చంద్రయాన్-2 నుంచి మరో చారిత్రాత్మక విజయాన్ని ISRO సాధించింది!

భారత అంతరిక్ష పరిశోధన సంస్థ ఇస్రో చేపట్టిన చంద్రయాన్-2 మిషన్ తాజాగా మరో చారిత్రాత్మక ముందడుగు వేసింది. చంద్రుడిపై సూర్య ప్రభావాన్ని గుర్తించి, శాస్త్రవేత్తలకు ఎంతో విలువైన సమాచారాన్ని అందించింది. ఈ ప్రయోగం ద్వారా చంద్రుడి వాతావరణం, ఎక్సోస్పియర్ (అత్యంత సన్నని వాతావరణ పొర) మరియు ఉపరితలంపై అంతరిక్ష వాతావరణం ఎలా ప్రభావం చూపుతుందో బాగా అర్థమైంది.చంద్రయాన్-2లో భాగంగా అమర్చిన CHACE-2 (Chandra’s Atmospheric Composition Explorer-2) పరికరం, సూర్యుడి నుండి వచ్చే కరోనల్ మాస్ ఎజెక్షన్ (CME) వల్ల చంద్రుడిపై జరిగే మార్పులను పరిశీలించింది. ముఖ్యంగా, 2024 మే 10న జరిగిన భారీ సౌర తుఫాన్ చంద్రుడిని తాకిన సమయంలో, చంద్రుడి ఎక్సోస్పియర్‌లో గణనీయమైన మార్పులు చోటుచేసుకున్నట్లు స్పష్టమైంది. ఆ సమయంలో పగటి వేళ ఎక్సోస్పియర్‌లో పీడనం ఆకస్మాత్తుగా పెరిగిందని, వాతావరణంలోని అణువుల సాంద్రత సుమారు పది రెట్లు పెరిగిందని ఇస్రో వెల్లడించింది.భూమికి ఉండే అయస్కాంత క్షేత్రం చంద్రుడికి లేకపోవడం వల్ల, సూర్య తుఫాన్ల సమయంలో విడుదలయ్యే కణాలు నేరుగా చంద్రుడి ఉపరితలాన్ని ఢీకొంటాయి. దాంతో, ఉపరితలంలోని అణువులు పైకి వెళ్లి ఎక్సోస్పియర్‌ను ప్రభావితం చేస్తాయి. ఈ వివరాలు చంద్రుడి వాతావరణానికి సంబంధించిన మెరుగైన అవగాహనను కలిగించడమే కాక, భవిష్యత్తులో చంద్రుడిపై పరిశోధనా కేంద్రాలు లేదా మానవ నివాసాలు ఏర్పాటుచేసే కృషికి దోహదపడతాయని శాస్త్రవేత్తలు పేర్కొన్నారు.గమనించదగ్గ విషయం ఏమిటంటే, ఇస్రో 2019 జూలై 22న చంద్రయాన్-2 మిషన్‌ను శ్రీహరికోట నుంచి ప్రయోగించింది. యాత్రలో ల్యాండర్ విక్రమ్‌తో సంబంధం కోల్పోయినా, ఆర్బిటర్ ఇంకా చంద్రుడి కక్ష్యలో విజయవంతంగా తిరుగుతూ అమూల్యమైన డేటాను పంపిస్తూనే ఉంది.ఈ నేపథ్యంలో, చంద్రయాన్-2లోని CHACE-2 పరికరం అందించిన తాజా సమాచారం చంద్రుడిపై సూర్య ప్రభావాన్ని అధ్యయనం చేయడంలో ఓ కీలక మైలురాయిగా నిలిచింది. భవిష్యత్ చంద్ర మిషన్ల ప్రణాళికల్లో ఇది శాస్త్రవేత్తలకు మార్గదర్శకంగా ఉపయోగపడనుంది.