హెచ్‌డీఎఫ్‌సీ ఏఎంసీ నుంచి మరో కొత్త స్కీమ్.... ఈనెల 13 వరకే ఛాన్స్

 దేశంలోని దిగ్గజ అసెట్ మేనేజ్మెంట్ కంపెనీల్లో ఒకటైన హెచ్‌డీఎఫ్‌సీ ఏఎంసీ మరో కొత్త స్కీమ్ తీసుకొచ్చింది. చాలా తక్కువ పెట్టుబడితోనే మ్యూచువల్ ఫండ్స్‌లో ఇన్వెస్ట్ చేసేందుకు అవకాశం కల్పిస్తోంది. అదే హెచ్‌డీఎఫ్‌సీ నిఫ్టీ ఇండియా కన్సంప్షన్ ఇండెక్స్ ఫండ్. భారత దేశ దీర్ఘకాల వినియోగ వృద్ధి నుంచి ప్రయోజనం పొందే కంపెనీల్లో ఇన్వెస్ట్ చేయడం ద్వారా పెట్టుబడిదారులకు లాభాలు అందించడమే లక్ష్యంగా ఈ న్యూ ఫండ్ ఆఫర్ డిజైన్ చేసినట్లు హెచ్‌డీఎఫ్‌సీ ఏఎంసీ తెలిపింది. మరి ఈ కొత్త స్కీమ్ గురించిన వివరాలు తెలుసుకుందాం.

హెచ్‌డీఎఫ్‌సీ నిఫ్టీ ఇండియా కన్సంప్షన్ ఇండెక్స్ ఫండ్ న్యూ ఫండ్ ఆఫర్ సబ్‌స్క్రిప్షన్ ఫిబ్రవరి 4, 2026 రోజునే ప్రారంభమైంది. ఈ సబ్‌స్క్రిప్షన్ ఫిబ్రవరి 13, 2026 వరకు అందుబాటులో ఉంటుంది. ఈ స్కీమ్ బెంచ్ మార్కెట్ ఇండెక్స్ నిఫ్టీ ఇండియా కన్సంప్షన్ ఇండెక్స్ గా ఉంటాయి. దేశీయ వినియోగంపై ఆధారపడే కంపెనీలను అనుసరిస్తూ లాభాలు అందుకోవడమే ఈ స్కీమ్ ప్రధాన లక్ష్యం. ఈ ఇండెక్స్‌లో ఎఫ్ఎంసీజీ, ఆటోమొబైల్, ఆటో కాపొనెంట్స్, కన్సూమర్ సర్వీసెస్, కన్సూమర్ డ్యూరబుల్స్, హెల్త్ కేర్, టెలికాం వంటి 30 కంపెనీల స్టాక్స్ ఉంటాయి. ఆయా కంపెనీలకు వచ్చే ఆదాయంలో 50 శాతానికిపైగా దేశీయంగానే సమకూరుతోంది. దీంతో దేశీయ వినియోగంపైనే ఆ కంపెనీల వృద్ధి అనేది ఆధారపడుతుంది.

 హెచ్‌డీఎఫ్‌సీ నిఫ్టీ ఇండియా కన్సంప్షన్ ఫండ్ మేనేజర్లుగా నందితా మెనెజెస్, అరుణ్ అగర్వాల్ పేర్లను కంపెనీ వెల్లడించింది. న్యూ ఫండ్ ఆఫర్ సమయంలో ఇన్వెస్టర్లు కనీసం రూ. 100 ఉన్నా చేరవచ్చు. ఆ తర్వాత రిటైల్ మార్కెట్లోకి ఈ స్కీమ్ వచ్చిన తర్వాత సబ్‌స్క్రిప్షన్, రిడంప్షన్ కోసం సైతం రూ. 100 నుంచి ఇన్వెస్ట్ చేసే అవకాశాన్ని కల్పిస్తున్నట్లు తెలుస్తోంది. గరిష్ఠంగా ఎంతైనా ఇన్వెస్ట్ చేయవచ్చు. అప్లికేషన్ స్టాంప్ డ్యూటీ సహా ఇతర ట్యాక్సులను కట్ చేసిన తర్వాత యూనిట్ల అలాట్మెంట్ ఉంటుందని కంపెనీ తెలిపింది.

హెచ్‌డీఎఫ్‌సీ అసెట్ మేనేజ్మెంట్ కంపెనీ లిమిటెడ్ అనేది హెచ్‌డీఎఫ్‌సీ మ్యూచువల్ ఫండ్ ఇన్వెస్ట్‌మెంట్ మేనేజర్. దేశంలోని అతిపెద్ద మ్యూచువల్ ఫండ్లలో ఒకటి. ఈ కంపెనీని 1999, డిసెంబర్ 10న ఏర్పాటు చేశారు. అయితే, హెచ్‌డీఎఫ్‌సీ మ్యూచువల్ ఫండ్‌ కోసం అసెట్ మేనేజ్మెంట్ కంపెనీగా వ్యవహరించేందుకు 2000, జూలై 3న సెబీ నుంచి అనుమతులు ఇచ్చారు. దేశంలోని ప్రముఖ ఏఎంసీల్లో హెచ్‌డీఎఫ్‌సీ ఒకటి. లక్షల మంది ఇందులో పెట్టుబడులు పెడుతున్నారు.