నల్లధనం ద్వారం తెరుచుకుపోతుందా?.. rs 2000 లోపు నగదు విరాళాల ఐటీ మినహాయింపుపై సుప్రీంకోర్టు కీలక విచారణ!

రాజకీయ పార్టీలకు గుర్తుతెలియని వ్యక్తుల నుంచి రూ.2 వేల కంటే తక్కువ నగదు విరాళాలకు ఆదాయపు పన్ను మినహాయింపు ఇవ్వడం రాజ్యాంగబద్ధమా అన్న ప్రశ్నను సుప్రీంకోర్టు సీరియస్‌గా పరిశీలిస్తోంది. ఈ మినహాయింపు ద్వారా నల్లధనం రాజకీయ నిధుల్లోకి సులువుగా ప్రవేశిస్తోందని, పారదర్శకత దెబ్బతింటోందని ఆరోపిస్తూ దాఖలైన పబ్లిక్ ఇంట్రెస్ట్ లిటిగేషన్ (PIL) పిటిషన్‌ను ధర్మాసనం విచారణకు స్వీకరించింది. ఈ విషయంలో రాజకీయ పార్టీలు ఎటువంటి జవాబుదారీతనం చూపడం లేదని పిటిషనర్ తరఫు న్యాయవాది వాదన వినిపించారు.
ప్రస్తుతం ఆదాయపు పన్ను చట్టం సెక్షన్ 13A ప్రకారం ఒక్కో వ్యక్తి నుంచి రూ.2,000 లేదా అంతకంటే తక్కువ నగదు విరాళం తీసుకుంటే దానికి ఎటువంటి రికార్డు అవసరం లేదు, దాత గుర్తింపు కూడా తెలపనక్కర్లేదు. ఈ లూప్‌హోల్‌ను దుర్వినియోగం చేస్తూ ఒకే వ్యక్తి లక్షల రూపాయల నల్లధనాన్ని చిన్న చిన్న మొత్తాలుగా విడిగా ఇచ్చి పార్టీ ఖాతాల్లోకి తరలిస్తున్నారని పిటిషన్‌లో పేర్కొన్నారు. దీని వల్ల ఎన్నికల్లో నల్లధనం ప్రవాహం ఆపడం అసాధ్యమవుతోందని ఆందోళన వ్యక్తమైంది.
అంతేకాదు, నగదు రూపంలో విరాళాలు స్వీకరించే పార్టీలకు ఎన్నికల కమిషన్ గుర్తు కేటాయించకూడదని, రాజకీయ పార్టీగా నమోదు చేయకూడదని కఠిన షరతులు విధించాలంటూ పిటిషనర్ డిమాండ్ చేశారు. పూర్తిగా బ్యాంకు ఛానెల్స్ ద్వారానే విరాళాలు స్వీకరించేలా ఆదేశాలు ఇవ్వాలని కోరారు. ఇది అమలైతే భారత రాజకీయ నిధుల్లో పారదర్శకత ఒక్కసారిగా పెరిగిపోతుందని వాదన ఉంది.
ఈ కీలక పిటిషన్‌పై తమ అభిప్రాయాలు తెలపాల్సిందిగా కేంద్ర ప్రభుత్వం, ఎన్నికల సంఘంతో పాటు దేశంలోని అన్ని ప్రధాన జాతీయ రాజకీయ పార్టీలకు సుప్రీంకోర్టు నోటీసులు జారీ చేసింది. రాబోయే విచారణల్లో ఈ విషయం దేశ రాజకీయ వ్యవస్థలో భారీ మార్పులకు దారి తీసే అవకాశం ఉంది. రూ.2 వేల నగదు విరాళం మినహాయింపు కొనసాగుతుందా… లేక నల్లధనానికి గుద్దులోపల ద్వారం మూసివేయబడుతుందా… అందరి చూపూ ఇప్పుడు అత్యున్నత న్యాయస్థానంపైనే ఉంది.