గుర్తు తెలియని వ్యక్తి ఫోన్.. మాటలు కలిపి, అకౌంట్లోకి డబ్బులు

వర్క్ ఫ్రమ్ హోమ్.. ఇంటి వద్దే సంపాదన.. కూర్చున్న చోట నుంచే సంపాదించండి.. ఈ సింపుల్ పని చేస్తే చాలు, ఇంట్లో నుంచే డబ్బులు.. తెల్లారి లేచింది మొదలు ఈ రకమైన యాడ్స్, ప్రకటనలు చూస్తూనే ఉంటాం. సెల్ ఫోన్, పేపర్, వాల్ పోస్టర్లు.. ఎక్కడ చూసినా ఇవే ప్రకటనలే..ఇందులో కొన్ని నిజం ఉండొచ్చు. మరికొన్ని అబద్ధాలు ఉండొచ్చు. కానీ ఏది నిజమో, ఏది అబద్ధమో తెలుసుకోకపోతే మాత్రం బొక్క బోర్లా పడటం ఖాయం.. జేబులు ఖాళీ కావటం పక్కా. ఇలాంటి అనుభవమే విజయవాడలోని ఓ మహిళకు ఎదురైంది.

విజయవాడలోని మాచవరానికి చెందిన మహిళ.. వయసు 33 ఏళ్లు.. ఈ మహిళకు ఆగస్ట్ 17వ తేదీన ఓ ఫోన్ వచ్చింది. ఓ ఆగంతకుడు  నుంచి మహిళకు ఫోన్ కాల్ వచ్చింది. తాము ఓ రెస్టారెంట్ హెచ్ఆర్ అసిస్టెంట్‌ను అంటూ అవతలి వ్యక్తి మహిళను పరిచయం చేసుకున్నాడు. రెస్టారెంట్లపై గూగుల్ మ్యాప్స్‌లో రివ్యూలు రాయాలని మహిళను కోరాడు. అందుకు డబ్బులు ఇస్తామని.. రివ్యూకు రూ.5000 నుంచి రూ.8000 వరకూ వస్తాయని నమ్మించారు. దీంతో ఆ మహిళ నిజమేనని నమ్మింది. ఆ తర్వాత ఆ మహిళను కవితాసింగ్ అనే ఓ టెలిగ్రామ్ యూజర్‌కు కలిపారు. కవితాసింగ్ పంపిన లింక్‌ క్లిక్ చేసి.. ఈ మహిళ రివ్యూలు రాయటం మొదలుపెట్టారు.

అయితే మహిళను నమ్మించేందుకు సైబర్ నేరగాళ్లు వ్యూహాత్మకంగా వ్యవహరించారు. మహిళ రాసిన రివ్యూలకు డబ్బులు చెల్లించడం మొదలుపెట్టారు. దీంతో క్రమంగా ఆ మహిళకు వారిపై నమ్మకం పెరిగిపోయింది. ఇక అప్పుడే తమ అసలు స్కెచ్ అమలు చేయడం ప్రారంభించారు సైబర్ నేరగాళ్లు. కొన్నింటికి డబ్బులను పెట్టుబడిగా పెట్టి.. ఆ పైన రివ్యూలు రాస్తే, ఎక్కువ లాభాలు వస్తాయని మహిళను నమ్మించారు. సైబర్ నేరగాళ్ల మాటలు నమ్మిన మహిళ.. వారు చెప్పిన బ్యాంక్ అకౌంట్లకు, యూపీఐ ఖాతాలకు డబ్బులు పంపించడం మొదలుపెట్టారు. ఆ విధంగా పలు దఫాలుగా రూ.6.02 లక్షలు పంపారు. కొన్ని రోజులకు పెట్టిన పెట్టుబడి, లాభాలను వెనక్కి తీసుకోవాలని భావించగా.. వీలు కాలేదు. దీంతో మోసపోయాయని గుర్తించిన మహిళ పోలీసులను ఆశ్రయించారు. బాధితురాలి ఫిర్యాదు ఆధారంగా కేసు నమోదు చేసిన పోలీసులు.. దర్యాప్తు మొదలుపెట్టారు. దర్యాప్తులో మహిళ పంపిన డబ్బులు ఉత్తరాది రాష్ట్రాల బ్యాంకు అకౌంట్లోకి వెళ్లినట్లు గుర్తించారు. ఆయా బ్యాంకుల అకౌంట్ల వివరాలను పోలీసులు సేకరించే పనిలో పడ్డారు.