యువకుడ్ని దొంగ అనుకుని చితకబాదారు

ఎర్కకపోయి ఇరుక్కుపోవడం అంటే ఇదేనేమో.. పాపం ప్రియురాలు రమ్మని పిలిచిందని వెళ్లిన ఆ యువకుడికి చేదు అనుభవం ఎదురైంది. దొంగగా భావించి స్థానికులు చితకబాదారు.. నేను దొంగను కాదు బాబోయ్ అని మొత్తుకున్నా వినకుండా స్తంభానికి కట్టేసి కొట్టారు. అప్పుడు ప్రియురాలి కోసం వచ్చానంటూ అసలు మ్యాటర్ చెప్పేసరికి అందరూ నవ్వుకున్నారు. పెనుమూరుకు చెందిన యువకుడు తిరుపతి జిల్లా చంద్రగిరి మండలం మల్లయ్యపల్లి వచ్చాడు. స్థానికంగా ఉంటున్న యువతిని కలిసేందుకు అర్ధరాత్రి వెళ్లాడు. మనోడు గ్రామంలోకి రాగానే కుక్కలు పెద్దగా అరిచాయి.

కుక్కల అరుపులు విని స్థానికులు బయటకు వచ్చి చూస్తే యువకుడు కనిపించాడు.. అందరూ కలిసి అతడి వెంటపడ్డారు. మనోడు ముళ్లపొదల మధ్యకు వెళ్లి దాక్కున్నాడు.. స్థానికులు గాలించి అతడ్ని పట్టుకుని స్తంభానికి కట్టేసి చితకబాదారు. వెంటనే పోలీసులకు సమాచారం ఇవ్వగా వారు ఊరికి చేరుకున్నారు.. వారు ఎందుకొచ్చావని ఆరా తీస్తే అసలు సంగతి చెప్పాడు. తాను గ్రామానికి చెందిన యువతిని కలిసేందుకు వచ్చినట్లు చెప్పాడు.. ఆమె రమ్మని చెప్పడంతో వచ్చినట్లు వివరించాడు. పోలీసులు ఆ యువకుడి తల్లిదండ్రుల్ని పిలిచి కౌన్సిలింగ్ ఇచ్చి ఆస్పత్రికి పంపించారు. పాపం యువతిని కలుద్దామని వస్తే ఇలా బుక్కైపోయి తన్నులు తినాల్సి వచ్చింది.

చిత్తూరు జిల్లాలో 16 ఏళ్ల బాలిక ఒక యువకుడిని ప్రేమించి పెళ్లి చేసుకుని పరారైంది. కార్వేటినగరం మండలానికి చెందిన బాలికకు తల్లిదండ్రులు లేరు. తిరుపతి బాలికల సంరక్షణ కేంద్రంలో ఉంటోంది.. బాలిక అక్క బీఎన్‌ఆర్‌పేటలో నివాసం ఉంటోంది. అయితే ఆ బాలిక అప్పుడప్పుడు అక్క ఇంటికి వెళ్లేది. అయితే బీఎన్‌ఆర్‌పేటలో యాదమరి మండలానికి చెందిన 23 ఏళ్ల యువకుడు ఒక దుకాణం నడుపుతున్నాడు.. ఈ క్రమంలో అతడికి బాలిక పరిచయమై ప్రేమగా మారింది. అయితే బాలిక సంరక్షణ కేంద్రం నుంచి పారిపోయింది.. యువకుడిని పెళ్లి చేసుకుని వెళ్లిపోయింది. ఈ విషయం సంరక్షణ కేంద్రం సిబ్బందికి తెలియడంతో పోలీసులకు ఫిర్యాదు చేయడంతో బెంగళూరులో ఉన్నట్లు గుర్తించి బీఎన్‌ఆర్‌పేట తీసుకొచ్చారు. వైద్య పరీక్షల కోసం చిత్తూరు ఆస్పత్రి చేర్పించగా.. పోలీసులు యువకుడిపై కేసు నమోదు చేశారు.