ఉద్యోగులందరికీ ఫ్రీగా ఐఫోన్ 17 ప్రో మాక్స్ ఫోన్లు

యాపిల్ కంపెనీ నుంచి వచ్చే ఫోన్లు అంటే.. ప్రపంచవ్యాప్తంగా ఎంతో క్రేజ్ ఉంటుంది. ఇక ఐఫోన్ సిరీస్ అయితే.. చాలా మందిని కట్టిపడేస్తుంది. ఎప్పటికప్పుడు రిలీజ్ అయ్యే ఐఫోన్ సిరీస్ ఫోన్లను కొనుగోలు చేసేందుకు.. ప్రపంచ దేశాల్లో ఫోన్ లవర్స్ యాపిల్ స్టోర్ల ముందు గంటల తరబడి వేచి ఉంటున్నారు. ఇక ఇటీవలె యాపిల్ కంపెనీ ఐఫోన్ సిరీస్‌లో 17, 17 ప్రో, 17 ప్రో మ్యాక్స్, 17 ఎయిర్ మోడల్స్‌ను ప్రపంచ వ్యాప్తంగా లాంఛ్ చేసిన సంగతి తెలిసిందే. వీటిని కొనేందుకు యాపిల్ లవర్స్ ఎగబడుతున్నారు. అయితే అలాంటి సమయంలో ఒక కంపెనీ.. అందులో పనిచేసే ఉద్యోగులు అందరికీ ఫ్రీగా యాపిల్ ఐఫోన్ 17 ప్రో మ్యాక్స్ ఫోన్‌ను అందించింది. ఈ విషయం ఇప్పుడు తీవ్ర చర్చనీయాంశంగా మారింది. అయితే ఈ ఐఫోన్ 17 సిరీస్ ఫోన్లు మార్కెట్లోకి రిలీజ్ అయిన కొన్ని గంటల్లోనే ఆ కంపెనీ బాస్.. తన ఉద్యోగులకు వాటిని అందించడం విశేషం.

మీడియాస్టార్మ్ అనే ప్రముఖ చైనీస్ మీడియా కంపెనీ అధిపతి టిమ్ పాన్.. తన ఉద్యోగులందరికీ సర్‌ప్రైజ్ ఇచ్చారు. కొత్త ఐఫోన్ 17 ప్రో మ్యాక్స్‌ను.. తన కంపెనీలో పనిచేసే ఉద్యోగులు అందరికీ అందించాలని నిర్ణయించుకున్నారు. అయితే కంపెనీలో పనిచేసే సీనియర్లు, జూనియర్లు అనే తేడా లేకుండా అందరికీ ఐఫోన్లను గిఫ్ట్‌గా ఇచ్చారు. ఆ కంపెనీలో ఇంటర్న్‌షిప్‌గా పనిచేస్తున్నా, కొత్తగా చేరిన ఉద్యోగులైనా, ప్రస్తుతం కంపెనీలో ఉన్న ప్రతి ఒక్క ఉద్యోగికి ఈ ఐఫోన్‌ను ఇచ్చారు. ఇక ఉద్యోగులు తమకు నచ్చిన కలర్ ఐఫోన్ 17 ప్రో మ్యాక్స్ ఫోన్‌ను ఎంచుకునే అవకాశాన్ని కూడా మీడియాస్టార్మ్ కంపెనీ కల్పించడం మరో విశేషం.

ప్రతీ ఫోన్ బేస్ మోడల్ ధర సుమారు 1899 డాలర్లు అంటే మన భారత కరెన్సీలో సుమారు రూ.1.68 లక్షలుగా ఉంది. అంతేకాకుండా.. చైనాలో ఉద్యోగులకు కంపెనీ బహుమతులుగా ఇచ్చే వాటిపై పన్ను కూడా వర్తిస్తుంది. అయితే.. ఫ్రీగా ఐఫోన్ ఇవ్వడమే కాకుండా.. దానిపై పడే పన్ను భారాన్ని కూడా మీడియాస్టార్మ్ కంపెనీనే భరిస్తుందని సీఈఓ టిమ్ పాన్ ప్రకటించడం విశేషం.

అయితే తమ కంపెనీలో పనిచేసే ఉద్యోగులకు ఖరీదైన యాపిల్ ఫోన్లను గిఫ్ట్‌గా ఇవ్వడం టిమ్ పాన్‌కు ఒక వార్షిక సంప్రదాయంగా మారింది. 2022, 2023 ఏడాదుల్లో కూడా అప్పుడు రిలీజ్ అయిన ఫోన్లను తన వంద మంది ఉద్యోగులకు టిమ్ పాన్ అందించారు. అప్పట్లో ఐఫోన్ 16 ప్రో, యాపిల్ వాచ్ సిరీస్ 10లను ఉద్యోగులకు ఇచ్చారు. ఈ సందర్భంగా ప్రపంచంలోనే అత్యుత్తమ బాస్ టిమ్ పాన్ అని ఒక ఉద్యోగి సోషల్ మీడియాలో పోస్ట్ చేశారు.