ఆయుర్వేద చికిత్స కోసం కేరళకు వచ్చిన కెన్యా మాజీ ప్రధాని రైలా ఒడింగా (80) గుండెపోటుతో హఠాన్మరణం

కెన్యా మాజీ ప్రధాని రైలా ఒడింగా (80) కేరళలోని కొచ్చి సమీపంలో విషాదకరంగా మరణించారు. ఆయుర్వేద నేత్ర చికిత్స కోసం భారత్‌కు వచ్చిన ఒడింగా, బుధవారం ఉదయం ఆసుపత్రి ప్రాంగణంలో వాకింగ్ చేస్తుండగా గుండెపోటుకు గురయ్యారు. ఉదయం 9.52 గంటలకు ఆయన మరణించినట్లు సమీపంలోని ఆసుపత్రి వర్గాలు ధృవీకరించాయి. ఆఫ్రికా రాజకీయాల్లో సుదీర్ఘ అనుభవం ఉన్న, సుప్రసిద్ధ నాయకుడైన ఒడింగా మృతి.. కేవలం కెన్యాకే కాక, అంతర్జాతీయ రాజకీయ వర్గాలకు కూడా దిగ్భ్రాంతికరం.
కొచ్చిలోని ఆయుర్వేద కంటి ఆసుపత్రిలో గత కొన్ని రోజులుగా ఆయన చికిత్స పొందుతున్నారు. బుధవారం ఉదయం నిత్యకృత్యంలో భాగంగా ఆసుపత్రి ఆవరణలో వాకింగ్ చేస్తుండగా ఆయన గుండెపోటుతో కుప్పకూలిపోయారు. వెంటనే అప్రమత్తమైన సిబ్బంది అత్యవసర చికిత్స నిమిత్తం సమీపంలోని ఆసుపత్రికి తరలించినప్పటికీ, ప్రయోజనం లేకపోయింది. ఆయన మరణించినట్లు వైద్యులు ప్రకటించారు. ఈ హఠాత్ మరణంపై స్థానిక పోలీసులు ఫారెన్ రీజినల్ రిజిస్ట్రేషన్ ఆఫీసర్ (FRRO)కు సమాచారం అందించారు.
రైలా ఒడింగా కెన్యా రాజకీయాలపై చెరగని ముద్ర వేశారు. 2008 నుంచి 2013 వరకు ఆయన కెన్యా ప్రధానమంత్రిగా పనిచేశారు. ప్రజాస్వామ్య, రాజ్యాంగ సంస్కరణల కోసం ఆయన చేసిన కృషి చిరస్మరణీయం. ఆయన అనేకసార్లు అధ్యక్ష ఎన్నికల్లో పోటీ చేసి ఓటమి పాలైనప్పటికీ, ప్రతిపక్ష నాయకుడిగా ఆయన పాత్ర, ప్రభావం కెన్యా చరిత్రలో కీలకమైనవి. నాలుగు దశాబ్దాలకు పైగా సుదీర్ఘ రాజకీయ ప్రస్థానం ఆయన సొంతం.
ఒడింగా మరణంపై కెన్యాలో తీవ్ర విషాద ఛాయలు అలముకున్నాయి. ఆయన మృతి కెన్యాకు తీరని లోటని పలువురు రాజకీయ నాయకులు, ప్రముఖులు సంతాపం వ్యక్తం చేశారు. ఆయన మృతదేహాన్ని స్వదేశానికి తరలించేందుకు సంబంధించిన ఏర్పాట్లను కెన్యా అధికారులు, భారత్‌లోని రాయబార కార్యాలయం సమన్వయంతో పర్యవేక్షిస్తున్నాయి. అగ్రశ్రేణి నేత ఆయుర్వేద చికిత్స కోసం వచ్చి, కేరళలో తుది శ్వాస విడవడం అంతర్జాతీయ వార్తాంశంగా మారింది.