బాలకృష్ణ ఫోన్ చేశాడు.. జగన్‌ను కలవాలన్నాడు..నా తల్లి మీద ఒట్టు.. పేర్ని నాని

టీడీపీ నేత, హిందూపురం ఎమ్మెల్యే నందమూరి బాలకృష్ణ.. అసెంబ్లీలో చేసిన వ్యాఖ్యలపై వైసీపీ శ్రేణులు భగ్గుమంటున్నాయి. వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డిని.. దేవాలయం లాంటి అసెంబ్లీలో అనుచిత వ్యాఖ్యలు చేశారంటూ వైసీపీ నేతలు, కార్యకర్తలు బాలయ్యపై మండిపడుతున్నారు. ఈ క్రమంలోనే మాజీ మంత్రి పేర్ని నాని.. బాలకృష్ణపై సంచలన వ్యాఖ్యలు చేశారు. వైఎస్ జగన్ ముఖ్యమంత్రిగా, తాను మంత్రిగా ఉన్న సమయంలో బాలకృష్ణ తనకు ఫోన్ చేశారంటూ పేర్ని నాని కీలక వ్యాఖ్యలు చేశారు.

" నాకు జన్మనిచ్చిన తల్లిదండ్రుల ప్రమాణం చేసి చెప్తున్నా.. బాలకృష్ణ నాతో ఫోన్‌లో మాట్లాడాడు. మీరు మీ అమ్మానాన్న మీద ప్రమాణం చేసి కాదని చెప్పండి. ఎన్టీఆర్, బసవతారకం గారు ఎంత సంస్కారవంతంగా బతికారు. వాళ్ల కడుపున పుట్టి ఇలాంటి నీచపు మాటలా.. పైగా అసెంబ్లీలో.. అఖండ సినిమా కోసం జగన్ మోహన్ రెడ్డి గారితో అపాయింట్‌మెంట్ ఇప్పించమని నన్ను ఫోన్‌లో అడిగావ్. మిర్యాల రవీందర్ రెడ్డి నా దగ్గరకు వచ్చాడు. పదిమందితో అడిగి అపాయింట్‌మెంట్ తీసుకుని నా దగ్గరకు వచ్చాడు. మా హీరో గారు మాట్లాడతారన్నారు. మంత్రిగా నా బాధ్యత కావున నేను మాట్లాడా. జగన్ గారితోనూ అదే చెప్పా. బాలకృష్ణ వస్తాడంట సర్, మాట్లాడతాడంట, అపాయింట్‌మెంట్ ఇవ్వండి అని అడిగా. చంద్రబాబు బామ్మర్దా.. మనతో ఏం పనంటా అని అడిగారు. అఖండ సినిమా కోసమని చెప్పా. సినిమాకు ఎక్కువ ఖర్చు అయ్యిందంట, ఎక్కువ షోలు వేసుకుంటారంట అని చెప్పా. సరే ఏదో ఒకటి చేయండి అని జగన్ గారు అన్నారు. అంత హుందాగా ప్రవర్తించిన వైఎస్ జగన్ గురించి మాట్లాడే భాష అది.." అంటూ నందమూరి బాలకృష్ణపై పేర్ని నాని విమర్శలు గుప్పించారు.

మరోవైపు ఏపీ డిప్యూటీ సీఎం పవన్ కళ్యాణ్‌ను చూస్తే బాలకృష్ణకు కడుపుమంటగా ఉందని పేర్ని నాని అన్నారు. సీఎం చంద్రబాబుతో సమానంగా, పవన్ కళ్యాణ్ డిప్యూటీ సీఎం పదవిలో ఉండటం చూసి బాలకృష్ణ తట్టుకోలేకపోతున్నారని విమర్శించారు. బాలకృష్ణ లాంటి వారి కోసం అసెంబ్లీలోనూ బ్రీత్ అనలైజర్లు పెట్టాలనిపేర్ని నాని అన్నారు.

కామినేని శ్రీనివాస్ చిరంజీవిని పొగిడేసరికి.. బాలయ్య ఇలా తన కడుపుమంట బయటపెట్టారని పేర్ని నాని ఆరోపించారు. వైఎస్ జగన్, చిరంజీవిని అన్నలా చూస్తారని అన్నారు. మరోవైపు మంత్రి పదవి కోసమే కామినేని శ్రీనివాస్ అబద్ధాలు మాట్లాడుతున్నారని పేర్ని నాని ఆరోపించారు. ఆరోగ్య శాఖ మంత్రి సత్యకుమార్ యాదవ్ స్థానంలో తనకు మంత్రిగా అవకాశం ఇస్తారనే ఆశతోనే ఇలాంటి అబద్ధాలు మాట్లాడుతున్నారని మండిపడ్డారు.