చలికాలంలో మీ చర్మం సంరక్షణకు ఈ చిట్కాలు పాటించండి

చలికాలం ప్రారంభమైంది. రోజు రోజుకి ఉష్ణోగ్రతలు తగ్గు ముఖం పడుతున్నాయి. చలికాలంలో చర్మ సమస్యలు చాలా మంది వేధిస్తాయి. చలి గాలులు చర్మాన్ని ప్రభావితం చేస్తాయి. గాలిలో తేమ లేకపోవడం వల్ల చర్మం పొడిబారుతుంది. అంతేకాకుండా చర్మం కూడా పగిలిపోతుంది.

ముఖంతో పాటు చేతులు, కాళ్ల చర్మం కూడా పగిలిపోవడం జరుగుతుంది. పగిలిన చర్మం కారణంగా దురద పుడుతుంది. తగినంత తేమతో పాటు పోషకాహారం లేకపోవడం వల్ల పొడి చర్మం ఏర్పడుతుందని నిపుణులు అంటున్నారు. పొడి చర్మం అధికంగా మారినప్పుడు, అది పొరలుగా మారడం ప్రారంభమవుతుంది.

పొరలుగా మారడం ఆరోగ్యకరమైన చర్మానికి సంకేతం కాదు. అంతేకాకుండా ముఖం అందంగా కనిపించదు. చాలా మంది ఈ సమస్యకు చెక్ పెట్టడానికి మార్కెట్లో దొరికే లోషన్స్, క్రీములు వాడుతుంటారు. అయినా ఫలితం ఉండదు. అయితే, ప్రముఖ ఆయుర్వేద డాక్టర్ సలీం జైదీ ఈ సమస్యకు కొన్ని ఇంటి చిట్కాలు చెప్పారు. ఆ చిట్కాలేంటో ఇప్పుడు చుద్దాం.

పాలు, తేనె కాంబినేషన్

​తేనె చర్మానికి సహజ మాయిశ్చరైజర్ అని నిపుణులు అంటారు.. ఇది తేమను లాక్ చేస్తుంది. దీంతో చర్మం మృదువుగా మారుతుంది. ఇక, పాలలోని లాక్టిక్ ఆమ్లం తేలికపాటి ఎక్స్‌ఫోలియేటర్‌గా పనిచేస్తుంది. ఇందుకోసం ఒక టేబుల్ స్పూన్ ఫుల్లీ ఫ్యాట్ ఉన్న పచ్చి పాలు తీసుకోండి. అందులో ఒక టేబుల్ స్పూన్ తేనె వేసి బాగా కలపండి.

ఈ మిశ్రమాన్ని ముఖం, కాళ్లు, చేతులు, మెడకు అప్లై చేయండి. ఆరిన తర్వాత నీటితో శుభ్రం చేసుకోండి. ఆ తర్వాత మాయిశ్చరైజర్ కూడా అప్లై చేసుకోవచ్చు. పచ్చి పాలను తేనెతో కలిపి ముఖానికి అప్లై చేసినప్పుడు చర్మానికి తగిన తేమ అందుతుంది. మీరు పొడి చర్మంతో బాధపడుతుంటే ఈ చలికాలంలో రోజూ దీన్ని వాడవచ్చు.

కొబ్బరి నూనె

చలికాలంలో పొడి చర్మానికి బెస్ట్ ఆప్షన్ కొబ్బరి నూనె. ఇది సహజమైన, ప్రభావవంతమైన పరిష్కారం. కొబ్బరి నూనె చర్మానికి చాలా ప్రయోజనకరంగా ఉంటుంది. ఎందుకంటే ఇందులో యాంటీఆక్సిడెంట్లు, విటమిన్ ఇ, కొవ్వు ఆమ్లాలు ఉంటాయి. ఇవి చర్మాన్ని తేమగా ఉంచుతాయి.

​కొబ్బరి నూనె మాయిశ్చరైజింగ్ క్రీమ్ లాగానే ప్రభావవంతంగా ఉంటుందని డాక్టర్ అంటున్నారు. కొబ్బరి నూనె సంతృప్త కొవ్వు ఆమ్లాలు ఎమోలియెంట్లుగా పనిచేస్తాయి. ఇవి చర్మపు పగుళ్లను పూరిస్తాయి. దీంతో, చర్మం మృదువుగా మారుతుంది. కోల్డ్ ప్రెస్డ్ కొబ్బరి నూనె మాత్రమే వాడాలని డాక్టర్ అంటున్నారు.

