ్రతలో రాజీ ఉండకూడదని అన్నారు.

ఒంటిమిట్ట, అహోబిలం, రాఘవేంద్రస్వామి మఠం, యాగంటి, ద్రాక్షారామం, అంతర్వేది, శ్రీ కూర్మం, అరసవిల్లి సూర్యనారాయణ దేవాలయం, పరిటాల ఆంజనేయస్వామి ఆలయం, మంగళగిరి పానకాల నరసింహస్వామి ఆలయం, లేపాక్షి, నెల్లూరు రంగనాథ స్వామి ఆలయం, పెన్నా అహోబి, అమరావతి అమరలింగేశ్వర స్వామి దేవాలయం ఇలా ప్రముఖ ఆలయాలు ఎన్నో ఉన్నాయి.