నిరుద్యోగులకు ఉచితంగా ట్రైనింగ్.. భోజనం, వసతి కూడా ఫ్రీ

ప్రభుత్వ ఉద్యోగం.. ప్రతి ఒక్క విద్యార్థి కల.. తన కలను సాకారం చేసుకునేందుకు కొంతమంది చదువుకుంటూనే పోటీ పరీక్షలు సన్నద్ధమవుతూ ఉంటారు. మరికొందరు అకడమిక్స్ మీద దృష్టి సారించి..చదువు పూర్తైన తర్వాత పోటీ పరీక్షల మీద దృష్టి పెడుతుంటారు. ప్రభుత్వ కొలువులు మాత్రమే కాదు ఇటీవలి కాలంలో బ్యాంక్ ఉద్యోగాలు కూడా యువతను బాగా ఆకర్షిస్తున్నాయి. ఐటీ ఉద్యోగాలతో పోలిస్తే జీతాల విషయం ఎలా ఉన్నప్పటికీ.. ఉద్యోగ భద్రత ఉంటుందనే కారణంగా ప్రభుత్వ ఉద్యోగాలు, బ్యాంక్ కొలువుల వైపు నేటి యువత మొగ్గు చూపుతోంది. అయితే నేటి పోటీ ప్రపంచంలో ఈ ఉద్యోగాలు సాధించడం అంత సులువు కాదు. ఎంతో మంది పోటీని తట్టుకుని విజయం సాధించాలంటే సరైన శిక్షణ, సన్నద్ధత అవసరం. అయితే పేదరికం కారణంగా కొంతమంది యువత ఈ ట్రైనింగ్ తీసుకోలేని పరిస్థితి. ఈ నేపథ్యంలో ఏపీ ప్రభుత్వం నిరుద్యోగ యువతకు శుభవార్త వినిపించింది.

రాష్ట్రంలోని నిరుద్యోగ యువతీ యువకులకు అంబేద్కర్ స్టడీ సర్కిళ్ల ద్వారా ఉచిత శిక్షణ అందించాలని ఏపీ ప్రభుత్వం నిర్ణయించింది. ఎస్సీ, ఎస్టీ, బీసీ, ఓసీ సామాజికవర్గాలకు చెందిన యువతీ యువకులకు అంబేద్కర్ స్టడీ సర్కిళ్ల ద్వారా పోటీ పరీక్షలకు ఉచితంగా శిక్షణ అందించనున్నారు. ఇందుకోసం ఆసక్తి కలిగిన యువత దరఖాస్తులు చేసుకోవాలని అంబేద్కర్ స్టడీ సర్కిల్ డైరెక్టర్ ప్రసన్న వెంకటేష్ తెలిపారు.

సెప్టెంబర్ 24 నుంచి అక్టోబర్ ఆరో తేదీ వరకూ దరఖాస్తు చేసుకునేందుకు అవకాశం ఉందని వెల్లడించారు. ఐబీపీఎస్, ఆర్ఆర్‌బీ, ఎస్ఎస్‌సీ వంటి పోటీ పరీక్షలకు అంబేద్కర్ స్టడీ సర్కిళ్ల ద్వారా ఉచితంగా శిక్షణ అందిస్తారు. అభ్యర్థులు ఆన్‌లైన్‌లో దరఖాస్తు చేసుకోవాల్సి ఉంటుంది. దరఖాస్తు చేసుకోవడానికి అక్టోబర్ ఆరో తేదీ వరకూ గడువు ఉంది. అనంతరం అక్టోబర్ 12వ తేదీన దరఖాస్తు చేసుకున్న వారికి వారి జిల్లా కేంద్రాల్లోనే స్క్రీనింగ్ టెస్ట్ నిర్వహిస్తారు.

ఎంపికైన వారికి తిరుపతి, విశాఖపట్నంలలో పోటీ పరీక్షలకు ఉచితంగా శిక్షణ అందిస్తారు. ఇక ఎంపికైన వారికి ఉచితంగా శిక్షణ అందించడంతో పాటుగా వారికి వసతి, భోజన సౌకర్యం కూడా కల్పిస్తున్నట్లు అంబేద్కర్ స్టడీ సర్కిల్ డైరెక్టర్ వెల్లడించారు. ఇంకా ఏవైనా వివరాల కావాలనుకుంటే 9949686306 ఫోన్ నంబర్ సంప్రదించాలని సూచించారు. ఆసక్తి కలిగిన యువత వీలైనంత త్వరగా దరఖాస్తు చేసుకోవాలని సూచించారు. మరోవైపు నిరుద్యోగ యువతకు ట్రైనింగ్ ఇవ్వడానికి ఆసక్తిగల సంస్థల నుంచి అంబేద్కర్ స్టడీ సర్కిల్ టెండర్లు కోరుతోంది.