ఒక్క రోజులో పెళ్లి.. ఇంతలో పెళ్లి కొడుకు చేసిన పనికి

పెళ్లి సందడితో కళకళలాడాల్సిన రెండు కుటుంబాల్లో అంతులేని విషాదం అలుముకుంది. ఒక్క రోజులో పెళ్లి పీటలు ఎక్కాల్సిన యువకుడు.. క్షణికావేశంలో ఆత్మహత్యకు పాల్పడ్డాడు. దీంతో వరుడు, వధువు రెండు కుటుంబాల్లోనూ తీరని శోకం అలుముకుంది. నిజామాబాద్ జిల్లా ఎడపల్లి మండలంలోని మంగళ్ పహాడ్ గ్రామంలో ఈ ఘటన చోటు చేసకుంది. కాబోయే పెళ్లి కుమారుడు తీసుకున్న దురదృష్టకర నిర్ణయంతో యువకుడి తల్లిదండ్రులు, కుటుంబ సభ్యులు గుండెలవిసేలా రోదిస్తున్నారు.

వివరాల్లోకి వెళితే.. గ్రామానికి చెందిన చేవూరి ప్రతాప్ గౌడ్ (31) వృత్తి రీత్యా వ్యవసాయం చేస్తుంటాడు. ముగ్గురు అన్నదమ్ముల్లో ఇతను చిన్నవాడు. ప్రతాప్‌కు ఇటీవలే వివాహం నిశ్చయమైంది. ఈ నెల 13వ తేదీన అతనికి పెళ్లి జరగాల్సి ఉంది. దీంతో కుటుంబ సభ్యులు పెళ్లికి సంబంధించిన అన్ని ఏర్పాట్లలో నిమగ్నమై ఉన్నారు. పెళ్లికి ముందు మంగళవారం ఇంట్లో పోచమ్మ పండుగ చేయాలని నిర్ణయించారు. అయితే ఇంట్లో బంధువులు ఏదో అన్నారని ప్రతాప్ మనస్తాపానికి గురైనట్లు తెలుస్తోంది. తీవ్ర ఆవేదనకు లోనైన ప్రతాప్ ఇంటి నుంచి బయటకు వెళ్లి తిరిగి రాలేదు. దీంతో కంగారు పడిన కుటుంబ సభ్యులు అతడి కోసం వెతకడం ప్రారంభించారు.

కుటుంబ సభ్యులు చుట్టుపక్కల ప్రాంతాలు, గ్రామానికి సమీపంలోని గుట్టపై వెతకగా.. అక్కడ ప్రతాప్ బైక్ కనిపించింది. ఆ దిశగా మరింతగా వెతకగా.. గుట్టపై ఒక చెట్టుకు వేలాడుతూ ప్రతాప్ కనిపించాడు. ఒక్క రోజులో పెళ్లి జరగాల్సిన కొడుకు విగతజీవిగా కనిపించడంతో తల్లిదండ్రులు, కుటుంబ సభ్యుల రోదనలు ఆ ప్రాంతమంతటా వినిపించాయి. వెంటనే స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాన్ని పరిశీలించి, పోస్టుమార్టం నిమిత్తం బోధన్ ప్రభుత్వ ఆసుపత్రికి తరలించారు.

కుటుంబ సభ్యుల ఫిర్యాదు మేరకు పోలీసులు కేసు నమోదు చేసుకున్నారు. పెళ్లి ఏర్పాట్ల సమయంలో, బంధువులు అన్న మాటల కారణంగానే ప్రతాప్ మనస్తాపానికి గురై ఆత్మహత్య చేసుకున్నాడా ? లేదా దీని వెనుక ఇంకేమైనా కారణాలు ఉన్నాయా? అనే కోణంలో పోలీసులు విచారణ ముమ్మరం చేశారు. క్షణికావేశంలో ప్రతాప్ తీసుకున్న ఈ నిర్ణయం కారణంగా ఒక వైపు పెళ్లికూతురు కుటుంబం, మరోవైపు పెళ్లికొడుకు కుటుంబం.. రెండు కుటుంబాలు కోలుకోలేని విషాదంలో మునిగిపోయాయి.