దెబ్బకు రూ.1,000 కోట్ల నష్టం,,,,ఇండిగో విమానాల రద్దుతో ఢిల్లీ వ్యాపారంపై తీవ్ర ప్రభావం

ఇండిగో విమానయాన సంస్థలో వరుసగా పదో రోజు కూడా వందలాది విమానాలు రద్దు కావడం, ఆలస్యం కావడం వల్ల ఢిల్లీ ఆర్థిక వ్యవస్థపై తీవ్ర ప్రభావం పడింది. ఈ సంక్షోభం కారణంగా ఢిల్లీలోని వ్యాపార, పర్యాటక, పారిశ్రామిక రంగాలు భారీగా నష్టపోయాయి. ది ఛాంబర్ ఆఫ్ ట్రేడ్ అండ్ ఇండస్ట్రీ (CTI) అంచనా ప్రకారం.. ఈ సంక్షోభం వల్ల ఢిల్లీకి దాదాపు రూ. 1,000 కోట్ల నష్టం వాటిల్లింది.

విమానాల రాకపోకల్లో అంతరాయం కలగడం వల్ల వ్యాపారులు, పర్యాటకులు, బిజినెస్ ట్రావెలర్ల రాకపోకలు గణనీయంగా తగ్గిపోయాయి. దీని కారణంగా నగరం అంతటా మార్కెట్ కార్యకలాపాలు బాగా తగ్గినట్లు CTI చైర్మన్ బ్రిజేష్ గోయల్ తెలిపారు. గత 10 రోజుల్లో ఢిల్లీ మార్కెట్లలో జనసంచారం దాదాపు 25 శాతం తగ్గిందని వెల్లడించింది. సాధారణంగా ఢిల్లీ విమానాశ్రయం నుంచి ప్రతిరోజూ 1.5 లక్షలకుపైగా ప్రయాణికులు రాకపోకలు సాగిస్తుండగా.. అందులో సుమారు 50 వేల మంది వ్యాపారులు, బిజినెస్ ట్రావెలర్‌లు ఉంటారు. అయితే ఇండిగో విమానాల రద్దు కారణంగా ఈ వ్యాపారుల రాకపోకలు పూర్తిగా తగ్గిపోయాయి. దీని ఫలితంగా టోకు మార్కెట్లు, రిటైల్ హబ్‌లు భారీ నష్టాలను చవిచూశాయి.

పర్యాటక, ఈవెంట్స్ రంగాలకు భారీ ఎదురుదెబ్బ

విమానాల రద్దు ప్రభావం పర్యాటక రంగంపై తీవ్రంగా ఉంది. గత వారం రోజుల్లోనే హోటళ్లు, రెస్టారెంట్లు, రిసార్ట్‌లలో బుకింగ్‌లు వేలాదిగా రద్దు అయినట్లు CTI తెలిపింది. ముఖ్యంగా ఢిల్లీలోని ఎగ్జిబిషన్, ఈవెంట్స్ ఎకోసిస్టమ్‌పై ఈ సంక్షోభం తీవ్ర ప్రభావం చూపింది. గత 10 రోజులుగా ప్రగతి మైదాన్, ఆనంద్ మండపంలో ఆటోమొబైల్స్, చేనేత, వస్త్రాలు, గృహోపకరణాలు వంటి పెద్ద ప్రదర్శనలు జరుగుతున్నాయి. ఈ సంక్షోభం క్రిస్మస్, న్యూ ఇయర్ సీజన్‌ను దెబ్బతీసింది. డెస్టినేషన్ వెడ్డింగ్‌లకు హాజరు కావాల్సిన వ్యక్తులు విమానాలు రద్దు కావడంతో వేదికలకు చేరుకోలేకపోయారు. దీంతో హోటళ్లు, క్యాటరర్‌లకు నష్టం వచ్చింది.

ఇండిగో విమానాల రద్దు కారణంగా దేశంలోని వివిధ ప్రాంతాల నుంచి రావాల్సిన వ్యాపారులు, సందర్శకులు రాలేకపోవడంతో ఈ ప్రదర్శనలకు తీవ్ర నష్టం వాటిల్లింది. ఈ సంక్షోభం ఇండిగోకు మాత్రమే పరిమితం కాకుండా ఢిల్లీ వాణిజ్య కేంద్రంగా ఉన్న మొత్తం దేశీయ ఆర్థిక వ్యవస్థపై పరోక్ష ప్రభావాన్ని చూపుతోందని నిపుణులు ఆందోళన వ్యక్తం చేస్తున్నారు.