ఆవుకి ‘అలియా భట్’ పేరు, ఆసక్తి కనబరచిన ప్రియాంక గాంధీ
national | Suryaa Desk | Published : Fri, Oct 10, 2025, 07:57 PM
వయనాడ్ ఎంపీ ప్రియాంక గాంధీ తన నియోజకవర్గ పర్యటనలో భాగంగా ఓ డెయిరీ ఫార్మ్ను సందర్శించారు. అయితే, ఈ పర్యటనలో బాలీవుడ్ నటి పేరున్న ఓ ఆవు ప్రత్యేక ఆకర్షణగా నిలిచింది. ఆ ఫార్మ్లో ‘అలియా భట్’ అని పిలుస్తున్న ఆవును చూసి ప్రియాంక ఎంతో ఆసక్తి కనబరిచారు.వివరాల్లోకి వెళితే... వయనాడ్లోని తిరువంబడి పరిధిలో ఉన్న కోడెన్చెరి డెయిరీ ఫార్మ్ను ప్రియాంక గాంధీ ఈ వారం ప్రారంభంలో సందర్శించారు. స్థానిక పాల సహకార సంఘం డైరెక్టర్ షీబా ఫ్రాన్సిస్ నడుపుతున్న ఈ ఫార్మ్లో ఆవుల పేర్లు అడిగి తెలుసుకున్నారు. వాటిలో ‘అలియా భట్’ అనే పేరు ఆమెను బాగా ఆకట్టుకుంది. ఈ సందర్భంగా ఆవులకు మేత తినిపిస్తూ, ఫార్మ్లో దాదాపు గంటసేపు గడిపారు. అక్కడే నెల రోజుల వయసున్న ఓ దూడకు ‘మరియా’ అని నామకరణం కూడా చేశారు.ప్రియాంక గాంధీ తమ ఫార్మ్కు రావడం కలలో కూడా ఊహించలేదని, ఆమె రాకతో తమకు ఎంతో ఆనందం కలిగిందని ఫార్మ్ నిర్వాహకురాలు షీబా ఫ్రాన్సిస్ తెలిపారు. "ఆమె ఫార్మ్లోని ప్రతి విషయం గురించి అడిగి తెలుసుకున్నారు. ఆవుల పేర్లు అడిగారు, ముఖ్యంగా అలియా భట్ పేరు ఆమెకు బాగా నచ్చింది. మేం కూడా ఆమె సూచించినట్లే ఓ దూడకు మరియా అని పేరు పెట్టాం" అని వివరించారు.
|
|