MEGA DSC-2025: పారదర్శకంగా, విజయవంతంగా పరీక్షలు.. మెరిట్ జాబితా ఈ నెల 22న విడుదల

MEGA DSC-2025 పరీక్షలు నిర్దిష్ట షెడ్యూల్ ప్రకారం, అత్యంత సాంకేతిక భద్రతతో, పారదర్శకంగా, పకడ్బందీగా విజయవంతంగా నిర్వహించినట్లు మెగా DSC కన్వీనర్ ఎం.వి. కృష్ణారెడ్డి ప్రకటించారు. అభ్యర్థుల సౌకర్యార్థం టెట్ మార్కుల సవరణకు తగిన సమయం కల్పించగా, స్కోర్ కార్డుల విడుదల తర్వాత కూడా ప్రతిభావంతులైన అభ్యర్థులకు నష్టం జరగకుండా చివరి అవకాశం ఇచ్చినట్లు ఆయన తెలిపారు. స్పోర్ట్స్ కోటా మెరిట్ జాబితా సిద్ధమైన నేపథ్యంలో, ఈ నెల 22న మెరిట్ లిస్ట్‌ను DSC అధికారిక వెబ్‌సైట్‌తో పాటు జిల్లా విద్యాధికారి వెబ్‌సైట్‌లో అందుబాటులో ఉంచనున్నట్లు ఆయన వెల్లడించారు.
నియామక ప్రక్రియలో భాగంగా ‘జోన్ ఆఫ్ కన్సిడరేషన్’లోకి వచ్చిన అభ్యర్థులకు వ్యక్తిగత లాగిన్ ద్వారా కాల్ లెటర్ అందజేయబడుతుంది. వీరు ఒరిజినల్ సర్టిఫికెట్లు, ఇటీవలి కుల ధ్రువీకరణ పత్రం, గజిటెడ్ అధికారి ధ్రువీకరించిన మూడు సెట్ల జిరాక్స్ కాపీలు, ఐదు పాస్‌పోర్ట్ సైజు ఫోటోలతో సర్టిఫికెట్ వెరిఫికేషన్‌కు హాజరు కావాలి. వెరిఫికేషన్‌కు ముందు సంబంధిత సర్టిఫికెట్లను వెబ్‌సైట్‌లో అప్‌లోడ్ చేయడం తప్పనిసరి. సర్టిఫికెట్ల పరిశీలన సమయంలో అభ్యర్థి హాజరు కాకపోతే లేదా సరైన సర్టిఫికెట్లు సమర్పించకపోతే, మెరిట్ జాబితాలో తదుపరి అభ్యర్థికి అవకాశం కల్పించబడుతుంది.
కొందరు దళారులు, సోషల్ మీడియా ద్వారా అసత్య వదంతులు వ్యాప్తి చేస్తూ అభ్యర్థులను ఆందోళనకు గురిచేస్తున్నారని కృష్ణారెడ్డి ఆందోళన వ్యక్తం చేశారు. ఇటువంటి దుష్ప్రచారాలను నమ్మవద్దని, అధికారిక DSC వెబ్‌సైట్‌లోని సమాచారాన్ని మాత్రమే విశ్వసించాలని అభ్యర్థులకు సూచించారు. ఇలాంటి వదంతులు వ్యాప్తి చేసేవారిపై చట్టపరమైన చర్యలు తీసుకుంటామని ఆయన హెచ్చరించారు.
అభ్యర్థుల వ్యక్తిగత స్కోర్లు, మెరిట్ జాబితా, ఎంపిక జాబితాలు, నియామక ఉత్తర్వులు కేవలం మెగా DSC అధికారిక వెబ్‌సైట్, జిల్లా విద్యాధికారి వెబ్‌సైట్, క్యాండిడేట్ లాగిన్, మరియు ప్రభుత్వ పత్రికా ప్రకటనల ద్వారా మాత్రమే అందించబడతాయని కృష్ణారెడ్డి స్పష్టం చేశారు. అభ్యర్థులు అధికారిక వెబ్‌సైట్‌లలోని నోటిఫికేషన్లు, ప్రకటనలను మాత్రమే పరిగణనలోకి తీసుకోవాలని ఆయన సూచించారు.