ఎపి కేబినెట్ లో అత్యంత ధనవంతుడు సీఎం జ‌గ‌న్‌!

ఆంధ్రప్రదేశ్ మంత్రి‌వర్గంలో అత్యంత ధనవంతుడు సీఎం జగనేనని అసోసియేషన్ ఫర్ డెమొక్రటిక్ రీఫార్మ్స్ పేర్కొంది. కేబినెట్ లోని 26 మంది అందజేసిన ఎన్నికల ప్రమాణ పత్రాలను పరిశీలించిన ఏడీఆర్ ఈ మేరకు ఓ జాబితాను విడుదల చేసింది. ఇందులో అందరికంటే ముఖ్యమంత్రి జగన్ రూ.510 కోట్ల ఆస్తులతో మొదటి స్థానంలో ఉండగా.. రూ.130 కోట్లతో పెద్దిరెడ్డి రామచంద్రారెడ్డి రెండో స్థానంలో ఉన్నారు. ఆ తర్వాత రూ.61 కోట్లతో మేకపాటి గౌతంరెడ్డి మూడో స్థానంలో నిలిచారు. అంతేకాదు జగన్ కేబినెట్‌లోని 26 మంది మంత్రుల్లో 23 మంది కోటీశ్వరులేనని ఏడీఆర్ నివేదిక పేర్కొంది.
మంత్రులు సగటు ఆస్తి రూ.35.25 కోట్లు ఉన్నట్లు ఏడీఆర్ వివరించింది. అంతేకాదు కేబినెట్‌లోని 17 మంది మంత్రులపై క్రిమినల్ కేసులు ఉన్నాయని, వీరిలో 9 మందిపై అభియోగాలు నమోదైనట్లు తెలిపింది. జగన్ మంత్రివర్గంలో 8 మంది 8-12 తరగతి మధ్యలో చదువుకున్నవారు ఉన్నారని, గ్రాడ్యూయేషన్ పూర్తి చేసినవారు 18 మంది ఉన్నారని నివేదికలో తెలిపింది.
ఇక అప్పుల విషయంలో పెద్దిరెడ్డి రామచంద్రారెడ్డి అందరికంటే మొదటి స్థానంలో ఉన్నారు. అతనికి రూ.20 కోట్ల అప్పులున్నట్లు ఏడీఆర్ పేర్కొంది. ఆ తర్వాత స్థానంలో  చెరుకువాడ శ్రీరంగనాథరాజుకు రూ.12 కోట్లు, ముత్తంశెట్టి (అవంతి) శ్రీనివాసరావుకు రూ.5 కోట్ల అప్పులున్నట్లు ఏడీఆర్ తన నివేదికలో తెలిపింది.
అలాగే 26 మంత్రుల్లో ముగ్గురి వార్షిక ఆదాయం రూ. కోటి పైమాటే.. ఇందులోనూ ముఖ్యమంత్రి జగన్ మొదటి స్థానంలో ఉన్నారు. జగన్ వార్షిక ఆదాయం మొత్తంగా (సొంతంగా, భార్య, ఇతరులు కలిపి) రూ.38 కోట్లు కాగా.. అందులో జగన్ సొంత ఆదాయం రూ.25 కోట్లు. ఇకపోతే శ్రీనివాస్ రావు వార్షిక ఆదాయం మొత్తంగా రూ.3 కోట్లు. సొంత ఆదాయం రూ.కోటి. విద్యా శాఖ మంత్రి వార్షిక ఆదాయం మొత్తంగా రూ.1 కోటి. సొంత ఆదాయం రూ.28 లక్షలు.
అలాగే వైఎస్ఆర్‌సీపీ ప్రభుత్వంలోని 35 శాతం మంది మంత్రులపై క్రిమినల్ కేసులు ఉన్నాయి. 2014లోని మంత్రివర్గం కన్నా ఇది ఎక్కువగా ఉండటం గమనార్హం. మంత్రివర్గంలోని 26 మందిలో 9 మందిపై సీరియస్ క్రిమినల్ కేసులు ఉన్నాయి.