ఆపరేషన్ సిందూర్ వృథా అనిపిస్తోంది.. పహల్గాం ఉగ్రదాడి బాధితుడి ఆవేదన

 నేడు దుబాయ్‌లో జరగనున్న భారత్-పాకిస్థాన్ ఆసియా కప్ క్రికెట్ మ్యాచ్‌పై తీవ్ర ఆందోళన వ్యక్తం చేస్తూ.. పహల్గాం ఉగ్రదాడి బాధితుడు సావన్ పర్మార్ సంచలన వ్యాఖ్యలు చేశారు. "ఆపరేషన్ సిందూర్ వృథానేమో అనిపిస్తోంది" అంటూ తన ఆవేదనను వ్యక్తం చేశారు. ఏప్రిల్ 22వ తేదీన పహల్గాంలో జరిగిన ఉగ్రదాడిలో సావన్ తండ్రితో పాటు ఆయన సోదరుడు కూడా ఉగ్రవాదుల కాల్పులకు బలై ప్రాణాలు కోల్పోయారు. ఈక్రమంలోనే ఆయన భారత్-పాకిస్థాన్ మ్యాచ్‌పై స్పందించారు. మ్యాచ్‌కు సంబంధించిన వార్త వచ్చినప్పటి నుంచి తాము తీవ్ర ఆవేదనతో ఉన్నామని తెలిపారు. పాకిస్థాన్‌తో ఎలాంటి సంబంధాలు కొనసాగించకూడదని ఆయన గట్టిగా చెప్పారు.

"మీకు మ్యాచ్ ఆడాలని ఉంటే.. తుపాకీ తూటాలకు బలైన నా 16 ఏళ్ల తమ్ముడిని తిరిగి తీసుకురండి. ఆపరేషన్‌ సిందూర్ ఇప్పుడు వృథానేమో అనిపిస్తోంది" అని సావన్ పర్మార్ కన్నీటిపర్యంతమయ్యారు. పహల్గాంలో పాకిస్థాన్ మద్దతు ఉన్న ఉగ్రవాదులు 25 మంది భారతీయులు మరియు ఒక నేపాల్ పౌరుడితో సహా మొత్తం 26 మంది అమాయక పర్యాటకులను చంపిన తర్వాత కూడా ఈ మ్యాచ్ ఆడటం సరికాదని ప్రజలు దేశవ్యాప్తంగా నిరసన వ్యక్తం చేస్తున్నారు. భారత్-పాక్ మ్యాచ్‌ను బహిష్కరించాలని పిలుపునిస్తున్నారు. ముఖ్యంగా బాధిత కుటుంబాలు, ఆనాటి భయానక క్షణాలను గుర్తు చేసుకున్నాయి.

అలాగే సావన్ తల్లి కిరణ్ యతీష్ పర్మార్ మాట్లాడుతూ.. బాధిత కుటుంబాల గాయాలు ఇంకా మానలేదని ఆవేదన వ్యక్తం చేశారు. ఆపరేషన్ సిందూర్ ఇంకా ముగియలేదని.. ఇలాంటి సమయంలో భారత్-పాక్ మ్యాచ్ ఎందుకు జరుగుతోందని ఆమె ప్రధాని మోదీని ప్రశ్నించారు. "ఈ మ్యాచ్ జరగకూడదు. నేను ప్రధానమంత్రి మోదీని అడగాలనుకుంటున్నాను. ఆపరేషన్ సిందూర్ ముగియనప్పుడు ఈ మ్యాచ్ ఎందుకు జరుగుతోంది? పహల్గాం ఉగ్రదాడిలో తమ ప్రియమైన వారిని కోల్పోయిన కుటుంబాలను ఒకసారి సందర్శించి, వారి బాధ ఎలా ఉందో చూడాలని దేశంలోని ప్రతి ఒక్కరికీ నేను చెప్పాలనుకుంటున్నాను. మా గాయాలు ఇంకా మానలేదు" అని కిరణ్ యతీష్ పర్మార్ కన్నీళ్లతో అన్నారు.

పహల్గాం ఉగ్రదాడిలో తన భర్త శుభం ద్వివేదిని కోల్పోయిన ఐశ్వర్య ద్వివేది శనివారం భారత క్రికెట్ నియంత్రణ మండలి (బిసిసిఐ)పై తీవ్ర ఆగ్రహం వ్యక్తం చేశారు. "తుపాకీ గురిపెట్టి మ్యాచ్ ఆడమని బలవంతం చేయలేరు" అని అన్నారు. ఒకరిద్దరు తప్ప మెజారిటీ ఆటగాళ్లు ముందుకు వచ్చి మ్యాచ్‌ను బహిష్కరించలేదని ఆమె ఆటగాళ్లపై కూడా అసంతృప్తి వ్యక్తం చేశారు. ఈ భయంకరమైన ఉగ్రదాడిలో ప్రాణాలను కోల్పోయినవారిని గౌరవించాలని, క్రికెట్ ఆటతో పాక్ విషయంలో రాజీపడకూడదని బాధిత కుటుంబాలు విజ్ఞప్తి చేశాయి. ఈ భావోద్వేగాల మధ్య భారత్-పాకిస్థాన్ క్రికెట్ మ్యాచ్‌ను రద్దు చేయాలనే డిమాండ్ దేశవ్యాప్తంగా రోజురోజుకు పెరుగుతోంది.