ఏపీలో స్మార్ట్ రేషన్ కార్డుల్లో తప్పులు ఉన్నాయా.. ఇలా చేస్తే సరి

ఆంధ్రప్రదేశ్ ప్రభుత్వం రేషన్ కార్డుదారులకు స్మార్ట్ రేషన్ కార్డులు పంపిణీ చేస్తున్న సంగతి తెలిసిందే. రేషన్ తీసుకోవటంలో ఇబ్బందులను పరిష్కరించడంతో పాటుగా రేషన్ బియ్యం పక్కదారి పట్టకుండా చూడాలనే ఉద్దేశంతో ఈ స్మార్ట్ రేషన్ కార్డుల జారీని ఏపీ ప్రభుత్వం ప్రారంభించింది. ఇప్పటికే కొన్ని జిల్లాల్లో స్మార్ట్ రేషన్ కార్డుల పంపిణీ జరిగింది. ఆగస్ట్ 25వ తేదీ నుంచి సెప్టెంబర్ 15వ తేదీ వరకూ నాలుగు దశల్లో ఈ స్మార్ట్ రేషన్ కార్డులను ప్రభుత్వం జిల్లాల వారీగా పంపిణీ చేస్తోంది. ఏటీఎం కార్డు సైజులో ఉండే ఈ స్మార్ట్ రేషన్ కార్డులపై క్యూఆర్ కోడ్ ముద్రించి ఉంటుంది. ఈ క్యూఆర్ కోడ్ స్కాన్ చేయగానే రేషన్ తీసుకున్న వివరాలు తెలిసేలా డిజైన్ చేశారు. అయితే స్మార్డ్ రేషన్ కార్డులు అందుకున్న కొంతమంది రేషన్ కార్డుదారులను పాత సమస్యలు ఇంకా వేధిస్తూనే ఉన్నాయి.

స్మార్ట్ రేషన్ కార్డుల మ్యాపింగ్‌ అస్తవ్యస్తంగా ఉండటంతో లబ్ధిదారులు కొన్నిచోట్ల ఇబ్బందులు పడుతున్నారు. కొన్ని స్మార్ట్ రేషన్ కార్డులలో కుటుంబ సభ్యుల బంధుత్వం వద్ద ఇతరులు అని ముద్రించగా.. మరికొన్ని కార్డుల్లో అడ్రస్ స్థానంలో అర్థం లేని అక్షరాలు ప్రింట్ చేశారు. మరికొన్ని కార్డులలో ఇంటి యజమాని ఫోటో సరిగా కనిపించని పరిస్థితులు కూడా ఉన్నాయని లబ్ధిదారులు చెప్తున్నారు. కుటుంబసభ్యుల వివరాలు తప్పుగా నమోదు, అడ్రస్ గల్లంతవడం, బంధుత్వాల నమోదులో తప్పులు దొర్లాయని కొన్ని చోట్ల లబ్ధిదారులు వాపోతున్నారు.

వీటికి తోడు మహిళల పేరుతో రేషన్ కార్డులు జారీ చేస్తారు. కుటుంబ పెద్ద మహిళ పేరును పేర్కొనాల్సి ఉంటుంది. అయితే కొన్నిచోట్ల పురుషుల పేరుతో స్మార్ట్ రేషన్ కార్డులు వచ్చినట్లు తెలిసింది. అలాగే ఊరు, మండలం పేర్లల్లోనూ తప్పులు దొర్లినట్లు తెలిసింది. దీంతో రేషన్ కార్డులలో తప్పులు ఉంటే సంక్షేమ పథకాలకు దూరమవుతామనే ఆందోళన వారిలో నెలకొంది.

ఈ నేపథ్యంలో పౌరసరఫరాల శాఖ అధికారులు ఈ తప్పులపై స్పందించారు. స్మార్ట్ రేషన్ కార్డుల వివరాల్లో ఏవైనా తప్పులు దొర్లితే సంబంధిత సచివాలయాలను సంప్రదించాలని సూచిస్తున్నారు. ప్రింటింగ్ సమస్యలు ఉంటే.. సచివాలయాల్లో దరఖాస్తు చేసుకుని తప్పులు సరిచేసుకోవచ్చని సూచిస్తున్నారు. మీ స్మార్ట్ రేషన్ కార్డులలో ఏవైనా తప్పులు ఉంటే.. వెంటనే సచివాలయ సిబ్బందిని సంప్రదించి పరిష్కరించుకునే వీలుందని చెప్తున్నారు. మరోవైపు ఇప్పటికే రెండు విడతల్లో కొన్ని జిల్లాల్లో స్మార్ట్ రేషన్ కార్డుల పంపిణీ జరిగింది. మరో రెండు విడతల్లో మిగతా వారికి కూడా స్మార్ట్ రేషన్ కార్డులు ఉచితంగా పంపిణీ చేయనున్నారు.