మహిళల వన్డే ప్రపంచకప్ 2025 తొలి మ్యాచ్లో బ్యాటింగ్కు దిగిన భారత్
sports | Suryaa Desk | Published : Tue, Sep 30, 2025, 09:44 PM
ప్రతిష్టాత్మక మహిళల వన్డే ప్రపంచకప్ 2025 ప్రారంభమైంది. తొలి మ్యాచ్లో ఆతిథ్య భారత్.. శ్రీలంకతో తలపడుతోంది. అసోంలోని గువాహటి వేదికగా ఈ మ్యాచ్ మొదలైంది. ఇందులో టాస్ గెలిచిన శ్రీలంక కెప్టెన్ చమరి ఆటపట్టు.. తొలుత బౌలింగ్ ఎంచుకుంది. దీంతో భారత్.. ఫస్టు బ్యాటింగ్కు దిగింది. తమ బౌలింగ్ యూనిట్పై నమ్మకం ఉందని.. అందుకే బౌలింగ్ ఎంచుకున్నట్లు చమరి తెలిపింది. ఇది మంచి బ్యాటింగ్ పిచ్లా కనిపిస్తోందని.. కానీ రెండో ఇన్నింగ్స్లో మంచు ప్రభావం చూపే అవకాశం ఉందని భావిస్తున్నట్లు అంచనా వేసింది.
అనంతరం మాట్లాడిన టీమిండియా కెప్టెన్ హర్మన్ ప్రీత్ కౌర్.. తాము కూడా తొలుత బౌలింగ్ చేయాలని అనుకున్నామని చెప్పింది. “పిచ్ చాలా బాగుంది, మేము మంచి స్కోరు చేస్తామని అనుకుంటున్నాం. అందరూ ఫిట్గా ఉన్నారు. మేం ముగ్గురు స్పిన్నర్లు, ఇద్దరు పేసర్లతో బరిలోకి దిగుతున్నాం” అని హర్మన్ ప్రీత్ కౌర్ పేర్కొంది. కాగా మహిళల వన్డే ప్రపంచకప్ 2025లో ఇదే తొలి మ్యాచ్. ఇప్పటివరకు ఒక్కసారి కూడా ప్రపంచకప్ టైటిల్ గెలవని భారత్.. ఈ సారి ఎలాగైనా టైటిల్ ముద్దాడాలనే లక్ష్యంతో బరిలోకి దిగింది. అన్ని రంగాల్లో బలంగా కనిపిస్తున్న టీమిండియా.. టైటిల్ ఫేవరెట్గా అడుగుపెట్టింది.
ఇక భారత్, శ్రీలంక మహిళల జట్లు వన్డేల్లో ఇప్పటి వరకు 35 మ్యాచ్లలో తలపడ్డాయి. అందులో భారత్ 31 మ్యాచ్లలో విజయం సాధిస్తే, శ్రీలంక కేవలం మూడింటిలోనే గెలిచింది. మరో మ్యాచ్లో ఫలితం తేలలేదు. మహిళల వన్డే ప్రపంచకప్ టోర్నీ.. మ్యాచ్ లైవ్ను జియో హాట్ స్టార్ వేదికగా వీక్షించొచ్చు.
తుది జట్లు..
భారత్: ప్రతీకా రావల్, స్మృతి మంధాన, హర్లీన్ డియోల్, హర్మన్ప్రీత్ కౌర్ (కెప్టెన్), జెమిమా రోడ్రిగ్స్, రిచా ఘోష్ (వికెట్ కీపర్), దీప్తి శర్మ, అమంజోత్ కౌర్, స్నేహ రాణా, క్రాంతి గౌడ్, శ్రీ చరణి
శ్రీలంక: చమరి ఆటపట్టు (కెప్టెన్), హాసిని పెరీరా, హర్షిత సమరవిక్రమ, విష్మి గుణరత్నే, కవిషా దిల్హరి, నీలాక్షి డి సిల్వా, అనుష్క సంజీవని (వికెట్ కీపర్), అచ్చిని కులసూర్య, సుగండిక కుమారి, ఉదేశిక ప్రబోధని, ఇనోకా రనవీర
|
|