'జుబీన్ గార్గ్‌ది హత్యే': అసెంబ్లీలో సంచలన ప్రకటన చేసిన అస్సాం సీఎం

అస్సాం రాష్ట్రంలో అత్యంత ప్రజాదరణ పొందిన గాయకుడు జుబీన్ గార్గ్‌ది హత్యా, ప్రమాద వశాత్తు సంభవించిన మరణమా అని తేల్చేందుకు దర్యాప్తు సంస్థలు తీవ్రంగా కృషి చేస్తున్నాయి. ఇలాంటి సమయంలోనే అస్సాం ముఖ్యమంత్రి హిమంత బిశ్వ శర్మ అసెంబ్లీలో.. ఓ సంచలన ప్రకటన చేశారు. జుబీన్ గార్గ్‌ది ప్రమాద వశాత్తు సంభవించిన మరణం కాదని, ఆయనను కావాలనే హత్య చేశారంటూ సీఎం అసెంబ్లీ వేదికగా స్పష్టం చేశారు. జుబీన్ మృతిపై చర్చించేందుకు ప్రతిపక్షాలు ప్రవేశపెట్టిన వాయిదా తీర్మానం సందర్భంగా సీఎం ఈ మేరకు షాకింగ్ కామెంట్లు చేశారు.

స్కూబా డైవింగ్‌లో ప్రమాదం.. కానీ?

52 ఏళ్ల గాయకుడు జుబీన్ గార్గ్ సెప్టెంబర్ 19న సింగపూర్‌లో మరణించారు. స్కూబా డైవింగ్ చేస్తున్న సమయంలో జరిగిన ప్రమాదంలో ఆయన ప్రాణాలు కోల్పోయినట్లు తొలుత వార్తలు వచ్చాయి. అయితే ఆయన మరణంపై మొదటి నుంచీ పలు అనుమానాలు వ్యక్తం అయ్యాయి. గాయకుడికి అంతర్జాతీయ స్థాయిలో ఉన్న అభిమానుల నుంచి, రాజకీయ వర్గాల నుంచి కూడా ఈ మృతిపై పూర్తి స్థాయి దర్యాప్తు జరిపించాలని డిమాండ్లు వచ్చాయి. ఈక్రమంలోనే పోలీసులు దర్యాప్తు చేపట్టారు.

ఈ కేసుతో సంబంధం ఉన్న అనేక మందిని అరెస్ట్ చేసి విచారిస్తున్నారు. ఇద్దరు పోలీసు అధికారులు సహా అనేక మందిని ఇప్పటికే విచారించారు. ఇంకా ఈ కేసు దర్యాప్తు కొనసాగుతూనే వస్తోంది. ఇలాంటి సమయంలోనే సీఎం హిమంత బిశ్వ శర్మ చేసిన హత్య వ్యాఖ్య.. అస్సాం రాజకీయాల్లో, సంగీత అభిమానుల మధ్య తీవ్ర ప్రకంపనలు సృష్టించింది. జుబీన్ గార్గ్ ప్రమాదవశాత్తూ చనిపోలేదని, ఆయన్ని ఎవరో కావాలనే హత్య చేశారని ఆయన అసెంబ్లీలో స్పష్టం చేయడంతో.. ఈ కేసు దర్యాప్తుపై మరింత ఒత్తిడి పెరిగింది.

గాయకుడి మృతిపై నెలకొన్న అనుమానాలను నివృత్తి చేసేందుకు ముఖ్యమంత్రి హిమంత బిశ్వ శర్మ ఇప్పటికే ఉన్నత స్థాయి దర్యాప్తునకు ఆదేశించారు. డీజీపీ ఎంపీ గుప్తా నేతృత్వంలో 10 మంది సభ్యులతో కూడిన ప్రత్యేక దర్యాప్తు బృందాన్ని (SIT) ఏర్పాటు చేశారు. సిట్ ప్రస్తుతం జుబీన్ గార్గ్ సన్నిహితులు, మేనేజర్, ఇతర అనుమానితులపై దృష్టి సారించింది. ప్రమాదం జరిగిన సమయంలో సింగపూర్‌లో ఆయనతో పాటు ఉన్న వ్యక్తులందరిపై నిఘా ఉంచారు. కేసు దర్యాప్తులో భాగంగా జుబీన్ గార్గ్ మేనేజర్, వ్యక్తిగత భద్రతా సిబ్బందితో సహా పలువురిని అరెస్ట్ చేసి విచారణ కొనసాగిస్తున్నారు.