టేకాఫ్ అయిన కొద్దిసేపటికే కుప్పకూలిన కార్గో జెట్.. ముగ్గురి మృతి

అమెరికాలోని కెంటకీ స్టేట్‌లో మంగళవారం సాయంత్రం ఘోర విమాన ప్రమాదం జరిగింది. లూయిస్‌విల్లే ముహమ్మద్ అలీ అంతర్జాతీయ విమానాశ్రయం నుంచి టేకాఫ్ అయిన కొద్ది సేపటికే ముగ్గురు సిబ్బందితో కూడిన యూపీఎస్ కార్గో విమానం కుప్పకూలిపోయింది. ఈ భారీ విషాదంలో కనీసం ముగ్గురు మరణించగా.. మరో 11 మంది తీవ్రంగా గాయపడినట్లు గవర్నర్ ఆండీ బెషీర్.. విలేకరుల సమావేశంలో తెలిపారు. మృతుల, క్షతగాత్రుల సంఖ్య మరింత పెరిగే అవకాశం ఉందని ఆయన పేర్కొన్నారు.

ఈ విమాన ప్రమాదానికి సంబంధించిన వీడియోలు ప్రస్తుతం సోషల్ మీడియాలో తెగ వైరల్ అవుతున్నాయి. అందులో.. విమానం టేకాఫ్ అయిన వెంటనే దాని ఒక వైపు రెక్కకు మంటలు అంటుకున్నాయి. ఈక్రమంలోనే విమానం నేలను తాకగా విమానం మొత్తం మంటలు వ్యాపించాయి. ప్రమాదం జరిగిన తర్వాత రన్‌వేకు అవతల ఉన్న పారిశ్రామిక ప్రాంతంలోని అనేక భవనాలకు కూడా మంటలు వ్యాపించాయి. దట్టమైన నల్లటి పొగ ఆకాశాన్ని కమ్మేసింది. అయితే ఈ ప్రమాదంలో ముగ్గురు మరణించగా.. 11 మంది గాయపడ్డారు. ఈ ఘటనపై గవర్నర్ బెషీర్ స్పందిస్తూ.. గాయపడిన వారిలో కొందరికి తీవ్రమైన గాయాలు య్యాయని, వారికి స్థానిక ఆసుపత్రులలో మెరుగైన వైద్య చికిత్స అందిస్తున్నామని తెలిపారు.

హోనోలులుకు బయలుదేరిన విమానం

ఫెడరల్ ఏవియేషన్ అడ్మినిస్ట్రేషన్ (FAA) తెలిపిన వివరాల ప్రకారం.. ఈ యూపీఎస్ ఫ్లైట్ నంబర్ 2976 స్థానిక కాలమానం ప్రకారం మంగళవారం సాయంత్రం 5.15 గంటలకు బయలుదేరింది. ఈ విమానం హవాయిలోని హోనోలులులో ఉన్న డానియల్ కె. ఇనౌయే అంతర్జాతీయ విమానాశ్రయానిక వెళ్తోంది. కానీ దురదృష్టవశాత్తు టేకాఫ్ అయిన కాసేపటికో ప్రమాదం జరిగింది. అయితే ఈ ఘటనపై ఎఫ్‌ఏఏ, నేషనల్ ట్రాన్స్‌పోర్టేషన్ సేఫ్టీ బోర్డు (NTSB)తో కలిసి ఈ ప్రమాదంపై విచారణ జరుపుతోంది.

లూయిస్‌విల్లే నివాసితులు ఈ ఘోర ప్రమాదాన్ని చూసి నిర్ఘాంతపోయారు. విమానాశ్రయానికి ఐదు మైళ్ల దూరంలోని కిరాణా దుకాణం వద్ద ఉన్న అమాండా రిహే అనే వ్యక్తి.. భారీ నల్లటి పొగను చూసి ఏదో పెద్ద ప్రమాదం జరిగిందని ఊహించారు. కొద్ది నిమిషాల తర్వాత విమానం కూలిపోయిందని తెలిసి తన నోట మాట రాలేదని ఆమె తెలిపారు. మరోవైపు జస్టిన్ డన్, అతని కుమారుడు ఆకాశం నుంచి కింద పడుతున్న విమానం శకలాలను చూశారు. ఈ ప్రమాదం తన జీవితంలో ఎప్పుడూ చూడలేదని డన్ తీవ్ర ఆవేదన వ్యక్తం చేశారు.