విజయవాడ-చెన్నై హైవేపై భారీగా ఎర్రచందనం పట్టివేత
Andhra Pradesh Telugu | Suryaa Desk | Published : Thu, Aug 21, 2025, 07:11 PM
ఆంధ్రప్రదేశ్లో ఎర్రచందనం అక్రమ రవాణాకు అడ్డుకట్ట వేసేందుకు అధికారులు చేపట్టిన చర్యలు సత్ఫలితాలనిస్తున్నాయి. తాజాగా, విజయవాడ-చెన్నై జాతీయ రహదారిపై భారీ ఎత్తున ఎర్రచందనం దుంగలను తరలిస్తున్న ముఠా గుట్టును రెడ్ శాండర్స్ యాంటీ-స్మగ్లింగ్ టాస్క్ఫోర్స్ బృందం రట్టు చేసింది. ఈ ఆపరేషన్లో కోట్ల విలువ చేసే ఎర్రచందనం దుంగలను స్వాధీనం చేసుకుని, ఒక స్మగ్లర్ను అరెస్ట్ చేశారు.టాస్క్ఫోర్స్ అధికారులు ప్రకాశం జిల్లా కె. బిట్రగుంట గ్రామం వద్ద వాహనాల తనిఖీలు నిర్వహిస్తున్నారు. ఈ క్రమంలో అనుమానాస్పదంగా వస్తున్న ఒక లారీని ఆపి సోదా చేయగా, అందులో అక్రమంగా తరలిస్తున్న ఎర్రచందనం దుంగలు బయటపడ్డాయి. లారీలో మొత్తం 83 దుంగలు ఉన్నట్లు అధికారులు గుర్తించారు. వాటి విలువ అంతర్జాతీయ మార్కెట్లో దాదాపు రూ. 2 కోట్లు ఉంటుందని అంచనా వేశారు.టాస్క్ఫోర్స్ పోలీసులు, లారీతో పాటు అందులో ఉన్న ఎర్రచందనం దుంగలను సీజ్ చేశారు. ఈ అక్రమ రవాణాకు పాల్పడుతున్న స్మగ్లర్ను అదుపులోకి తీసుకుని విచారణ జరుపుతున్నారు. ఈ భారీ ఆపరేషన్ను విజయవంతంగా పూర్తి చేసిన రెడ్ శాండర్స్ టాస్క్ఫోర్స్ బృందాన్ని డీజీపీ హరీశ్ కుమార్ గుప్తా ప్రత్యేకంగా అభినందించారు. స్మగ్లర్లను చాకచక్యంగా పట్టుకున్న సిబ్బందిని ఆయన ప్రశంసించారు.
|
|