టాటాతో చేతులు కలిపిన ప్రభుత్వ రంగ సంస్థ బీఎస్‌ఎన్‌ఎల్

ప్రభుత్వ రంగ టెలికాం సంస్థ భారత్ సంచార్ నిగమ్ లిమిటెడ్  తన సేవలను ఆధునికీకరించే దిశగా మరో కీలక అడుగు వేసింది. ఇకపై ఫిజికల్ సిమ్ కార్డులు లేకుండానే సేవలు పొందేందుకు వీలుగా ఇ-సిమ్ టెక్నాలజీని అందుబాటులోకి తీసుకురానుంది. ఇందుకోసం టాటా గ్రూప్‌కు చెందిన టాటా కమ్యూనికేషన్స్‌తో గురువారం ఒక కీలక భాగస్వామ్యం కుదుర్చుకున్నట్లు ప్రకటించింది. ఇటీవల స్వదేశీ 4జీ సేవలను ప్రారంభించిన బీఎస్‌ఎన్‌ఎల్, ఇప్పుడు ఈ కొత్త టెక్నాలజీతో వినియోగదారులకు మరింత సౌకర్యాన్ని అందించాలని లక్ష్యంగా పెట్టుకుంది.ఈ ఒప్పందం ప్రకారం, టాటా కమ్యూనికేషన్స్‌కు చెందిన 'మూవ్' అనే అత్యాధునిక ప్లాట్‌ఫాం ద్వారా బీఎస్‌ఎన్‌ఎల్ ఇ-సిమ్ సేవలను అందిస్తుంది. కనెక్షన్ యాక్టివేషన్ నుంచి నిర్వహణ వరకు పూర్తి బాధ్యతను ఈ ప్లాట్‌ఫాం చూసుకుంటుంది. ఈ కొత్త విధానంతో వినియోగదారులు సిమ్ కార్డు కోసం స్టోర్లకు వెళ్లాల్సిన అవసరం ఉండదు. కేవలం ఒక క్యూఆర్ కోడ్‌ను స్కాన్ చేయడం ద్వారా తమ మొబైల్ ఫోన్‌లలో సులభంగా బీఎస్‌ఎన్‌ఎల్ కనెక్షన్‌ను యాక్టివేట్ చేసుకోవచ్చు.ఈ టెక్నాలజీ ముఖ్యంగా గ్రామీణ, మారుమూల ప్రాంతాల్లోని ప్రజలకు ఎంతగానో ఉపయోగపడనుంది. డ్యూయల్ సిమ్ సపోర్ట్ ఉన్న స్మార్ట్‌ఫోన్లలో ఒక ఫిజికల్ సిమ్‌తో పాటు రెండో నంబర్‌గా ఇ-సిమ్‌ను వాడుకునే సౌలభ్యం ఉంటుంది. ప్రయాణాలు చేసేవారికి ఇది మరింత ప్రయోజనకరంగా ఉంటుంది. విదేశాలకు వెళ్లినప్పుడు సిమ్ కార్డులు మార్చాల్సిన ఇబ్బంది లేకుండా, స్థానిక నెట్‌వర్క్‌లను సులభంగా యాక్టివేట్ చేసుకోవచ్చు.ఈ భాగస్వామ్యంపై టాటా కమ్యూనికేషన్స్ సీఈఓ అసిమ్ చావ్‌లా మాట్లాడుతూ, "భారతదేశంలో ఇ-సిమ్ టెక్నాలజీని అందరికీ అందుబాటులోకి తీసుకురావడమే మా లక్ష్యం. బీఎస్‌ఎన్‌ఎల్ వినియోగదారులకు వేగవంతమైన, సురక్షితమైన కనెక్టివిటీని అందిస్తాం" అని వివరించారు. త్వరలోనే ఈ సేవలను అన్ని ప్రధాన సర్కిళ్లలో అందుబాటులోకి తెస్తామని బీఎస్‌ఎన్‌ఎల్ సీఎండీ తెలిపారు. ఈ పరిణామంతో దేశీయ టెలికాం మార్కెట్‌లో పోటీ మరింత పెరిగి వినియోగదారులకు మెరుగైన సేవలు లభించే అవకాశం ఉందని నిపుణులు అభిప్రాయపడుతున్నారు.