పాక్‌ మీదుగా భారత్‌లోకి చైనా, టర్కీ ఆయుధాలు

అంతర్జాతీయ అక్రమాల ఆయుధాల రాకెట్‌ను ఢిల్లీ పోలీసులు చేధించారు. చైనా, టర్కీలో తయారైన అధునాతన ఆయుధాలను పాకిస్థాన్ గూఢచారి సంస్థ ఇంటర్ సర్వీసెస్ ఇంటెలిజెన్స్ (ఐఎస్ఐ)తో సంబంధాలున్న ముఠా భారత్‌లోకి తరలిస్తుండగా పట్టుకున్నట్టు అధికారులు తెలిపారు. ఆయుధాల అక్రమ రవాణా ముఠాకు చెందిన నలుగురు కీలక సభ్యులను అరెస్ట్ చేసి 10 విదేశీ పిస్టల్స్, 92 లైవ్ కార్ట్రేజలను స్వాధీనం చేసుకున్నారు. ఈ ఆయుధాలను దేశ రాజధాని ఢిల్లీ, చుట్టుపక్కల రాష్ట్రాల్లోని క్రిమినల్స్‌కు సరఫరా చేస్తున్నట్టు పేర్కొన్నారు. పాక్‌ నుంచి డ్రోన్‌ల సాయంతో వీటిని తీసుకొస్తుండగా పోలీసులకు చిక్కారు.

దేశంలో వీరు విక్రయించిన ఆయుధాల సంఖ్యను, ఈ అక్రమ రాకెట్‌లో పాల్గొన్న ముఠాలు లేదా వ్యక్తులను పోలీసులు గుర్తించే పనిలో ఉన్నారు. భద్రతా సంస్థలు మొబైల్ ఫోన్లు, బ్యాంక్ వివరాలు, సోషల్ మీడియా ద్వారా ముఠాలోని ఇతర సభ్యులు, వారి సంబంధాలను కూడా దర్యాప్తు చేస్తున్నారు. నవంబరు 10న ఎర్రకోట వద్ద పేలుడు ఘటన నేపథ్యంలో ఢిల్లీ సహా దేశవ్యాప్తంగా భద్రతను పెంచిన విషయం తెలిసిందే. ఎర్రకోట వద్ద హ్యుండయ్ ఐ20 కారు నడుపుకుంటూ వచ్చిన ఆత్మాహుతి బాంబర్ డాక్టర్ ఉమర్ నబీ పేలుడుకు పాల్పడ్డాడు. ఈ ఘటనలో 15 మంది ప్రాణాలు కోల్పోగా.. 30 మంది వరకు గాయపడ్డారు.

భారీగా ఆయుధాలను తరస్తున్నట్టు నిఘా వర్గాల నుంచి సమాచారం అందడంతో డీసీపీ సంజీవ్‌ కుమార్‌ యాదవ్‌ నేతృత్వంలోని పోలీసుల బృందం ఆపరేషన్‌ చేపట్టింది. పలు ప్రాంతాల్లో నిఘాను పటిష్ఠం చేయడంతో రోహిణిలో మాడ్యూల్ గుట్టురట్టయ్యింది. డ్రోన్‌లను ఉపయోగించి పాకిస్థాన్‌ నుంచి ఆయుధాలను అక్రమంగా తీసుకొస్తున్నట్టు ప్రాథమిక విచారణలో వెల్లడైంది. పంజాబ్‌ సరిహద్దుల మీదుగా తీసుకొచ్చిన ఈ ఆయుధాలను లారెన్స్‌ బిష్ణోయ్‌, బాంబిహా, గోగి వంటి గ్యాంగ్‌‌లకు అందజేయడానికి నిందితులు ప్లాన్‌ చేసినట్లు సమాచారం. ఢిల్లీ పేలుడు తర్వాత పాకిస్థాన్ ఉగ్రవాద సంస్థ జైషే మహమ్మద్‌తో సంబంధం ఉన్న వైట్‌కాలర్ టెర్రర్ మాడ్యూల్‌ను జమ్మూ కశ్మీర్ పోలీసులు భగ్నం చేశారు.