టీమిండియాకి ప్రత్యేక ఫీల్డింగ్ డ్రిల్స్
sports | Suryaa Desk | Published : Thu, Sep 18, 2025, 03:29 PM
ఆసియా కప్లో అద్భుత ప్రదర్శనతో దూసుకెళ్తున్న భారత జట్టుకు దుబాయ్ అంతర్జాతీయ స్టేడియంలో ఒక కొత్త సవాల్ ఎదురవుతోంది. సాధారణంగా స్టేడియాల్లో ఉండే స్తంభాల లైట్లకు భిన్నంగా, ఇక్కడి స్టేడియం పైకప్పు చుట్టూ గుండ్రంగా అమర్చిన 'రింగ్ ఆఫ్ ఫైర్' ఫ్లడ్లైట్లు ఫీల్డర్లకు కఠిన పరీక్ష పెడుతున్నాయి. ఈ ప్రత్యేక లైట్ల వెలుగులో ఫీల్డింగ్ చేయడం, ముఖ్యంగా బౌండరీ లైన్ వద్ద గాల్లోకి లేచిన బంతిని అంచనా వేయడం కష్టంగా మారుతోంది. ఈ సమస్యను అధిగమించేందుకు టీమిండియా ప్రత్యేక ఫీల్డింగ్ డ్రిల్స్ నిర్వహిస్తోంది.ఈ అంశంపై భారత జట్టు ఫీల్డింగ్ కోచ్ టి. దిలీప్ స్పందించాడు. దుబాయ్ స్టేడియంలోని లైట్ల వ్యవస్థ విభిన్నంగా ఉంటుందని, డోమ్ ఆకారంలో ఉన్న పైకప్పుకు అమర్చిన ఈ 'రింగ్ ఆఫ్ ఫైర్' కారణంగా ఫీల్డర్లు ఇబ్బంది పడతారని ఆయన వివరించాడు. "బౌండరీ వద్దకు దూసుకొచ్చే హై క్యాచ్ల సమయంలో, బంతి ఆ లైట్ల వెలుగు గుండా ప్రయాణిస్తున్నప్పుడు రెప్పపాటులో కంటికి కనిపించకుండా పోయే ప్రమాదం ఉంది. అలాంటప్పుడు ఆటగాళ్లు కంగారుపడతారు" అని దీలిప్ అన్నాడు. ఈ వివరాలను బీసీసీఐ 'ఎక్స్'లో పోస్ట్ చేసిన ఒక వీడియోలో వెల్లడించాడు.
|
|