ఒక్క తప్పుతో హీరోను కాస్తా విలన్ అయ్యా,,,ప్రవీణ్ ప్రకాష్

రిటైర్డ్ ఐఏఎస్ ఆఫీసర్ ప్రవీణ్ ప్రకాష్.. వైసీపీ హయాంలో తాను వ్యవహరించిన తీరుపై పశ్చాత్తాపం వ్యక్తం చేశారు. ఈ మేరకు క్షమాపణ చెప్తూ సోషల్ మీడియాలో వీడియో షేర్ చేశారు., ఇంటెలిజెన్స్‌ మాజీ చీఫ్‌ ఏబీ వెంకటేశ్వరరావు, రిటైర్డ్‌ ఐఆర్‌ఎస్‌ ఆఫీసర్ జాస్తి కృష్ణకిశోర్‌ పట్ల తాను అనుచితంగా ప్రవర్తించానంటూ.. వారికి బహిరంగ క్షమాపణలు చెప్పారు ప్రవీణ్ ప్రకాష్ . సర్వీసులో ఉన్న సమయంలో వారిపట్ల అనుచితంగా ప్రవర్తించినందుకు చింతిస్తున్నట్లు పేర్కొన్నారు. గత సంవత్సరం సోషల్ మీడియాలో తనపై దారుణంగా ట్రోలింగ్ జరిగిందని ప్రవీణ్ ప్రకాష్ అన్నారు. దీంతో ఏం తప్పు చేశానోనని తీవ్రంగా ఆలోచించినట్లు చెప్పారు.

ఆంధ్రప్రదేశ్‌లో 30 ఏళ్ల పాటు పని చేశానన్న ప్రవీణ్ ప్రకాష్.. తన సర్వీస్‌లో రూపాయి కూడా అక్రమంగా సంపాదించలేదన్నారు. అలాగే చట్టాన్ని ఉల్లంఘించి.. చట్టానికి విరుద్ధంగా ఏ పని చేయలేదని చెప్పుకొచ్చారు. గుంటూరు, విజయవాడ మున్సిపల్ కమిషనర్‌గా పనిచేసిన సమయంలో.. అక్కడ చేసిన సేవలు తనను హీరోను చేశాయన్నారు. అయితే ఒక్క తప్పు కారణంగా హీరోను కాస్తా విలన్‌గా మారిపోయానన్నారు. తప్పు చేశాననే భావనతోనే వాలంటరీ రిటైర్మెంట్ కోసం దరఖాస్తు చేసినట్లు ప్రవీణ్ ప్రకాష్ అన్నారు.

మరోవైపు 2020 సంవత్సరంలో తాను ఏపీ ప్రిన్సిపల్ సెక్రటరీగా పనిచేశానని.. ఆ సమయంలోనే ఏబీ వెంకటేశ్వరరావుపై క్రమశిక్షణ చర్యలు తీసుకోవాలని తన వద్దకు ఫైల్ వచ్చిందని ప్రవీణ్ ప్రకాష్ అన్నారు. ఆ ఫైల్ డీజీపీ ఆఫీస్ నుంచి వచ్చిందన్నారు. ఏబీవీ తనకంటే ఐదేళ్లు సీనియర్ అని చెప్పిన ప్రవీణ్ ప్రకాష్.. డీజీపీ ఆఫీస్ నుంచి వచ్చిన ఫైల్ ప్రకారమే ఆయనపై చర్యలు తీసుకోమని చెప్పినట్లు గుర్తు చేసుకున్నారు. ఏబీవీ విషయంలో తాను చేసిన తప్పు అర్థమైందని.. జాస్తి కృష్ణకిషోర్ విషయంలోనూ తప్పు జరిగిందన్నారు. ఈ నేపథ్యంలోనే ఏబీ వెంకటేశ్వరరావు, కృష్ణకిషోర్‌కు ఇప్పటికే క్షమాపణలు చెప్పానని ప్రవీణ్ ప్రకాష్ చెప్పారు. అందరికీ తెలియాలనే ఉద్దేశంతోనే బహిరంగ క్షమాపణలు చెప్తున్నానని వీడియోలో ప్రవీణ్ ప్రకాష్ చెప్పుకొచ్చారు.

గతేడాది సోషల్ మీడియాలో తనపై ట్రోలింగ్ జరిగిన తర్వాత.. తాను పునరాలోచించుకున్నట్లు ప్రవీణ్ ప్రకాష్ చెప్పారు. ఆ సమయంలో తన ప్రవర్తన పట్ల ఆలోచన చేసుకుని.. తప్పు చేశానని గ్రహించి.. తన కారణంగా బాధపడిన అధికారులకు క్షమాపణ చెప్పాలని నిర్ణయించుకున్నట్లు ప్రవీణ్ ప్రకాష్ తెలిపారు. తన చర్యల వల్ల ఇబ్బందిపడిన ఏబీవీ, జాస్తి కృష్ణకిశోర్‌ను క్షమించమని కోరారు ప్రవీణ్ ప్రకాష్..