మహిళ కడుపులో టూత్‌బ్రష్.. అసలెలా లోపలికి వెళ్లిందంటే

కోల్‌కతాలో ఒక అరుదైన ఘటన చోటుచేసుకుంది. ఓ 37 ఏళ్ల వయసు ఉన్న మహిళ తీవ్రమైన కడుపు నొప్పితో ఆస్పత్రికి వెళ్లింది. దీంతో ఆమెను పరీక్షించిన వైద్యులు వెంటనే స్కానింగ్ చేయించుకోవాలని చెప్పారు. అలా చేయించగా.. ఆమె కడుపులో టూత్ బ్రష్ ఉండడం చూసి షాక్ అయ్యారు. అసలు అదెలా లోపలికి వెళ్లిందో తెలుసుకోక ముందే.. దాన్ని తొలగించి ఆమెను కాపాడే ప్రయత్నం చేశారు. ముఖ్యంగా కడుపులో ఇరుక్కుపోయిన టూత్‌బ్రష్‌ను గంట పాటు శ్రమించి విజయవంతంగా బయటికి తీశారు. ఎట్టకేలకు ఆమె ప్రాణాలను కాపాడారు. మరి ఇదంతా ఎక్కడ జరిగిందో మనం ఇప్పుడు తెలుసుకుందామా..?

వివరాల్లోకి వెళ్తే.. పశ్చిమ బెంగాల్‌లోని కోల్‌కతాకు చెందిన ఓ 37 ఏళ్ల మహిళ తీవ్రమైన కడుపు నొప్పి, శ్వాస తీసుకోవడంలో ఇబ్బంది, ఛాతీ నొప్పి వంటి సమస్యలతో బాధ పడుతోంది. వాటిని ఎలాగైనా సరే తగ్గించుకోవాలని ఇటీవలే భర్తతో కలిసి ఆమె ఆసుపత్రికి వెళ్లారు. ఈక్రమంలోనే ఆమెను పరీక్షించిన వైద్యులు తొలుత ఛాతీ ఎక్స్-రే తీశారు. అయితే ఎక్స్-రేలో ఎటువంటి వస్తువు కనిపించకపోవడంతో.. వైద్యులు గందరగోళానికి గురయ్యారు. పరిస్థితి తీవ్రంగా ఉండటంతో.. సీనియర్ గ్యాస్ట్రోఎంటరాలజిస్ట్ డాక్టర్ సంజయ్ బాసు నేతృత్వంలోని వైద్య బృందం అత్యవసరంగా అప్పర్ జీఐ ఎండోస్కోపీని నిర్వహించాలని నిర్ణయించింది.

  ఎండోస్కోపీని నిర్వహించగా.. అందరూ ఆశ్చర్యపోయేలా ఆ మహిళ కడుపులో ఒక టూత్‌బ్రష్ లోతుగా ఇరుక్కుని ఉన్నట్లు కనుగొన్నారు. టూత్‌బ్రష్ పొడవుగా ఉండటం, కడుపు లోపల ఉండటం వల్ల దానిని బయటకు తీయడం అత్యంత క్లిష్టమైన ప్రక్రియగా మారింది. టూత్‌బ్రష్‌ను బయటకు తీసే క్రమంలో లోపలి అవయవాలకు గాయాలు అయ్యే ప్రమాదం కూడా ఉంది. అయినప్పటికీ.. వైద్య బృందం ఎండోస్కోప్ ద్వారా స్నేర్ అనే పరికరాన్ని ఉపయోగించి, అత్యంత జాగ్రత్తగా టూత్‌బ్రష్‌ను బయటికి తీసేందుకు ప్రయత్నించింది. ముఖ్యంగా ఓ సన్నని దారాన్ని లోపలికి పంపి బ్రష్‌కు ముడి వేశారు. ఆపై దాన్ని మెళ్లిగా పైకి లాగి.. టూత్‌బ్రష్‌ను విజయ వంతంగా తొలగించగలిగారు.

ఈ క్లిష్టమైన ఆపరేషన్ తర్వాత ఆ మహిళ ప్రస్తుతం కోలుకుంటున్నారు. ఆమె ఆరోగ్య పరిస్థితి నిలకడగా ఉందని ఆసుపత్రి వర్గాలు తెలిపాయి. సాధారణంగా ఇలాంటి వస్తువులు కడుపులోకి వెళ్లినప్పుడు శస్త్రచికిత్స అవసరం పడుతుందని అన్నారు. కానీ ఎండోస్కోపీ ద్వారా టూత్‌బ్రష్‌ను తొలగించడం అనేది వైద్య రంగంలో ఒక అద్భుతంగా భావిస్తున్నామని.. ఇది విజయవంతం కావడం మరింత సంతోషంగా అనిపిస్తోందని వైద్యులు తెలిపారు.

అలాగే మహిళ ఏం మింగేశారనేది అస్సలే చెప్పలేదని.. ఎండోస్కోపీ చేశాకే అసలు విషయం బయటపడిందన్నారు. సాధారణంగా చిన్న పిల్లలు వస్తువులు మింగడం చూశాం కానీ.. ఇంత పెద్దామె, అది కూడా ఓ ‌బ్రష్‌ను మింగడం చరిత్రలో తొలిసారి అని వెల్లడించారు. మరోవైపు మహిళను ఇదే విషయమై ప్రశ్నించగా.. ఆమె చప్పుడు చేయలేదు. ఎలా, ఎప్పుడు మింగారనగా.. తనకు అసలు ఆ విషయమే గుర్తు లేదని పేర్కొన్నారు.