తునిలో అత్యాచార నిందితుని మరణంపై అనుమానాలు

తునిలో అత్యాచార నిందితుడు నారాయణరావు ఆత్మహత్యపై ఆయన కుటుంబ సభ్యులు అనుమానం వ్యక్తం చేస్తున్నారు. నారాయణరావును రాత్రి రిమాండ్‌కు తరలిస్తున్నట్లు పోలీసులు తమ ఇంటికి వచ్చి సంతకాలు తీసుకున్నారని తెలిపారు. అదే సమయంలో నారాయణరావు చెరువులో దూకి చనిపోయారని పోలీసులు ఇప్పుడు చెబుతున్నారని వారు ఆరోపిస్తున్నారు. ఈ నేపథ్యంలో నారాయణరావు మృతిపై తనకు సందేహాలు ఉన్నాయని వారు స్పష్టం చేశారు. నారాయణరావును పోలీస్ స్టేషన్ నుంచి రిమాండ్‌ తరలించిన మార్గ మధ్యలోని సీసీ కెమెరాలను బయట పెట్టాలంటూ అతడి కుమారుడు సురేష్, కోడలు డిమాండ్ చేస్తున్నారు.ఉమ్మడి కాకినాడ జిల్లా తొండంగి సమీపంలోని ఒక తోటలో బాలికపై నారాయణరావు (62) అత్యాచారానికి ఒడిగట్టాడు. ఆ సమీపంలోని ఒక వ్యక్తి.. నారాణరావు వ్యవహారాన్ని వీడియో తీశాడు. దీనిపై నారాయణరావును నిలదీశాడు. అనంతరం పోలీసులకు ఫిర్యాదు చేశాడు. ఈ విషయం తెలిసిన బాలిక కుటుంబ సభ్యులతోపాటు స్థానికులు నారాయణరావుకు దేహశుద్ది చేసి.. పోలీసులకు అప్పగించారు. అతడిపై పోక్సో చట్టం కింద కేసు నమోదు చేశారు. అయితే బుధవారం రాత్రి అతడిని తుని పోలీస్ స్టేషన్ నుంచి కోర్టుకు పోలీసులు తరలించారు. ఆ క్రమంలో టాయిలెట్‌కు వెళ్లాలని పోలీసులకు చెప్పాడు. దాంతో తుని శివారులోని చెరువు పక్కన పోలీసు వాహనాన్ని ఆపారు. వాహనం దిగిన అతడు చెరువులో దూకాడు. వెంటనే గజ ఈతగాళ్లను పిలిపించి.. చెరువులో నారాయణ రావు కోసం గాలింపు చర్యలు చేపట్టారు. అర్థరాత్రి కావడంతో మృతదేహం లభ్యం కాలేదు. గురువారం ఉదయం నారాయణరావు మృతదేహాన్ని వెలికి తీశారు. అయితే నారాయణరావును రిమాండ్‌కు తరలిస్తున్నామంటూ తమ వద్దకు సంతకాలు తీసుకునేందుకు పోలీసులు వచ్చారని.. అదే సమయంలో ఆయన చెరువులో దూకి ఆత్మహత్య చేసుకున్నారంటూ అతడి కుమారుడు, కోడలు ఆరోపిస్తున్నారు.