చైనాకు షాక్‌! రేర్ ఎర్త్ మ్యాగ్నెట్స్ తయారీలో భారత్‌కి గ్రీన్ సిగ్నల్ ఇచ్చిన మోదీ ప్రభుత్వం!

*రేర్ ఎర్త్ మాగ్నెట్స్‌ – ప్రపంచ దృష్టిని ఆకర్షిస్తున్న కొత్త సంపద : ప్రస్తుతం ప్రపంచమంతా మాట్లాడుకుంటున్న విషయం — రేర్ ఎర్త్ మాగ్నెట్స్. ఒకప్పుడు పెట్రోలియం ఉత్పత్తులు ఉన్న దేశాలను అత్యంత ధనిక దేశాలుగా, బంగారం, వెండి లేదా ఇతర ఖనిజ నిక్షేపాలు కలిగిన దేశాలను శక్తివంతమైన దేశాలుగా భావించేవారు. అయితే ఇప్పుడు పరిస్థితులు మారిపోయాయి. నేటి ప్రపంచ ఆర్థిక వ్యవస్థలో కొత్త శక్తిగా ఎదుగుతున్నది రేర్ ఎర్త్ మాగ్నెట్స్‌.వీటిని భూమిలో లభించే రేర్ ఎర్త్ మినరల్స్‌ (Rare-Earth Minerals) ద్వారా తయారు చేస్తారు. ప్రస్తుతం బుల్లెట్ ట్రైన్స్‌, ఎలక్ట్రిక్ వాహనాలు, మొబైల్స్‌, ల్యాప్‌టాప్‌లు, విండ్‌ టర్బైన్స్‌ వంటి అనేక ఆధునిక పరికరాల్లో వీటి వినియోగం కీలకంగా మారింది. భూమి పొరల్లో ఈ ఖనిజాలు చాలా తక్కువ మోతాదులోనే లభిస్తాయి. వాటిని వెలికి తీసి శుద్ధి చేసి రేర్ ఎర్త్ మాగ్నెట్స్‌ రూపంలో తయారు చేస్తే దేశానికి భారీ ఆదాయం లభిస్తుంది.ఈ రంగంలో ప్రస్తుతం చైనా ప్రపంచ నేతృత్వం వహిస్తోంది. చైనా వీటి ప్రాముఖ్యతను చాలా ముందుగానే గుర్తించి, రేర్ ఎర్త్ మాగ్నెట్స్‌ తయారీలో ప్రపంచ మార్కెట్‌లో దాదాపు 90 శాతం వాటాను సంపాదించింది.
*చైనా ఆధిపత్యం – అమెరికా, భారత్‌పై ప్రభావం :ఇటీవల అమెరికా–చైనా వాణిజ్య యుద్ధం ప్రారంభమైన సమయంలో, చైనా రేర్ ఎర్త్ మాగ్నెట్స్‌ సరఫరాను ఒక్కసారిగా నిలిపివేసింది. దీని ఫలితంగా అమెరికా పరిశ్రమలు తీవ్ర ప్రభావాన్ని ఎదుర్కొన్నాయి. ఆర్థిక ఇబ్బందులను నివారించేందుకు అమెరికా చైనాతో కొత్త వాణిజ్య ఒప్పందం చేసుకోవాల్సి వచ్చింది.భారత్ కూడా ఇప్పటివరకు రేర్ ఎర్త్ మాగ్నెట్స్‌ కోసం ఎక్కువగా చైనాపైనే ఆధారపడుతోంది. ఈ ఆధారాన్ని తగ్గించేందుకు భారత ప్రభుత్వం స్వయం సమృద్ధి దిశగా అడుగులు వేస్తోంది. ఇందుకోసం సుమారు ₹7,000 కోట్ల పెట్టుబడితో దేశీయ రేర్ ఎర్త్ మాగ్నెట్‌ తయారీ ప్రాజెక్ట్‌ను ప్రారంభించే యోచనలో ఉంది. ఈ ప్రణాళికకు త్వరలో కేంద్ర కేబినెట్‌ ఆమోదం తెలపనున్నట్లు సమాచారం.
*రేర్ ఎర్త్ మినరల్స్‌ అంటే ఏమిటి : భూమిలో లభించే అరుదైన లోహ మూలకాలను రేర్ ఎర్త్ మినరల్స్‌ అంటారు. శాస్త్రవేత్తల ప్రకారం ఇవి మొత్తం 17 మూలకాలు. వీటిలో 15 లాంథనైడ్ మూలకాలు (Lanthanides) కాగా, మిగిలిన రెండు స్కాండియం (Scandium) మరియు ఇట్రియం (Yttrium). ఈ మూలకాలు భూమి పొరల్లో చాలా అరుదుగా లభిస్తాయి. అందువల్ల వీటిని తవ్వి శుద్ధి చేయడం క్లిష్టమైన మరియు ఖర్చుతో కూడుకున్న ప్రక్రియగా ఉంటుంది.సాధారణంగా బొగ్గు, ఇనుము లేదా క్రూడ్ ఆయిల్‌ పెద్ద మొత్తాల్లో ఒకే ప్రాంతంలో లభిస్తాయి. కానీ రేర్ ఎర్త్ మినరల్స్‌ మాత్రం విస్తారంగా విరజిమ్మబడిన తక్కువ మోతాదుల్లో ఉంటాయి. వాటిని వెలికి తీయడం, శుద్ధి చేయడం సాంకేతికంగా చాలా కష్టతరం.
*వీటి ప్రత్యేకత :ఈ రేర్ ఎర్త్ మూలకాలలో అత్యంత శక్తివంతమైన అయస్కాంత లక్షణం ఉంటుంది. ఇవి అధిక ఉష్ణోగ్రతలను తట్టుకోగలవు మరియు విద్యుత్‌ను సమర్థవంతంగా ప్రసరించగలవు. అందువల్ల ఇవి ఎలక్ట్రానిక్ పరికరాలు, రక్షణ రంగం, ఆటోమొబైల్‌ పరిశ్రమ, అంతరిక్ష పరిశోధన వంటి కీలక రంగాల్లో విస్తృతంగా ఉపయోగపడుతున్నాయి.భారత్ ఇప్పుడు ఈ రంగంలోకి అడుగుపెట్టడం చైనాకు గట్టి పోటీగా మారనుంది. దేశీయ స్థాయిలో రేర్ ఎర్త్ మాగ్నెట్స్‌ తయారీ ప్రారంభమైతే, అది భారత ఆర్థిక వ్యవస్థకు బలం చేకూర్చడమే కాకుండా, ప్రపంచ మార్కెట్లో భారత ప్రతిష్ఠను మరింత పెంచే అవకాశం ఉంది.