'బ్యాలెట్‌లో నా పేరు లేకపోవడం వల్లే ఓడిపోయాం': స్థానిక ఎన్నికల ఓటమిపై ట్రంప్ పోస్ట్

అమెరికాలో తాజాగా జరిగిన స్థానిక ఎన్నికల ఫలితాలు అధికార రిపబ్లికన్‌ పార్టీకి గట్టి షాకిచ్చాయి. దేశంలో అత్యంత కీలకంగా మారిన న్యూయార్క్‌ నగర మేయర్‌ పదవితో సహా పలు రాష్ట్రాల్లో జరిగిన ఎన్నికల్లో డెమోక్రటిక్‌ పార్టీ అభ్యర్థులు ఘన విజయం సాధించారు. ఈ ఫలితాలపై ఆ దేశ అధ్యక్షుడు డొనాల్డ్‌ ట్రంప్‌ తీవ్రంగా స్పందించారు. ముఖ్యంగా సోషల్ మీడియా వేదికగా ఓ పోస్టు పెడుతూ.. అందులో రిపబ్లికన్ల ఓటమికి కారణాలను వెల్లడించారు. ముఖ్యంగా బ్యాలెట్‌పై తన పేరు లేకపోవడం వల్లే ఇలా జరిగిందని పేర్కొన్నారు.

ఎన్నికల్లో రిపబ్లికన్‌లు ఓడిపోవడానికి కారణాలను విశ్లేషిస్తూ ఒక పోల్‌స్టర్‌ సర్వే అభిప్రాయాన్ని ట్రంప్‌ తన సోషల్ మీడియా ప్లాట్‌ఫామ్ ట్రూత్‌ ఖాతాలో పంచుకున్నారు. "బ్యాలెట్‌లో నా పేరు లేకపోవడం, నెల రోజులకు పైగా కొనసాగుతున్న ఫెడరల్‌ షట్‌డౌన్‌ కారణంగా రిపబ్లికన్లకు ఓటమి తప్పలేదని అర్థం వచ్చేలా ట్రంప్‌ పోస్ట్ చేశారు. ప్రస్తుతం ఈ పోస్ట్ నెట్టింట వైరల్‌గా మారింది. ఎన్నికల ఫలితాలు తమకు వ్యతిరేకంగా రావడంతో.. ట్రంప్‌ కాలిఫోర్నియాలో జరిగిన ఎన్నికలపై తీవ్ర అసహనం వ్యక్తం చేశారు.

"రాజ్యాంగ విరుద్ధమైన రీమ్యాపింగ్‌ పేరుతో కాలిఫోర్నియాలో భారీ స్కామ్‌ జరిగింది. అంతేకాకుండా ఓటింగ్‌ ప్రక్రియలోనూ రిగ్గింగ్‌ చోటుచేసుకుంది. మెయిల్‌-ఇన్‌ ఓట్లను పక్కన పెట్టేశారు. ఇది చాలా తీవ్రమైన అంశం" అని ట్రంప్‌ ఆరోపించారు. స్థానిక ఎన్నికల్లో కూడా ట్రంప్‌ తరచూ ఇలాంటి ఆరోపణలు చేయడం గమనార్హం. ఇదిలా ఉండగా.. డెమోక్రాట్లు గెలిచిన కీలక పదవుల్లో ముఖ్యమైనది న్యూయార్క్ మేయర్ పదవి. భారతీయ మూలాలు ఉన్న డెమోక్రాట్‌ నేత జొహ్రాన్‌ మందానీ ఈ చారిత్రక విజయాన్ని సొంతం చేసుకున్నారు.

మరోవైపు న్యూజెర్సీ రాష్ట్రంలోనూ డెమోక్రటిక్‌ పార్టీకి చెందిన మైకీ షెరిల్‌ గవర్నర్‌గా గెలిచారు. 1960ల తర్వాత వరుసగా మూడు సార్లు న్యూజెర్సీ గవర్నర్‌ పదవిని డెమోక్రాట్లు దక్కించుకోవడం ఇది మొదటిసారి. అలాగే వర్జీనియాలోనూ డెమోక్రాట్‌ నేత ఆబిగేల్‌ స్పాన్‌బర్గర్‌ విజయం సాధించారు. ఈ ఫలితాలు రాబోయే జాతీయ ఎన్నికల్లో డెమోక్రాట్లకు ఉత్సాహాన్ని ఇస్తున్నాయి. స్థానిక సమస్యలు, ఆర్థికపరమైన ఆందోళనలు, ఆరోగ్య సంరక్షణ వంటి అంశాలపై డెమోక్రాట్లు దృష్టి సారించడం వల్లే ఈ విజయం సాధ్యమైందని రాజకీయ విశ్లేషకులు అభిప్రాయ పడుతున్నారు.