ఇందుకోసం కోల్డ్ ప్రెస్డ్ కొబ్బరి నూనెను గోరు వెచ్చగా చేసుకుని.. రాత్రి నిద్రపోయే ముందు మొత్తం శరీరానికి అప్లై చేసుకోవాలని డాక్టర్ సూచిస్తున్నారు. ఉదయాన్నే నిద్ర లేచిన వెంటనే గోరువెచ్చని నీటితో స్నానం చేయాలి. దీంతో మీ స్కిన్ సాఫ్ట్‌గా మారుతుంది.

కలబంద + గ్లిజరిన్ మిశ్రమం

కలబందలో యాంటీఆక్సిడెంట్ లక్షణాలు ఉన్నాయి. ఇవి చర్మాన్ని ఫ్రీ రాడికల్స్ వల్ల కలిగే నష్టం నుంచి రక్షించడంలో సాయపడతాయి. కలబంద, గ్లిజరిన్ మిశ్రమాన్ని ముఖానికి అప్లై చేయడం వల్ల చర్మం దెబ్బతినదు. పొడి చర్మం ఉన్నవారికి ఇది బెస్ట్ ఆప్షన్. ఈ కాంబినేషన్ చలికాలంలో పొడి చర్మం బారి నుంచి రక్షిస్తుంది.

ఇది చర్మాన్ని హైడ్రేట్‌గా ఉంచుతుంది. ఇందుకోసం 2 టీస్పూన్ల కలబంద జెల్ తీసుకొని, గ్లిజరిన్ వేసి ముఖానికి అప్లై చేయండి. 15-20 నిమిషాల తర్వాత, ముఖాన్ని నీటితో శుభ్రం చేసుకోండి. ఇది చర్మాన్ని మృదువుగా చేస్తుంది. చలికాలంలో ప్రతిరోజూ ఈ మిశ్రమాన్ని ముఖానికి అప్లై చేయవచ్చని డాక్టర్ అంటున్నారు.

తేనె, అరటిపండు మిశ్రమం

తేనె, అరటిపండ్లతో తయారు చేసిన ఫేస్ ప్యాక్ పొడి చర్మాన్ని తగ్గించడంలో సాయపడుతుంది. ఇది తేమను నిర్వహించడానికి, చర్మాన్ని మృదువుగా చేయడానికి తోడ్పడుతుంది. ఇందుకోసం.. ఒక టీస్పూన్ తేనె, ఒక టేబుల్ స్పూన్ పండిన అరటిపండు గుజ్జును బాగా కలపండి.

ఈ ప్యాక్‌ను ముఖం మొత్తానికి పూర్తిగా అప్లై చేసి 15 నిమిషాలు అలాగే ఉంచండి. ఆ తర్వాత ముఖాన్ని చల్లటి నీటితో శుభ్రం చేసుకోండి. పగిలిన చేతులు, కాళ్లకి కూడా ఈ మిశ్రమాన్ని అప్లై చేసుకోవచ్చు. దీంతో, మీ చర్మానికి కావాల్సిన తేమ లభిస్తుంది. దీంతో మీ చర్మం మృదువుగా మారుతుందని డాక్టర్ చెబుతున్నారు.

పాల మీగడ లేదా పాల క్రీమ్

పొడి చర్మం కోసం ఖరీదైన క్రీములు అక్కర్లేదు. పాల మీగడ లేదా క్రీమ్ పొడి చర్మానికి బెస్ట్ ఆప్షన్ అంటున్నారు డాక్టర్ సలీం జైదీ. ఇందులో సహజ కొవ్వులు ఉంటాయి. ఇది సహజ మాయిశ్చరైజర్‌గా పనిచేస్తుంది. అంతేకాకుండా ఇది ఉపయోగించడం వల్ల ఎటువంటి సైడ్ ఎఫెక్ట్స్ కూడా ఉండవు. పొడి, నిర్జీవమైన చర్మం ఉన్నవారికి ఇది బాగా పనికొస్తుంది.

ఇది సహజ క్లెన్సర్‌గా పని చేసి ముఖం మీద మలినాలన్నీ తొలగిస్తుంది. ఇందుకోసం ఫ్రెష్ పాల మీగడ తీసుకుని ముఖానికి, మెడకి, చేతులు, కాళ్లకి అప్లై చేసుకోవాలి. సర్క్యులర్ షేపులో అప్లై చేసి మసాజ్ చేసుకోవాలని డాక్టర్ సూచిస్తున్నారు. ఓ ఐదు నుంచి పది నిమిషాలు అలాగే ఉంచి.. గోరు వెచ్చని నీటితో శుభ్రం చేసుకోవాలి. పగిలిన పెదాలకు కూడా దీన్ని అప్లై చేసుకోవచ్చని డాక్టర్ అంటున్నారు.