ఆసియాకప్‌ కోసం భారత అండర్‌ 19 జట్టు,,,,కెప్టెన్‌గా ఆయుశ్ మాత్రే

డిసెంబర్ 12 నుంచి ప్రారంభం కానున్న అండర్ 19 ఆసియాకప్ కోసం బీసీసీఐ భారత జట్టును ప్రకటించింది. ఈ మేరకు శుక్రవారం ఆయుశ్ మాత్రే సారథ్యంలోని 15 మంది సభ్యులతో కూడిన ఆటగాళ్లు పేర్లను వెల్లడించింది. ఇందులో యంగ్ డైనమైట్‌.. వైభవ్ సూర్యవంశీ కూడా ఉన్నాడు. ఈ జట్టుకు విహాన్ మల్హోత్రా వైస్ కెప్టెన్‌గా ఎంపికయ్యాడు.

ఐపీఎల్‌లో చెన్నై సూపర్ కింగ్స్ తరఫున అదరగొట్టిన ఆయుశ్ మాత్రేకు.. బీసీసీఐ భారత అండర్-19 జట్టు సారథ్య బాధ్యతలు అప్పగించింది. ఇతడి సారథ్యంలోనే భారత్.. ఆసియాకప్ బరిలో దిగనుంది. ఇటీవల భారత యువ జట్టు ఇంగ్లాండ్, ఆస్ట్రేలియాలో పర్యటించింది. ఈ సిరీస్‌లకు సైతం ముంబైకి చెందిన ఆయుశ్ మాత్రేనే సారథిగా వ్యవహరించాడు. ఆసియాకప్‌లో భారత్, పాకిస్థాన్ జట్లు మరోసారి తలపడనున్నాయి. ఈ రెండు జట్లూ ఒకే గ్రూప్‌లో ఉన్నాయి. డిసెంబర్ 15న భారత్, పాకిస్థాన్ మ్యాచ్ జరగనుంది.

నిజానికి ఆసియాకప్ ట్రోఫీని అన్ని జట్లూ కూడా.. అండర్‌-19 వరల్డ్‌కప్‌నకు సన్నాహకంగా భావిస్తున్నాయి. ఈ మెగా టోర్నీ వచ్చే ఏడాది జనవరి- ఫిబ్రవరి మధ్య జింబాబ్వే, నమీబియా వేదికల్లో జరగనుంది. దీంతో ఆసియాకప్‌లో విజేతగా నిలిచి.. వన్డే వరల్డ్ కప్‌కు ఆత్మవిశ్వాసంతో వెళ్లాలని భారత్ భావిస్తోంది.

అండర్ 19 ఆసియాకప్‌లో మొత్తంగా 8 జట్లు పాల్గొంటున్నాయి. ఇప్పటికే ఐదు జట్లు ఖరారయ్యాయి. మిగతా మూడు క్వాలిఫయర్‌ మ్యాచ్‌ల ద్వారా భర్తీ అవుతాయి. ఈ టోర్నీలో భారత్ డిసెంబర్ 12, డిసెంబర్ 14, డిసెంబర్ 16, డిసెంబర్ 19 తేదీల్లో మ్యాచ్‌లు ఆడనుంది. డిసెంబర్ 21న ఫైనల్ మ్యాచ్ జరుగుతుంది.

అండర్‌-19 ఆసియాకప్‌కు భారత జట్టు..

ఆయుష్‌ మాత్రే (కెప్టెన్‌), వైభవ్‌ సూర్యవంశీ, విహాన్‌ మల్హోత్రా (వైస్‌ కెప్టెన్‌), వేదాంత్‌ త్రివేది, హర్వంశ్‌ సింగ్‌ (వికెట్‌ కీపర్‌), అభిజ్ఞాన్‌ కుందు (వికెట్‌ కీపర్‌), యువరాజ్‌ గోహిల్‌, కాన్షిక్‌ చౌహాన్‌, నమన్‌ పుష్పక్‌, డి.దీపేశ్‌, ఖిలాన్‌ ఎ.పటేల్‌, హెనిల్‌ పటేల్‌, కిషన్‌ కుమార్‌ సింగ్‌, అరోన్‌ జార్జ్‌, ఉద్దవ్‌ మోహన్‌.

స్టాండ్‌ బై ప్లేయర్లు..

రాహుల్‌ కుమార్‌, హేమ్‌చు దేశన్‌ జె, బీకే కిషోర్, ఆదిత్య రావత్