బాబా ఒక రాబందులా వ్యవహరించాడు అంటున్న బాధితురాలు

స్వయం ప్రకటిత బాబా చైతన్యానంద సరస్వతిపై లైంగిక వేధింపుల ఆరోపణలు వెల్లువెత్తుతున్నాయి. ఇప్పటికే 17 మంది విద్యార్థినుల కేసులో పరారీలో ఉన్న ఆయనపై, 2016లో కేసు పెట్టిన ఒక బాధితురాలు తాజాగా సంచలన విషయాలు వెల్లడించారు. "చైతన్యానంద నా పట్ల రాబందులా వ్యవహరించాడు" అంటూ తన గోడును వెళ్లబోసుకున్నారు.2016లో ఢిల్లీలోని శ్రీ శారద ఇనిస్టిట్యూట్ ఆఫ్ ఇండియన్ మేనేజ్‌మెంట్‌లో చేరినప్పుడు తన వయసు 20 ఏళ్లని, అది తన జీవితంలో అత్యంత భయంకరమైన సమయమని ఆమె తెలిపారు. "ఇనిస్టిట్యూట్‌లో చేరిన వెంటనే బాబా నాకు అసభ్యకరమైన మెసేజ్‌లు పంపడం మొదలుపెట్టాడు. నన్ను 'బేబీ', 'స్వీట్ గర్ల్' అని పిలిచేవాడు. సాయంత్రం 6:30 గంటలకు క్లాసులు ముగిశాక తన ఆఫీసుకు పిలిపించుకుని వేధించేవాడు" అని ఆమె ఆరోపించారు.తనలో ఎంతో ప్రతిభ ఉందని, దుబాయ్‌కి తీసుకెళ్లి తన సొంత ఖర్చులతో చదివిస్తానని చైతన్యానంద ఆశ చూపినట్లు బాధితురాలు వివరించారు. "నాకు అస్సలు ఇష్టం లేకపోయినా, అతడి సిబ్బంది నాపై ఒత్తిడి తెచ్చేవారు. నా మొబైల్ ఫోన్ లాక్కుని, హాస్టల్‌లో ఒంటరిగా ఉండేలా చేశారు. ఎవరితోనూ మాట్లాడనిచ్చేవారు కాదు. రాత్రిపూట నా గదిలోని ఫోన్‌కు కాల్ చేసేవాడు" అని ఆమె తెలిపారు.ఒకసారి తనను అసభ్యంగా తాకేందుకు ప్రయత్నించాడని, మధురకు తనతో పాటు రమ్మని బలవంతం చేశాడని ఆమె చెప్పారు. ఆ భయంతోనే ఎవరికీ చెప్పకుండా హాస్టల్‌లోని వస్తువులన్నీ వదిలేసి పారిపోయానని తెలిపారు. ఆ తర్వాత బాబా తన అడ్రస్, ఫోన్ నంబర్ ఇచ్చి పంపడంతో కొందరు విద్యార్థులు తన ఇంటికి వచ్చి, తిరిగి రావాలంటూ ఒత్తిడి చేశారని, కానీ తన తండ్రి వారిని తరిమికొట్టారని ఆమె గుర్తుచేసుకున్నారు.