చుక్కేసి.. రోడ్డుపై పక్కేసి.. కాలు మీద కాలేసి.. కమలాపురంలో మందుబాబు హల్ చల్

అసలే కోతి.. ఆపైన కల్లు తాగింది.. ఆపైన నిప్పు తొక్కిందనే సామెత వినే వింటారు.. అంటే కోతిచేష్టలకు కేరాఫ్ అడ్రస్ అయిన కోతి.. ఇక కల్లు తాగితే, దాని పెర్ఫామెన్స్ మామూలుగా ఉండదనే ఉద్దేశంతో ఈ సామెత చెప్తారు. ఎవరైనా అల్లరి చేసే వారిని ఉద్దేశించి కూడా ఈ వ్యాఖ్యలు చేస్తుంటారు. ఈ రోజుల్లో ఈ సామెతను మందుబాబులకు కూడా ఉపయోగించుకోవచ్చు. తాగితే మరిచిపోగలనుంటూ మందు బాటిళ్లు గుటకాయ స్వాహా అనిపించే మందుబాబులు.. తాగిన తర్వాత నిజంగానే తాము ఎక్కడున్నామనేదీ మర్చిపోతుంటారు. అలాంటి ఘటనే వైఎస్సార్ కడప జిల్లా కమలాపురంలో చోటుచేసుకుంది. ఎంత తాగాడో , ఏం తాగాడో తెలియదు కానీ.. కమలాపురం క్రాస్ రోడ్డులో ఓ మందుబాబు నడిరోడ్డుపై తన విద్యలన్నీ ప్రదర్శించాడు..

పీకలదాకా మందు కొట్టిన ఓ మందుబాబు.. రోడ్డుకు అడ్డం పడుకుని వాహనాల రాకపోకలకు ఆటంకం కలిగించాడు. చుక్కేసి.. రోడ్డుపై పక్కేసి.. కాలు మీద కాలేసి.. వాహనదారులకు తన మహారాజు వైభవాన్ని చూపించాడు. నడి రోడ్డుపై నాగిని డ్యాన్స్ చేస్తూ.. వచ్చీపోయే వారికి విసుగు తెప్పించాడు. మనోడి మెస్మరైజింగ్ పెర్ఫామెన్స్ చూసిన వాహనదారులు.. ఏం తాగావురా అయ్యా అని సణుక్కుంటూ.. మనోడి మీద మనసులోనే గొణుక్కుంటూ.. సగటు ఇండియన్ సైకాలజీతో కిక్కురుమనకుండా తమ దారంట తాము వెళ్లిపోయారు. అయితే ఇదంతా గమనించిన ఓ ఆర్డీసీ డ్రైవర్.. నెటిజనానికి కూడా కూసింత కాలక్షేపం అందిద్దామనే సదుద్దేశంతో.. మందుబాబు కళా విన్యాసాన్ని తన ఫోన్‌లో బంధించాడు.

 ఆ తర్వాత సోషల్ మీడియాలో షేర్ చేయడంతో మందుబాబు విన్యాసాలు నెట్టింట వైరల్ అవుతున్నాయి. అయినా చలికాలం.. తాగితే తాగాడు కానీ.. ఇంట్లో కమ్మగా పడుకోకుండా, ఇలా రోడ్డెక్కి విన్యాసాలు చేయడం ఏమిటి బ్రదర్ అంటూ నెటిజనం కామెంట్లు చేస్తున్నారు. మరోవైపు వాహనాల రాకపోకలకు ఆటంకం కలిగించే ఇలాంటి వారిపై కఠిన చర్యలు తీసుకోవాలని కామెంట్లు చేస్తున్నారు. మరికొంత మంది మాత్రం ఏదైనా జరగరానిది జరిగితే.. ఎవరిది బాధ్యత అంటూ కామెంట్లు చేస్తున్నారు. ఏదేమైనా కమలాపురం క్రాస్ రోడ్డులో మనోడి యవ్వారం ఇప్పుడు నెట్టింట చక్కర్లు కొడుతోంది.