పాకిస్థాన్ ఆర్థిక వ్యవస్థ పతనానికి ఆర్మీ చీఫే కారణం: ఇమ్రాన్ ఖాన్

జైలులో ఉన్న పాకిస్థాన్ మాజీ ప్రధాని ఇమ్రాన్ ఖాన్ ప్రస్తుత పాక్ ఆర్మీ చీఫ్ జనరల్ అసిమ్ మునీర్‌పై సంచలన ఆరోపణలు చేశారు. తనను, తన భార్యను మానసిక హింసకు గురిచేస్తున్నారని ఇమ్రాన్ ఖాన్ అన్నారు. తమను ఒత్తిడికి గురిచేసి లొంగదీసుకోవడమే లక్ష్యంగా హింసకు గురిచేస్తున్నారని ఆరోపించారు.

పలు కేసులపై ఇమ్రాన్ ఖాన్ గత రెండు సంవత్సరాలుగా జైలులో ఉంటున్నారు. 72 ఏళ్ల ఈ మాజీ ప్రధాని ప్రస్తుతం రావల్పిండిలోని అడియాలా జైలులో ఉన్నారు. ఇటీవలె అల్-ఖదీర్ ట్రస్ట్ కేసులో దోషులుగా తేలిన తర్వాత ఇమ్రాన్ ఖాన్ సహా, తన భార్య బుష్రా బీబీ కూడా జైలు శిక్ష అనుభవిస్తున్నారు. 'జైలులో నాపై, నా భార్య బుష్రా బేగంపై జరుగుతున్న మానసిక హింసకు అసిమ్ మునీరే కారణం. మమ్మల్ని లొంగదీసుకుని, మా ఆత్మవిశ్వాసాన్ని దెబ్బతీయడమే అసిమ్ మునీర్ లక్ష్యం.' అని ఇమ్రాన్ ఖాన్ సామాజిమ మాధ్యం ఎక్స్ వేదికగా పోస్టు చేశారు. 'జనరల్ అసిమ్ మునీర్‌కు నా సందేశం ఒకటే.. మేము బతికి ఉన్నంత కాలం, యాజిద్ క్రూరత్వానికి, ఫరోల నిరంకుశత్వానికి తలవంచం' అని తన పోస్టులో ఇమ్రాన్ ఖాన్ పేర్కొన్నారు.

మునీర్ అధికారం చేపట్టినప్పటి నుంచి అఫ్గానిస్థాన్‌తో సంబంధాలను చెడగొట్టడానికి ప్రయత్నం చేస్తున్నారని కూడా ఇమ్రాన్ ఖాన్ ఆరోపించారు. అప్ఘాన్ పౌరులను బహిష్కరించడం, డ్రోన్ దాడులు చేయడం ద్వారా అఫ్గానిస్థాన్‌ను పాక్‌తో వైరానికి ప్రేరేపిస్తున్నారని అన్నారు. ఈ చర్యల ద్వారా మునీర్ తనను తాను పశ్చిమ దేశాల ముందు ముజాహిద్(యోధుడు)గా చూపించుకోవడానికి ప్రయత్నిస్తున్నారని ఇమ్రాన్ ఖాన్ ఆరోపణలు చేశారు. ఈ అణచివేత కారణంగానే పాకిస్థాన్ ఆర్థిక వ్యవస్థ చారిత్రాత్మకంగా బలహీనపడిందని, విదేశీ పెట్టుబడులు పడిపోయాయని ఆయన అన్నారు. గత మూడు సంవత్సరాల్లో పాకిస్థాన్ అప్పులు రెట్టింపు అయ్యాయని కూడా ఖాన పేర్కొన్నారు.

ఈ సమస్యలకు పరిష్కారం ప్రజా ప్రభుత్వం ఏర్పడితేనే సాధ్యమవుతుందని, దేశంలోని ఆర్థిక సవాళ్లను పరిష్కరించాలంటే ఇది తప్పనిసరి అని ఇమ్రాన్ అన్నారు.సెప్టెంబర్ 27న పెషావర్‌లో జరిగే ర్యాలీపై తన పార్టీ కార్యకర్తలు దృష్ట పెట్టాలని ఆయన పిలుపునిచ్చారు.