విడాకుల కేసులో ఫోన్ సీక్రెట్ రికార్డింగులూ సాక్ష్యాలే.. సుప్రీంకోర్టు

విడాకుల కేసుకు సంబంధించిన సాక్ష్యాలపై సర్వోన్నత న్యాయస్థానం కీలక వ్యాఖ్యలు చేసింది. భాగస్వామి టెలిఫోన్ సంభాషణల సీక్రెట్‌ రికార్డింగ్‌లను సాక్ష్యాలుగా పరిగణించొచ్చని స్పష్టం చేసింది. దంపతుల మధ్య వివాహ బంధం విచ్ఛిన్నమైందనే విషయాన్ని ఆ రికార్డింగులు స్పష్టం చేస్తాయని సుప్రీంకోర్టు అభిప్రాయపడింది. ఈ కేసులో పంజాబ్‌, హరియాణా హైకోర్టు గతంలో ఇచ్చిన తీర్పును పక్కనబెట్టింది. వ్యక్తిగత గోప్యత హక్కు ఉల్లంఘన అంటూ హైకోర్టు ఇచ్చిన తీర్పును ఈ మేరకు జస్టిస్ బీవీ నాగరత్న, జస్టిస్ సతీశ్ చంద్ర శర్మల ధర్మాసనం ఆదేశాలు వెలువరించింది.

‘‘దాంపత్య జీవితంలో ఇద్దరూ ఒకరిపై ఒకరు నిఘా పెట్టారంటే.. వారి వైవాహిక సంబంధం ఎంతగా దెబ్బతిందో అర్ధం చేసుకోవచ్చు’’ అని జస్టిస్ నాగరత్న. వ్యాఖ్యానించారు. ‘వ్యక్తిగత గోప్యత హక్కు మౌలికమైనదైనా, భార్యాభర్తల విడాకుల విషయంలో వాస్తవాలను తెలుసుకోడానికి కొన్ని సందర్భాల్లో ఇలాంటి ఆధారాలు అవసరమవుతాయి’ అని కోర్టు పేర్కొంది.

కేసు వివరాల్లోకి వెళ్తే పంజాబ్‌లోని బఠిండాకు చెందిన వ్యక్తి.. విడాకులు కోరుతూ కుటుంబ న్యాయస్థానంలో పిటిషన్ వేశాడు. భార్య తన పట్ల క్రూరంగా ప్రవర్తిస్తోందని ఆరోపించిన ఆయన.. అందుకు ఆధారంగా వారి మధ్య జరిగిన టెలిఫోన్ సంభాషణల రికార్డుల సీడీని సమర్పించాడు. ఫ్యామిలీ కోర్టు ఈ సాక్ష్యాన్ని అనుమతించింది. దీంతో సదరు భార్య హైకోర్టును ఆశ్రయించి.. తన వ్యక్తిగత గోప్యత హక్కులు ఉల్లంఘనేనని వాదించింది. ఆమె వాదనలతో ఏకీభవించిన పంజాబ్ హర్యానా హైకోర్టు"ఒక వ్యక్తి అనుమతి లేకుండా ఫోన్ సంభాషణ రికార్డు చేయడం రాజ్యాంగ గోప్యత హక్కుకు భంగం కలిగించడమేనని పేర్కొంది. ఈ సంభాషణలు ఎలాంటి ఒత్తిడిలో, ఏ సందర్భంలో జరిగినవో స్పష్టంగా చెప్పలేమని అభిప్రాయపడింది. వీటిని సాక్ష్యాలుగా పరిగణించలేమని తేల్చిచెప్పింది. దీనిని భర్త సుప్రీంకోర్టులో సవాల్ చేయడంతో విచారణ చేపట్టింది.

‘‘భార్యాభర్తల మధ్య ఫోన్ సంభాషణల రికార్డింగ్‌లను కోర్టులో సాక్ష్యంగా పరిగణిస్తే వైవాహిక బంధాలు ప్రమాదంలో పడతాయని, ఒకరిపై ఒకరు నిఘా పెట్టడాన్ని ప్రోత్సహించినట్లు అవుతుందని వారి వాదన. కానీ, పరస్పర నమ్మకం లేనప్పుడు ఆ రికార్డింగ్‌లను సాక్ష్యంగా పరిగణించవచ్చు’’సుప్రీం ధర్మాసనం స్పష్టం చేసింది. దీనిపై హైకోర్టు ఇచ్చిన ఉత్తర్వులను పక్కనబెట్టి.. ఫ్యామిలీ కోర్టు తమ విచారణ కొనసాగించొచ్చని తెలిపింది.