బాత్రూమ్ ఈగల్ని తరిమికొట్టే ఇంటి చిట్కాలు

బాత్రూమ్ డ్రెయిన్ లేదా కిచెన్ సింక్ దగ్గర చిన్న చిన్న ఈగలు ఎగురుతూ, వాలడం మీరు గమనించే ఉంటారు. ఇవి సాధారణ ఈగల కంటే కొంచెం భిన్నంగా కనిపిస్తాయి. వీటిని డ్రెయిన్ ఫ్లైస్ అంటారు. ఇవి చాలా చిన్న పరిమాణంలో ఉంటాయి. బాత్రూమ్‌లో డ్రెయిన్ దగ్గర ఎక్కువగా కనిపించే ఈ ఈగలు చిరాకు పుట్టిస్తాయి. కనీసం స్నానాన్ని కూడా ప్రశాంతంగా చేసుకోనివ్వవు.

ఇవి లైట్ గోధుమ రంగులో ఉంటాయి. అవి బాగా ఎగరలేవు. అవి సాధారణంగా వాష్ బేసిన్లు, కిచెన్ సింక్లు లేదా బాత్రూమ్ డ్రెయిన్ల చుట్టూ గోడలకు అతుక్కుపోతాయి. ఈ ఈగలు అనేక రకాల వ్యాధులకు కూడా కారణమవుతాయి. మార్కెట్లో వాటిని వదిలించుకోవడానికి అనేక కెమికల్ ప్రొడక్ట్స ఉంటాయి. అయితే, వీటి వాసన అందరికీ పడదు. కొన్ని సులువైన ఇంటి చిట్కాల ద్వారా ఈ బాత్రూమ్ ఈగల పని పట్టొచ్చు. ఆ చిట్కాలేంటి, బాత్రూమ్ ఈగల్ని ఎలా వదిలించుకోవాలో ఇప్పుడు చుద్దాం.

నల్ల మిరియాల స్ప్రే

నల్ల మిరియాల్ని ఉపయోగించి బాత్రూమ్ ఈగల్ని సులభంగా వదిలించుకోవచ్చు. ఇందుకోసం నల్ల మిరియాల్ని మెత్తగా దంచి పొడి చేసుకోవాలి. ఆ తర్వాత రెండు టీ స్పూన్ల మిరియాల పొడిని.. ఒక కప్పు నీటిలో కలపండి. ఈ మిశ్రమాన్ని స్ప్రే బాటిల్‌లో నింపండి. ఈ ద్రావణాన్ని బాత్రూమ్ డ్రెయిన్ దగ్గర పిచికారీ చేయండి. అలాగే కిచెన్ సింక్, వంటగది మూలల్లో కూడా స్ప్రే చేయండి. నల్ల మిరియాల ఘాటైన వాసన దెబ్బకి బాత్రూమ్ ఈగలు పారిపోతాయి.

బాత్రూమ్ ఈగల్ని తరిమికొట్టే చిట్కాలు

బేకింగ్ సోడా, నిమ్మకాయ స్ప్రే

బాత్రూమ్ ఈగల్ని వదిలించుకోవడానికి బేకింగ్ సోడా, నిమ్మరసం కలిపి ఒక ద్రావణాన్ని తయారు చేసుకోవచ్చు. ఇందుకోసం ఒక కప్పు నీటిలో ఒక టీస్పూన్ బేకింగ్ సోడా కలిపి, అందులో రెండు నిమ్మకాయల రసాన్ని పిండండి. ఇప్పుడు ఈ ద్రావణాన్ని బాగా కలిపి స్ప్రే బాటిల్‌లో నింపుకోండి. బాత్రూమ్ ఈగలు ఎక్కువగా కనిపించే డ్రెయిన్లు, సింక్‌లు చుట్టూ పిచికారీ చేయండి. ఈ స్ప్రే దెబ్బకి బాత్రూమ్ ఈగలు మాయమై.. మళ్లీ తిరిగి రావు.

గుర్తించుకోవాల్సిన విషయాలు

​బాత్రూమ్ ఈగల్ని నివారించాలనుకుంటే.. డ్రెయిన్‌ల్ని శుభ్రంగా ఉంచండి. జుట్టు, షాంపూ ప్యాకెట్లు, చెత్తను డ్రెయిన్ దగ్గర లేకుండా చూసుకోండి. వారానికి ఒకసారి బాత్రూమ్ డ్రెయిన్‌ని క్లీన్ చేసుకోండి.

వేడి నీటిని రోజుకు ఒకసారి పోయడం వల్ల బాత్రూమ్ ఈగల పెరుగుదల ఆగిపోతుంది.

బాత్రూమ్‌లో నీరు పేరుకుపోనివ్వవద్దు. ఈగలు నిలిచి ఉన్న నీటిలో సంతానోత్పత్తి చేస్తాయి. అందువల్ల, ఉపయోగించిన తర్వాత ఎల్లప్పుడూ వైపర్‌తో బాత్రూమ్‌ను శుభ్రం చేయండి.

తేమ కూడా డ్రెయిన్‌ల దగ్గర ఈగలు, కీటకాలు సంతానోత్పత్తికి కారణమవుతుంది. బాత్రూమ్‌ని పొడిగా ఉంచడానికి ప్రయత్నించండి.