ట్రంప్‌కు నోబెల్ బహుమతి ఇవ్వాలా.. భారత్ స్పందన ఇదే

అగ్రరాజ్యం అమెరికా అధ్యక్షుడు డొనాల్డ్ ట్రంప్‌నకు నోబెల్ శాంతి బహుమతి ఇవ్వాలంటూ వైట్ హౌస్ చేసిన ప్రతిపాదనపై భారత్ దౌత్యపరమైన వ్యూహాత్మక స్పందనను వెలువరించింది. ఈ విషయంపై నేరుగా వ్యాఖ్యానించడానికి బదులుగా.. భారత విదేశాంగ మంత్రిత్వ శాఖ అధికార ప్రతినిధి రణధీర్ జైస్వాల్.. "ఈ ప్రశ్నను వైట్ హౌస్‌నే అడగండి" అని సూచించడం అంతర్జాతీయ వేదికపై చర్చకు దారితీసింది. ఇది ఒక సాధారణ సమాధానంలాగానే కనిపించినప్పటికీ.. దీని వెనుక భారత్ యొక్క గట్టి వైఖరి స్పష్టంగా వ్యక్తమైంది.

వైట్ హౌస్ మీడియా కార్యదర్శి కరోలిన్ లివెట్.. తన ప్రకటనలో ట్రంప్ జనవరిలో తిరిగి అధికారంలోకి వచ్చిన తర్వాత ప్రపంచవ్యాప్తంగా అనేక వివాదాలను పరిష్కరించారని పేర్కొన్నారు. ఈజిప్ట్-ఇథియోపియా మొదలుకుని తాజాగా థాయ్‌లాండ్-కంబోడియాల మధ్య యుద్ధాన్ని ఆపి శాంతి నెలకొల్పేందుకు తీవ్రంగా కృషి చేశారని వివరించారు. అలాగే భారత్, పాకిస్థాన్ మధ్య కాల్పుల విరమణ ఒప్పందం కూడా ఉందని ఆమె స్పష్టం చేశారు. అయితే ఈ కాల్పుల విరమణకు తానే మధ్యవర్తిత్వం వహించానని ట్రంప్ తరచూ చేసే వాదనను న్యూఢిల్లీ ఇప్పటికే పలుమార్లు గట్టిగా ఖండించింది.

ఈ నేపథ్యంలోనే భారత విదేశాంగ శాఖ ప్రతినిధి రణధీర్ జైశ్వాల్ స్పందించారు. ట్రంప్‌నకు నోబెల్ బహుమతి ఇవ్వాలా వద్దా అనే ప్రశ్నను అడగ్గానే.. వైట్‌హౌస్‌నే ఆ ప్రశ్న అడగాలని పేర్కొన్నారు. ఇదంతా వైట్ హౌస్ అంతర్గత రాజకీయాలకు సంబంధించిన వ్యవహారమని, ఇందులో భారత్‌కు ఎటువంటి సంబంధం లేదని చెప్పకనే చెప్పారు. దీనిపై ఒక్కొక్కరూ ఒక్కో విధంగా స్పందిస్తున్నారు. మంచి పని చేశారని కొందరు, ఆయనకేమిస్తే మనకేంటంటూ మరికొందరు నెటిజెన్లు కామెంట్లు చేస్తున్నారు.

మరోవైపు ట్రంప్‌నకు నోబెల్ శాంతి బహుమతి ఇవ్వాలనే ప్రతిపాదనను ఇజ్రాయెల్ ప్రధానమంత్రి బెంజమిన్ నెతన్యాహు, పాకిస్థాన్ కూడా మద్దతు పలకడం ఈ వ్యవహారాన్ని మరింత చర్చనీయం చేసింది. ఒకవేళ ట్రంప్ ఈ అవార్డును గెలుచుకుంటే.. ఈ గౌరవాన్ని పొందిన ఐదో అమెరికా అధ్యక్షుడు అవుతారు. ఈ నామినేషన్లు ట్రంప్‌కు రాజకీయంగా, అంతర్జాతీయంగా మైలేజీని పెంచే అవకాశం ఉన్నప్పటికీ.. భారత్ వంటి దేశాలు ఈ వాదనలను అంగీకరించకపోవడంతో అందరిలోనూ అనుమానాలు మొదలు అయ్యాయి.