ఏఐఏడీఎంకే నుంచి సీనియర్ నేత సెంగోట్టైయన్‌ బహిష్కరణ

తమిళనాడు రాజకీయాల్లో కీలక పరిణామం చోటుచేసుకుంది. అన్నాడీఎంకే సీనియర్ నేత, మాజీ మంత్రి కేఏ సెంగోట్టైయన్‌ను పార్టీ నుంచి బహిష్కరించారు. పార్టీ నుంచి గతంలో బహిష్కరణకు గురైన మాజీ ముఖ్యమంత్రి పన్నీర్‌సెల్వం, జయలలిత నెచ్చెలి శశికళ, టీటీవీ దినకరన్‌లను తిరిగి చేర్చుకోవాలని ఆయన సూచించడమే ఈ నిర్ణయానికి కారణమైంది. ఈ బహిష్కరణ తనను తీవ్ర వేదనకు గురిచేసిందని, కన్నీళ్లు ఆగడం లేదని, నిద్రలేని రాత్రులు గడుపుతున్నానని సెంగోట్టైయన్‌ ఆవేదన వ్యక్తం చేశారు.పార్టీలో అర్ధశతాబ్దానికి పైగా పనిచేసిన తనకు కనీసం షోకాజ్ నోటీసు ఇవ్వకుండా, వివరణ కోరకుండా ఏకపక్షంగా బహిష్కరించడం తనను తీవ్రంగా బాధించిందని ఆయన అన్నారు. బహిష్కృత నేతలను చేర్చుకోవాలని తాను పార్టీకి ఎలాంటి అల్టిమేటం జారీ చేయలేదని, కేవలం చర్చలు జరిపి నిర్ణయం తీసుకోవాలని మాత్రమే కోరానని స్పష్టం చేశారు. ఎంజీఆర్, జయలలిత కలలను సాకారం చేసేందుకే ఈ సూచన చేశానని తెలిపారు.ఈ సందర్భంగా పార్టీ ప్రధాన కార్యదర్శి పళనిస్వామి సెంగోట్టైయన్‌ ప్రత్యక్ష విమర్శలకు దిగారు. తనను అధికార డీఎంకేకు 'బీ-టీమ్' అని ఈపీఎస్ అనడంపై ఆయన మండిపడ్డారు.దేశానికే తెలుసు అసలు బీ-టీమ్ ఎవరో. నేను ఎవరికీ బీ-టీమ్ కాదు, కానీ ఈపీఎస్‌ మాత్రం ఏ-టీమ్ అంటూ ఆయన పరోక్షంగా తీవ్ర ఆరోపణలు చేశారు. బహిష్కృత నేతలతో తాను మాట్లాడింది నిజమేనని ఆయన అంగీకరించారు.పార్టీ కోసం తాను ఎన్నో త్యాగాలు చేశానని సెంగోట్టైయన్‌ గుర్తుచేసుకున్నారు. ఎంజీఆర్ హయాం నుంచి పార్టీకి అంకితభావంతో పనిచేస్తున్నానని, తన నిబద్ధతను ఎంజీఆర్, జయలలిత సైతం మెచ్చుకున్నారని తెలిపారు. జయలలిత మరణానంతరం శశికళ చక్రం తిప్పినప్పుడు, పార్టీ చీలిపోకుండా ఉండేందుకు తనకు వచ్చిన నాయకత్వ అవకాశాన్ని సైతం వదులుకుని పళనిస్వామికి మద్దతిచ్చిన విషయాన్ని ఆయన ప్రస్తావించారు.మరోవైపు, సెంగోట్టైయన్‌ బహిష్కరణపై ఏఐఏడీఎంకే అధిష్ఠానం వివరణ ఇచ్చింది. కొన్ని తెలియని కారణాలతో పార్టీ నుంచి బహిష్కరించబడిన వ్యక్తులతో ఆయన సంబంధాలు కొనసాగించారని, క్రమశిక్షణను ఉల్లంఘించి పార్టీ ప్రతిష్ఠకు భంగం కలిగించారని ఆరోపించింది. సెంగోట్టైయన్‌తో పార్టీ సభ్యులెవరూ ఎలాంటి సంబంధాలు పెట్టుకోవద్దని పళనిస్వామి ఆదేశాలు జారీ చేశారు.